My Jesus, I Love Thee

(I Peter 1:8)

William R. Featherston (1846-1873) Adoniram J. Gordon (1836-1895)

Hih la a phuakpa William Ralph Featherston (Featherstone ci-in zong kigelh zel) pen Canada gam Montreal ah July 23, 1846 ni-in suak hi. John and Mary Featherston-te’ tapa ahi hi. Wesleyan Methodist Church of Montreal pawlpi mi ahi uh hi.Featherston kum 16 a phak laitaka a pianthak cianga a phuah hi ding hi, ci-in ki-um hi. A tangthu a cinga a kitheih loh hangin Featherston in tua a la phuah Los Angeles a teng a nuno Mrs. E. Featherston Wilson khak hi, kici hi. Tuni dongin hih la a phuah cil lai-a a khutlam ngiat tawh a gelh laidal kikem lai-a Featherston innkuante’ angtanpih mahmah na khat ahi hi. 1864 kumin The London Hymn Book sungah a phuak kithei lo, la ci-in hih la hong kihel lehbung hi.

1870 kumin Boston, Massachusetts Clarendon Street Baptist Church-a pastor sem evangelical pastor minthang mahmah Dr. A. J. Gordon in The London Hymn Book sunga a phuak kithei lo ci-a kihel hih la mu hi. Tua hun laitakin Baptist pawlpite-a zat ding la a kaihkhop laitak ahih mahbangin hi la a muh ciangin en phapha hi. A lamal leh a la-aw kituaksa het lo hi. A ngaihsutsut kawmin thakhat thu-in la-aw thak khat hong suaka tu-a i saksak la-aw ahi hi. 1876 kuma S.L. Caldwell leh A.J. Gordon-te’ kaihkhop The Service of Song for Baptist Churches sungah kihel pah hi. Tua hun-a kipan tuni dong evangelical labu kici peuhmah ah kihel veuden hi. La minthang dang khat ahi “In Tenderness He Sought Me” zong Dr. Gordon’ phuah ahi hi.

Adoniram Judson Gordon bel April 19, 1836 ni-a America gam New Hampton, New Hampshire-a suak ahi hi. Kawlgama hong pai missionary minthang Dr. Adoniram Judson’ min tam ahi hi. A mite’ ading leh a Topa’ ading na tampi a sep khit ciangin February 2, 1895 ni-in Boston ah si hi. Newton Theological Seminary pan a man khit ciangin Baptist pawlpi ah ordination kipia hi. Boston khua a Clarendon Street Baptist Church ah pastor a sep zawh kum 6 a phak kum, 1863 kumin D.L. Moody tawh kithei uh a, Boston khua-a Moody’ nasepna ah nakpi-in panpih hi. The Service of Song for Baptist Churches leh The Vestry Hymn and Tune Book­-te a khetkhiat banah kha sima kihawm The Watchword editor sem-a Quiet Talks kici laibute gelh hi.

“Zeisu Aw, Kong It Hi” a kipan a khang a khanga tul ngei lo late a piankhiat zia i ngaihsut ciangin Pasian’ nasep ahihna kimu thei hi. A mal kiphuaka, tawlkhat khit ciang a aw kiphuaka, tua tegel a kigawmkhop ciangin a tul thei lo Pasian phatna la ngaih hong suak hi. A kiphuahna nungthu a tuamtuam hi a, tuate khempeuh mah gawmtuah-a la dawng khat a suah nadinga nasem Pasian ahihna kimu thei hi.

Print Friendly, PDF & Email
Please follow and like us:

Added by

SHARE