I Surrender All

(Matthew 10:39)

Judson W. Van de Venter (1855-1939) Winsfield S. Weeden (1847-1908)

Hih la a phuakpa in a nuntakna Khazih’ tungah kipia a Pasian’ nasem dinga a pumpiak ni ngaihsunkik-a a phuah ahi hi. 1896 kumin Winsfield S. Weeden leh Leonard-te’ kaihkhop Gospel Songs of Grace and Glory kici labu sungah kihel hi. Mr. Van de Venter in hih la a phuahna thu anuai-a bangin gen ngei hi:

“(America gam) East Palestine, Ohio ah cialpi ka bawl lai-a George Sebring’ inn-a ka phuah ahi hi.(George Sebring pen Sebring, Ohio ah Sebring Campmeeting Bible Conference a phuankhia pa hi a, America gam Florida state-a Sebring khua a satpa zong ahi hi. ZKK) Ka khantawn limsuaih uk-a a sin mi ka hi hi. College ka zawh khit ciangin a minthang mahmah German sia khat’ khut nuai-ah limsuaih ka sin lai hi. Sharon, Pennsylvania-a public sangte ah supervisor zong ka sem hi.

Tua laitak ka pawlpi First Methodist Church ah khakhanlawhna cialpi hong kibawl hi. Kei zong ka hihzawh zah-in ka kihel a, a sawt lo-in “lay preacher” (pawlpi mi mawkmawk thuhilhsia) in hong kikoih hi. Pasian in ka nasepna thupha hong pia a, cialpi ka bawlna ah mi tampi piangthak hi. Pasian’ Khasiangtho in leitung nasep ahi ka laihilhna nusia-a, lungdamna thu tangkona ah ka kipumpiak ding nakpi-in hong hanthawn hi; ke’n lah ka mang zo peuhmah kei hi. Limsuai khat ka hih ding mah ka ut ngeungau kha hi. Tua banga ka om kum 5 sung sawt zen hi. A tawpna ah nial zo nawn lo-in na khempeuh – ka hun leh ka siamna khempeuh – Zeisu ka pumpiak hun hong tung hi. Ka nuntakna ah ni thak khat hong suak tawh kibang liang hi. Evangelist khat ka suak a, tua ni dong ka sunga a kiselcip tawh a kibang ka siamnate ka mukhia ta hi. Pasian in ka sungah la thak hong guan-a phatna ka sak nading aw thak hong pia hi.

“Tawlpi khat sung khensat lah a ka omna panin na khempeuh Zeisu ap-a, ka nuntakna Pasian’ nasep nadinga ka kipiak hun phawkna in hih “Zeisu Tungah Kipia Ta’ng” a cih ka phuah ahi hi” ci-in lungdamna tawh gen kik hi.

Judson W. Van de Venter pen America gam Dundee, Michigan gei-a lo khat ah December 5, 1855 ni-in suak hi. Hillsdale College-a a sangkahna a man khit ciangin art teacher leh Sharon, Pennsylvania-a public school-te ah supervisor of art hi. Pasian’ ading kipumpiak-a evangelistic nasep a sep ciangin Winsfield S. Weeden in lasakna tawh huh den hi. Winsfield bel America gam Middleport, Ohio ah March 29, 1847 ni-a suak ahi hi. Evangelistic nasepna ah lasakna tawh a pan ma-in ama’ omna kiimtengah lasakzia hilh kawikawi hi. Lasaksiam bek hi lo-in la makaih zong siam hi, kici hi. La tampi kaikhawmin labu pawlkhat khenkhia a, tuate lakah The Peacemaker (1894), Songs of the Peacemaker (1895), Songs of Sovereign Grace (1897) cihte kihel hi. A hansuang tungah hih la thulu “Zeisu Tungah Kipia Ta’ng” kigelh hi.

Evangelist minthang Dr. Billy Graham in Cliff Barrows’ gelh Crusade Hymn Stories laibu sungah hih lamal phuakpa Mr. Van de Venter tawh kisai hibangin gen ngei hi: “Thuhilh ka kipat ck lai-a hong zo mahmah evangelist khat pen “Zeisu Tungah Kipia Ta’ng” la a phuak laphuaksiam Rev. J. W. Van de Venter ahi hi. 1930 kumte in ka sangkahna Florida Bible Institute (tu’n Trinity Bible College kici) ah hong hawh den-a, ko sangnaupangte in migit luat mahmah khami luat mahmah a thuah siapa ka it mahmah uh a, Tampa, Florida-a a phalbi inn ah nitak kikaihkhopna leh lasak khopna ka nei den uh hi” ci-in na gen hi.

Print Friendly, PDF & Email
Please follow and like us:

Added by

SHARE