Does Jesus Care?

(I Peter 5:7)

Frank E. Graeff (1860-1919) J. Lincoln Hall (1866-1930)

Haksatna ka thuak laitakin Pasian in hong ompih takpi-in hong lunghimawh takpi mah ahi hiam? Ka ngaihsutna khempeuh gik mahmah-a, ka tat ka heekna khempeuh a gimhuai ciangin Ama’n hong kem takpi ahi hiam? Ze-etna khauh lua mahmah pawlkhat nang zo nawn lo dinga ka kithawi laitak Ama’n hong don takpi mah ahi hiam? Leitunga ka it ka ngaihte tawh kikhena mangpha ka kikhak ciangin hong awlmawh takpi mah ahi hiam?

Hih bang dotna leh lunghihmawhnate hih la aphuakpa’ tuah bangin thu-ummi khempeuh phial in a tuah ahi hi. Frank E. Graeff pen Methodist minister khat hi a, Philadelphia Conference sunga pawlpi lianpen pawlkhat ah pastor sem hi. Ama’ khawk sung buppi ah “sunshine minister” (nitaang khuavak banga maitaii den siapa) kici hi. “Huan Sungah” cih la a phuakpa C. Austin Miles in F. E. Graeff tawh kisai-in hibang gen ngei hi: “Amah pen kha thu ah a hoih lam vive mu thei a a lam-en khat ahi hi. Naupangte’ ngaih mahmah a lawm hoihpen khat uh hi lai hi. Nitaang khuavak bangin a mai a taii zahkhat-in a lungsim zong hoih-a, naupangte bek hi lo-in aneu alian a kuamapeuh in ngai mahmah hi. Sikhuup bangin mi huup-a, naupang bang upna a nei mi khat ahi hi.”

A mai taii mahmah-in mite’ it mite’ ngaih-in a om hangin Frank E. Graeff zong a nuntakna ah haksatna leh ze-etna a thuak zel tham khat ahi hi. Hih la zong tua bang haksatna leh ze-etna, pumpi cinat leh lungkhamna a thuak laitaka a phuah ahi hi. Laisiangtho simin hehnepna leh thathak ngahkik zel hi. Tua bang hun laitakin I Peter 5:7 in ama’ ading khiatna nei phadiak hi: “Amah in note hong awlmawh ahi manin na lunghimawhnate khempeuh uh ama tungah nga un”(ZIV).

“Ama’n hong awlmawh ahi manin” a cihna mun ta kin ama’ kisapna mun tak gen kha lian-a, hih la a phuahna ah a bulphuhpi suak hi.

Frank E. Graeff pen December 19, 1860 ni-in America gam Tamaqua, Pennsylvania ah suak hi. July 29, 1919 ni-in Ocean Grove, New Jersey ah si hi. A khangno lai mah in Pasian’ sapna ngah a, 1890 kumin Philadelphia Conference ah Pasian’ nasem dingin kisang hi. A pawlpi sunga naupangte lunglut deuh-a, khangnote’ tunga tangthu gen siamin minthang hi. La kici pongpong dawng 200 val phuaka, novel khat The Minister’s Twins zong gelh hi.

Hih la a aw a phuak bel J. Lincoln Hall hi a, November 4, 1866 ni-in America gam Philadelphia ah suak hi. A khan sung tawntung gospel laphuah lasakna ah mi minthang mahmah khat ahi hi. University of Pennsylvania panin pilna sangpi tawh sang zo a, Harriman University panin honorary Doctor of Music ngah hi. A kizahtaak mahmah la makai, choir conductor, la-aw phuak, music khenkhiapa ahi hi. Cantata tampi, oratorios tampi, anthems tampi ading la-aw phuaka, gospel la dawng za tampi ading zong la-aw phuak hi. Kum tampi sung Philadelphia a Hall-Mack Publishing Company ah a pangpi hi a, tua company zong a sawtna ciangin Winona Lake, Indiana-a Rodeheaver Publishing Company tawh kigawm-in company lian mahmah khat suak hi.

Hall in hih la-aw Frank E. Graeff’ phuah lamal adinga a phuah ahi hi. A phuah ngei la-aw khempeuh lakah a lungkimpen khat hi, ci-in Dr. Hall in gen ngei hi. 1905 kuma Hall-Mack Company pana kikhen New Songs of the Gospel, No. 2 ah kihel pah hi.

Hih la sunga Graeff’ gen mahbangin haksat hun cianga Pasian’ hong ompihna i muanlah theih zel zong mihing’ ngeina hi mai hi. Ahi zongin tua bang hun ciangin Graeff bangmah-in, “A hong kem hi; Ke’n ka thei hi” ci-in Pasian hong kepna leh hong ompihna tel sinsena a gualzo denzelte i hi hi.

Print Friendly, PDF & Email
Please follow and like us:

Added by

SHARE