Thou Didst Leave Thy Throne

(Luke 2:7)

Emily E.S. Elliott (1836-1897) Timothy R. Matthews (1826-1910)

Hih la a phuaknu Emily Elliott pen July 22, 1836 ni-in England gam Brighton ah suak hi. A nuntak sung tawntung Anglican Church sunga evangelical lamte tawh kipawl den hi. Ama’ kiim leh paam-a rescue mission leh Sunday School-te ah gim thei lo tawl thei lo liangin lawptakin kipia-in nasem hi. Emily Elliott pen “Ka Hi Bangin” (Just As I Am) a phuaknu Charlotte Ellliot’ upa’ tanu ahi hi. Kum 6 sung Church Missionary Juvenile Instructor kici magazine editor-in om hi. Under the Pillow kici laibu sungah a hymn phuah dawng 48 kihel hi. Tua laibu bel zato-a lum damlote, inn-a om damlote leh mi zawngkhalte kikepna mun-a om damlote’ sim dinga kiphuak la pawlkhat a kikaihkhopna laibu ahi hi.

Hih la lian pen Miss Elliotte in England gam Brighton khua-a a pa’ pawlpi St. Mark’s a choir-te’ sak ding leh sangkah naupangnote’ sak dinga a khetkhiat ahi hi. I Topa’ hong paina leh a suahna thu naupangnote hilh nopna-a kiphuak la ahi hi. Luke 2:7 sunga “zintun innah amau ading inndei awng lo ahih manin” (ZIV) a cihna mun bulphuh-a a phuah ahi hi.

Miss Elliott in hih la a phuahna ah “(ahih) hangin” (but) zangin a kilamdang na pawlkhat tehkaak-a a phuah ahi hi.

Taang khatna ah… Vangtung tokhom leh kumpi lukhu- Bethlehem ah inndei om lo

Taang nihna ah… Vantung mite’n peengkul tum- Leitungah hong kiniamsak

Taang thumna… Leitung ganhingte’n bu leh kua nei ciat- Ama’ lupna leitung bek

Taang lina… Mite tatkhiatna hong puak- Mite’n Amah Calvary bek pia uh

Taang ngana… Hih lai-ah a kilehbulh nate kilumlet: Sihna pen gualzawhna suakin, taang nihna-a vantung mite’ peengkul tum pen hong paikik ciangin kitumkik ding hi.

A sakkik bel a taang-a kigen thute a ki-aituamsuah ahi hi.

Hih la-aw pen “Margaret” kici a, Timothy Richard Matthews in hih lamal tawh sakkhop ngiat dinga a phuah ahi hi. Matthews bel England gam Bedford ah November 4, 1826 ni-a suak ahi hi. Ama’ hun lai-in Great Britain gam buppi ah organ tum siampen khat-a kiciamteh ahi hi. Biakna nasem khat mah hi a, hymn la-aw dawng 100 val phuak hi.

Lam-etna leh lawpna i cihte thu-ummi khat’ nuntaknaah a om loh a phamawh a nuntakna’ khen khat hi mai hi. Thuciam Lui hun lai-in hong pai ding Messiah lam-etna tawh nungta uh hi. Peengkul kimutna awging i zak ding, i Topaw tawh i kimuh ding, i Honpa tawh tawntung inn-a i omkhop ding cihte bel eite’ ngaklah i lam-etna leh i lawpnate ahi hi.

Print Friendly, PDF & Email
Please follow and like us:

Added by

SHARE