Face to Face With Christ My Savior

(I Corinthians 13:12; I John 3:2,3)

Carrie E. Breck (1855-1934) Grant C. Tullar (1869-1950)

La kiphuak ngei lakah hih la a kiphuahzia tuampian simsim hi. Hih la-aw a phuakpa Grant Colfax Tullar pen jelly duh mahmah khat ahi hi. Khatvei, Rutherford, New Jersey Methodist Episcopal Church-a minister Rev. Charles L. Mead’ inn ah zintungin cialpi bawlkhawm uh hi. Ni khat, Rev. Mead-te nupa tawh pawlpi mite’ innah innvakna nei uh a, manlah uh ahih manin nitak-an gina huan man lo uh hi. Nitak-an ding a om bangbang a nek laitakun annek sabuai tunga jelly thawl sungah jelly tam a nawn loh lam a phawk kha kuamah om lo uh hi. A innteeknu in bel a jelly duh lam a theihsa ahi hi. Ama’n zong tua jelly a lawmte khaksawn-a, a kuamapeuh in a jelly duh lam thei uh ahih manin sang lo uh hi. A kisan khak ding a patauh gige lam zong thei uh hi. Tua ciangin ama’n, “Tua ahih leh a veka kei’ ading maw” (So this is all for me) ci-in ne pah hi. Tua kammal “a veka kei’ ading” (all for me) cih kammalte in a lungsim phawng lek-a, piano omna ah pai pah-in la dawng khat – a mal leh a aw – phuak pah hi.

All for me the Savior suffered,

All for me He bled and died.

Tullar in tua la “jelly la” ci-in minphuah-a, tua nitak cialpi hunah sa pah hi. Mipite’ tungah tua la a phuahzia zong gen hi. Tua la a phuah lai-in kinawh phuah heethaat lua pian ahih manin a mal pawlkhat laihkik ding ngaihsun hi. Ahi zongin a zingciang zingsangin laikhak pawlkhat ngah a, tuate’ lakah Mrs. Breck in a khak poem pawlkhat zong kihel hi. Tua peom-te a sim kawmin a zan nitaka a laphuah aw tawh kituak ding la a om kha hiam ci-in ngaihsun kawm hi. Tua poem-te lakah “jelly la” aw tawh kituak ding poem khat na om takpi a, a thulu “Face to Face” (Topa Tawh Maitang Kimu Ding) ahi hi. A kiphuahzia meter mal phazah kituak linlian ahih manin tua huna kipan tuni dong tua malal leh tua “jelly la” aw kigawmkhawm-a la ngaih mahmah dawng khat hong suak hi.

Hih lamalte a phuaknu Carrie E. Breck bel America gam Walden, Vermont ah January 22, 1855 ni-a suak ahi hi. A nuntak sung khempeuh a pasal leh a tanute nga tawh Portland, Oregon ah teng den uh hi. Mrs. Breck pen a nuntak sung tawntung Pasian’ tunga a ki-ap zo mahmah nupi khat leh Presbyterian pawlpi-a a kip mahmah ngiungeu khat ahi hi. Poem dawng 2,000 val phuaka, tuate’ lakah pawlkhat a aw kibulh-in hymn lamal suak hi. “When Love Shines In” leh “Help Somebody Today” cihte tua banga hymn lamal a suak Mrs. Breck’ phuah poem-te ahi hi. A manlah mahmah kawmkal-a a phuah vive hizaw a, pawlkhat bang a inn phiat kawm, pawlkhat bang a kuang sawp kawm-a a phuah ahi hi. La-aw bel phuak thei het lo a, ahi zongin rhythm bel thei-in music uk mahmah, kici hi.

Hih la aw a phuakpa Grant Colfax Tullar bel August 5, 1869 ni-in America gam Bolton, Connecticut ah suak hi. Kum nih a phakin a nu in sihsan hi. A neu lai-in a nuntakna haksa mahmah hi. Kum 19 a phak laitakin zu khama a omna panin Methodist camp khat-ah piangthak hi. A sawt lo-in lasak a vak lam kiphawka, organ tumin lasa-a, la-aw zong tampi phuak hi. Methodist pawlpi ah ordination kipia a, cialpi bawlna lamah a kipiak ma-in pawlpi khat-ah pastor sem ngei hi. Evangelist Sam Jones, Major George A. Hilton leh evangelist minthang dang tampi tawh kithuah hi. Isaac H. Meredith tawh kikopkhawmin Tullar-Meredith Publishing Company phuan uh a, tua lai-ah kum 30 val president sem hi. Pasian phatna labu tampi khenkhia-in hawmkhia uh hi.

Tua labute sungah ama’ phuah la tampi kihel-a, “Nailed to the Cross,” “Shall I Crucify my Savior?” a cih late minthang deuh hi. “I Would Be True” (Thumaan Ning – Xtian La No. 207) a kiphuahna ah a a la-aw phuakpa Joseph Yates Peek (1843-1911) in a la-aw a phuahna ah note bawlna leh a aw-kima bawlna (notating and harmonizing) ah panpih hi. Hih la, “Topa Tawh Maitang Kimu Ding” bel 1899 kuma Tullar-Meredith Publishing Company in a khet Sermons in Song, No. 2 sungah kihel pah hi.

Hih la, “Topa Tawh Maitang Kimu Ding” tawh kisai-in a zaknop thu tampi om-a, tuate lakah Sen (China) gama thupiang khat i sut ding hi. William Hart’ gelh Unfamiliar Stories of Familiar Hymns kici laibu sungah Sen gamah China Inland Mission board-te’ missioanry -a pai Rev. and Mrs. R. W. Porteous-te nupa in Sen mi gilote in a thah sawm laitak vua hih la a sakna uh na gen hi. Mual tung khat-ah kipaipihto a, mun khat a tun uh ciangin, “Hih lai mun hi ei” kici-in, a that ding pa in a kawng panin a namsau dokkhia hi. Tua missionary-te nupa in zong thah ding bek ngaka a om laitakun:

Topa tawh maitang kimu ding,

Nuam si’ng bang a ci zen tam!

En kaii-kaii ning, velvel mai ning,

Amah kei tanga si ngam

ci-in hih la nakpi-in sa uh hi. Amau’ kithah nading namsau kidok khin hi napi-in namsau-a a kibantan nadinguh thu kipia peuhmah lo-a lamdang sa lua mahmah uh hi. A that ding pa in namsau a liangah pua-a, Rev.& Mrs. Porteous-te nupa kikhahkik mawk hi. Shanghai-a a headquarter vuah nuam takin kiciahkiksak hi. A tunna peuh vuah ppna tawh la a sakna uh leh a sih phet vua a Honpa uh tawh kimu dingin kigingsa-a a omna uh teici pang pahpah uh hi.

Print Friendly, PDF & Email
Please follow and like us:

Added by

SHARE