Anywhere With Jesus

(Late 37:5)

Jessie B. Bound (Pounds) (1861-1921) Daniel B. Towner (1850-1919)

Hih la a kiphuah lai-in a la-aw kiphuak masa a, tua khit ciangin a lamal kinungphuah zawsop hi. La kiphuak peuhmah a tamzaw a lamal kiphuaka, tua tawh kituak dingin a aw a kibulh hi denzaw hi. Dr. Daniel B. Towner in Pasian’ mizat minthang D. L. Moody’ thuhilhna a ngaihna panin a thulu ding leh a thu a la ding mahmah a ngah ahi hi. America gam Binghamton, New York ah 1866 kumin Moody tawh kithuah-in cialpi bawl uh hi. D. L. Moody tawh a kithuah masak lam ahi hi. A la phuah lakah zong a masapen hi sawnsawn hi.

Daniel B. Towner pen March 5, 1850 ni-in America gam Rome, Pennsylvania-a suak hi a, October 3, 1919 ni-in Longwood, Missouri ah si hi. Evangelical gospel music lamah a pha ding om lo hi, ci-in kiciamteh hi. Music hilh sia, conductor, solo sa, la-aw phuak, lamal phuak – siam loh mahmah a nei lo khat ahi hi. Ama’ pattahsa mi minthang tampi zong om hi. Charles M. Alexander, Harry Dixon Loes, Homer Hammontree, H.E. Tovey, George S. Schuler-a kipan evangelical la makai tampite a pattahsa vive ahi hi.1885 kum, D. L. Moody Cincinnati ah evangelistic campaign bawl dinga a pai-a kipan Moody leh Towner-te kizom den uh hi. Tua kikhoppite ah Towner in choir makaih-a, Moody in a siam a vakna, kha lama a cihtaknate thupisa mahmah-a, amah tawh kithuah dingin kun hi. Tua huna kipan a a sihkhiat dongin D.L. Moody tawh ahi zongin, Moody tawh kizom gospel nasepna khatpeuhpeuh tawh ahi zongin semkhawm den hi.

1893 kum khuakhal sungin D.L. Moody in ama’ phuat sangpi Moody Bible Institute-a Music director sem dingin Towner cial hi. Khangno lamte gospel music makai dinga pattah nading tupna ahi hi. Gospel la makai dingte pattahna kician neih ding kisam hi ci a a phawk masa Moody leh Towner hi, kici thei hi. Music hilh sia khat ahihna, la khatpeuh a phuahna, mipi mai-a la a makaihna khempeuh ah mite Zeisu Khazih tawh a kizop nading uh, a kinai nadinguh tup-in nei vinven hi.

La-aw dawng 2,000 val phuaka, labu 14 kaikhawmin sangah laihilhna-a a zat ding textbook pawlkhat zong gelh hi. Ama’ phuah la-awte lakah, “Muang Ding, Ngai Ding”(Trust and Obey), “I Topa Hong Itna Lamdang Hi” (Grace Greater Than Our Sin), “Saved By the Blood,” “Nor Silver Or Gold,” “My Anchor Holds,” “Only a Sinner” cihte minthang deuh hi.

1866 kumin D.L. Moody in Binghamton, New York ah cialpi bawl-a, Towner zong la makai-in kihel hi. Moody’ thuhilhna ah mi khatpeuh in a nuntakna ah Zeisu Khazih Makaipi-in nei peuh leh haksatna khempeuh ah Pasian in gualzawhpih ding ahih manin lau nading om lo, kihtak ding om lohi ci-in gen hi. Laisiangtho panin gentehna tuamtuam la a, humpi kua sunga Daniel, meikuangpi sunga Hebrew tangval thumte, Sawltakpi Paul-a kipan a dang tuamtuamte tawh genteh hi. Tua mite tu mahmah a nungta lai bang-in a thuhilhna nungta a, mite’ lungtang nakpi-in lawng hi.

Moody’ thuhilhna a ngaih kawmin Towner in, “Hih thuhilhna thulu tawh a kituak ding la khat a om loh phamawh hi” ci-in ngaihsun hi. Tua hunlai-a laphuak peuhmah in lamal phuak masa-a tua tawh kituak la-aw phuak denzaw uh hi. Ahi zongin Dr. Towner in a la-aw phuak masa a, tua tawh a kituak ding lamal guan ding khensat hi. A la-aw a zawh ciangin Cleveland, Ohio ah khak hi. Tua lai-ah nungakno Jessie Brown min nei khat teng hi. Dr. Towner in laikhak khat gelh-in a la-aw phuahsa tawh khak khawma, “Zeisu Tawh Mun Khempeuh” cih thu a gen ding la lamal dawng khat a phuah nadingin vaikhak hi. Miss Brown in Dr. Towner’ khak la-aw piano-in tum pah a, Dr. Towner’ deihna man kha pahlian hi. Hun tomno khat sungin “Zeisu Tawh Mun Khempeuh” a kici lamal hong phuak khin ziau hi. A sawt lo-in Sunday School-te leh Christian Endeavor kipawlnate ah a kideihpen la hong suak pah hi.

1896 kumin Jessie Brown leh Rev. John E. Pounds-te kiteng uh a, tua huna kipan in Jessie Pounds lah kici zel, Jessie Brown peuh zonglah kici suaksuak kha zel a, hih la a phuakte’ min a kigelhna ah min kibang lo nih a om theihna tua thu hang ahi hi.

Print Friendly, PDF & Email
Please follow and like us:

Added by

SHARE