Take My Life and Let It Be

(I Corinthians 10:31)

Frances R. Havergal (1836-1879) H.A. Cesar Malan (1787-1864)

Hih laphuaknu Frances R. Havergal pen “hymnody’s sweetest voice” kici a, England gam Astley, Worcestershire ah December 14, 1836 ni-in suak hi. Khat veivei “the consecration poet” (ki-apna la phuaknu) zong kici hi. Church of England pawlpi sunga minister Rev. William Henry Havergal’ tanu tumpen ahi hi. Hih siapa mahmah zong laphuahsiam church musician minthang khat ahi hi. Miss Havergal pen a pianpih siamna vaknate banah kampau lam leh music lamah limtak-a kipantah khat hi sawnsawn hi. Hebrew, Greek-a kipan tanglai kampau tuamtuamte banah Greman, French-a kipan pau nam tampi pau thei hi. Laibu hoih tampi zong gelh hi. Lasiam mahmah khat leh piano siam mahmah khat zong hi lai hi. Leitung nasep khatpeuh a deih hi leh ama’ pilna twh kituak-in olno tak-a a ngah ding ahi hi. Pilna sangpi aneih hangin a nuntak tawntung a Topa a um a muang mahmah khat ahi hi. Thu ngen masa lopi-in la gual khat zong gelh ngei lo kici hi. Kum 43 a phak ciangin si a, a nuntak tawntung mi siangthote’nuntak ding banga a nungta mi ahi hi.

Miss Havergal in ama’ pilna leh siamnate Pasian’ kiang pan a hihna leh Topa in a kop ahihna thei gige a, Ama’ nasepna beka zat den ding tup-in nei hi. Pasian phatna la a hih kei nak leh leitung la dang khatpeuh sa nuam ngei lo hi. Kha mangthang mat nading, misiangthote hanthot nading cihbang a hih kei nak leh leitung zawl-la peuh sa nuam ngei lo hi. Pasian upna leh zahtaakna taktak tawh nungta tawntung ahih manin amah zah-a Pasian’ lim a langsak, amah zah-a mite’ zahtak theih ding mi haksa ding hi, ci-in kiciamteh hi.

Hibanga Pasian a it leh a zahtaak mi khat’ nuntakna panin ki-apna Christian hymn tampi a omte laka a hoihpen-a kingaihsun hih la hong luankhiat pen lamdang lo phial zawzen kik hi.

1874 kum February kha sungin mihing sawm a omna inn khatah Miss Havergal ni nga sung leengla-in om kha hi. Tua mite lakah pawlkhat piangthak lo-in, a piangthak sunsun zong lungdam thei mel lo khat-in om uh hi, cih mu hi. Ama’ ciah ma-in ama’n Topa a theih bangin tua mite in zong thei-in, ama’ lungdam bangin amau zong a lungdam ding uh lunggulh mahmah hi. Tua banga a pian theih nadingin thu nakpi-in ngen-a, Pasian in zong a thungetna dawng lian hi. A ciahkhiat ding zan nitakin tua mihing 10 te lakah a piangthak lote piangthak uh a, a piangthaksate zong lungdam kipaakin om uh hi. Amah zong lungdam lua mahmah-in ihmu thei lo a, tua zanin hih la phuak-a, a tawpna ah, “Nang aa bek hi khin den ning” ci-in khum ngeu hi.

A thungetna, “Ka sum ka paii tang khin in, Neukha beek ong it kei ning” a cih pen a cih mawkmawk hi peuhmah lo hi. 1878 kum August kha-in a lawmte khat lai khak-a, “Topa in kal suanna neuno dangkhat hong laka, lungdam takin ka kalsuan hi. ‘Ka sum ka paii tang khin in, Neukha beek hong it kei ning’ ka cih pen tu-in ka neih vangil kizepna manpha khempeuh Church Missionary House ah ka piakna tawh ka tangtun khin hi. Ka suangmanpha bung sungah kumpipa tanu khat kizepkhop nading zah suangmanpha a dimin om-a, a vekpi-in mal 50 val pha hi. Tua van manphate tua zah-a lian lungdamna tawh a piakhia ngei dingin ka kingaihsun kei hi” ci-in gen zen hi.

England gamah Frances Havergal in Pasian phatna la ngaih tampi a phuah laitakin America gamah mit khua mu lo laphuaksiam Fanny Crosby in zong langaih tampi mah phuakin la dawng tampi tawh thu ummite’ nuntakna ah thupha tampi ngahsak hi. Amau tegel khatvei beek a kimuh ngei loh uh hangin khat leh khat thupi kisa tuak mahmah uh hi, kici hi.

A kum 42 a phak ciangin a siavuanpa in a a cidamna ginasa nawn het lo a, sawtpi nungta lo ding cih gen hi. Miss Havergal in, “Kei a pai takpi ding maw, a takpi dingin um ngam kei phial ingh, nuam lua ingh” ci hiauzen hi. A lupna khekhuantaw ah a muh dentheih nading munkhat ah, “Ama’ Tapa Zeisu Khazih sisan in i mawhna khempeuh hong sawpsiang hi” ci-in gelha suang den hi.

Hih la a aw a phuak Cesar Malan bel Switzerland gama the State Reformed Church ah ordained pastor khat ahi hi. Tua pawlpi a khanglawh loh luatna leh kha thu peuhmah a ngeina neih lua a, a awlmawh loh luatnate uanggen-in thuhilhna-in nei den ahih manin pawlpi pan kitawpsak hi. Tua hun-a kipan Switzerland gamah evangelical upna a khan nadingin nakpi-in hanciam hi. France, Belgium leh Great Britain gamte ah zin kawikawi-in lungdamna thu gen kawikawi hi. Lamal leh la-aw dawng 1000 val bang a phuah hangin “Hendon” kici hih la-aw a phuahna tawh minthang deuh hi. England gam London khuapi a St. Paul’s Cathedral pan nisuahna leilu lam a gamla khol lo mun khat-a om maul min khat kitamsak hi leh kilawm hi. Tua la-aw pen 1841 kum a Lowell Mason in a khet American labu sung khat-ah kihel hi.

Print Friendly, PDF & Email
Please follow and like us:

Added by

SHARE