When the Roll is Called Up Yonder

(I Corinthians 15:51,52)

James M. Black (1856-1938) James M. Black (1856-1938)

Hih lamal leh la-aw a phuak James Milton Black pen August 19, 1856 ni-in America gam South Hill, New York ah suak hi. Williamsport, Pennsylvania-a Pine Street Methodist Church ah 1904 kum pan a sih dongin pawlpi mi khat-in om den hi. A neu lai-in lasak leh organ tum sin-a, tua mah tawh kizui-in lasak sinna sang pawlkhat-ah sangsia sem hi. Methodist Book Concerns leh Hall-Mack Company-te’ khet gospel labu tampi ah zong editor sem hi. Ama’ khet labute lakah 1894 kuma kikhen Songs of the Soul labu mah minthangpen hi. A kikhet zawh kum nih sungin bu 400,000 val kizuakkhia hi. “Vantungah Min Hong Sap Laitak” zong tua labu sungah kihel-a, tua huna kipan America leh Great Britain gamte-a cialpi kici peuhmah ah hih la kisa den hi. Gosple labu kici peuhmah a kikhet nak leh hih la kihel locih bang om lo hi.

Black pen Methodist pawlpi sunga pawlpi mi mawkmawk khat hi lel a, Sunday school lam nasepnate kin mahmah in khangno lam nasepna zong a lunglut mahmah khat ahi hi. Social nasep lamsang ama’ vei hi deuh hi. Sunday school sia leh khangno kipawlna ah president a sep laitak, ni khat, zu khamkham mi khat’ ta nu, puan gina zong a silh zo lo kum 14 a pha Bessie kici numeino khat tawh kimu hi. Sunday school kah dingin zawna tua nu in mang pah hi. A sawt lo-in siapa’ zi leh a lawmte in tua nu’ silh ding niik leh puan a kicingin hong puak uh hi. Tua ni a kipan Sunday school lah pelh nawn lo, khangno kikhopna lah pelh nawn peuhmah lo hi. Nitak khat a kikhopna vuah a kikhawm mite’ min kisama Laisiangtho tho mun khat ta tawh a kidawng lianlian kimlai, tua nu’ min a kisap ciangin a dawng om het lo mawk hi. “Bang hanga tua numeino hong kikhawm lo ahi tam? A ci a lu khatpeuh na ahi tam? Ahih kei leh a pa zukham in phal lo mai a hi tam?” Thu tampi ngaihsun hi.

Tua nitakin James Black in ni khat ni ciangin Tuuno’ Nuntakna Laibu panin i minte a kisap teh khatpeuh kihel kha lo-in om mawk lehang a dah huai zia ding thuhilhna-in nei hi. “Topa aw, hua gal-ah ka min a kisap ciangin a dawng lian dingin hong omsak in” ci-in thu ngen hi. Tua nitak kikhopna a khup nadingin tua thu tawh kituak la khat teel nuam mahmah a, ahih hang mu zo lo hi.

Kikhop man phet-in Bessie-te’ inn lam zuanin pai pah vingveng hi. A inn uh a tun ciangin lupna tunga lum, a cina lua mahmah-a om Bessie mu hi. Ama’ siavuanpa mahmah sam pah-a a velsak ciangin pneumonia natna nasia khin lua ta, kilap nawn lo mai ding, cih mukhia hi. Mr. Black a lungsim gik mahmah hi.

Lam tawntungah a min a kisap cianga a dawng thei lo Bessie bekbek ngaihsunsun hi. Ni khat ni teh vantungah min sapna khat om takpi dinga Tuuno’ Nuntakna Laibu sunga min om lo mite’ ading dah huai zen si incia maw! ci-in ngaihsunsun hi.Tua kawmin, “Tua bang la khat om leh!” ci-in ngaihsunsun hi. Tua laitakin a lungsim sungah, “Bang dinga nang’ phuak pah mawk lo?” cih ngaihsutna khat hong lut hi. A hizongin tua bang la a phuak dingin cing kisa lo ahih manin tua bang ngaihsutna kimangngilhbawl hi. Inn a tun ciangin a mai khing keiisa-a tung a zi in a muh ciangin a thu a la dong hi; Ama’n dawng mel lo hi. Tua kawmkal-ah hih la a taang masapen a mal ding a lungsimah suak denden hi. Minute 15 sungin a taang dangte zong a phuak khin hi pak ziau hi. Piano zuan phei-in a la-aw ding phuaka tu-a i saksak la-aw hi pah hi. A la-aw mahmah zong aw-mal khat khit aw-mal khat phul zangnzang lel-a, Pasian’ piak a hih lam thei a hih manin mal khat zong khel ngam lo hi.

Bessie in tua natna ni 10 bek do-a si mawk hi. Tua minthan ni-a vantungah min a kisap ding ngaka pai khol a hih lam phawk tek uh hi. A kivui ni-in hih la kisa-a, a kisak ma-in Mr. James Black in hih la a phuahna thu a cingin gen hi. Tua ni-a sigal mi khempeuh a lungsim uh vut mahmah hi. James Black’ ngaihsutna ah bel, “Pasian in Bessie hong laksaka, ama’ tangin tua minsap ni adinga i kiginkholh theih nadingin la dawng khat hong pia ahi ve maw!” ci hi.

1892 kumin Epworth League labu khat-ah hih la, “Vantungah Min Hong Sap Laitak” kihel hi. Tua labu a kikaihkhop laitakin Charles Gabriel in hih la hel kha lo dektaka ahih hangin Mr. James Black in laitui eng zanga a tei ladal in a mit la kha zenzen ahih mana a hel ahi hi. A genkikna ah, “Hih la phuakpa’ min lah ka zakzak min hi lo mawka, ahi zongin laitui eng zekzek-a kitei tua ladal pen a dangte lakah kilang mahmah hi. A lamalte ka et ciangin a kiphuak ngeingeite hi khol lo hi. Thu ka ngen-a, deih ka hih manin ka labu sungah ka hel hi. Tua banteng bel tangthu hi ta!” ci-in genkik ngei hi.

1905 kuma kikhen Methodist Hymnal a kibawlna-a sem dingin James Black zong kitel hi. Tua commission a kihel mite’ lakah James Black sim loh gospel laphuak dang kuamah om lo napi-in tua labu sungah ama’ phuah late khat beek kihel lo hi. Hih “Vantungah Min Hong Sap Laitak” banah la ngaih tampi mah phuak lai-a, “Where Jesus Is, ‘Tis Heaven There” leh “Look to the Lamb of God” late zong ama’ phuah mah ahi hi.

Hymn tawh kisai a kinte leh a theite in a gen theih uh mahbangin hih la pen a lamal ngaih lua zong hi lo hi. A la-aw mahmah ngaih lua, ci-a gen ding zong hi lo hi. Chord 4 khawng kilumlet den pong hi a, a rhythm mahmah zong cimtaak huai mai hi. Ahi zongin gospel la dangte mahbangin mi tampite a thakhauhsak, mailam hun ading lam-etna a guan la khat ahi hi. A tawpna ah hih bang late hong pia Pasian’ tungah lungdam i koh ding sim loh thu dang om lo hi.

Print Friendly, PDF & Email
Please follow and like us:

Added by

SHARE