Tell Me the Old, Old Story

(Sawltakte Tangthu 9:34)

Arabella Katherine Hankey (1834-1911) William H. Doane (1832-1916)

Evangelical Christian-te laka “Clapham Sect” a kicite’ laka khat ahi Arabella Katherine Hankey’ phuah ahi hi. (“Clapham Sect” i cih bel Clapham-a teng mihau Anglican Evangelical-te kilawhna min ahi hi. 1844 kuma kihawm Edinburg Review sunga article khat ah Sir James Stephen in tua mite lawhna-a a zat min kizang suaksuak ahi hi. “Clapham Sect” sungah mi minthang tampi oma, tuate’ lakah England gama sila neihna nakpia langpan William Wilberforce, bank nasepna lama minthang mahmah Henry Thornton, Clapham-a rector John Venn, East India Company-a director sem ngei Charles Grant, governor-general of India a sem ngei Lord Teignmouth, barrister minthang mahmah James Stephen, Evangelical makai minthang mahmah Zachary Macaulay, Parliament-a dissenting member William Smith-te kihel uh hi.ZKK)

1866 kumin in Miss Hankey in i Topa Zeisu’ nuntakna tawh kisai la dan-a kiphuak laibu khat gelh hi. Tua kum mah-in a pumpi dam het lo-a, i dam loh i hat loh laitakin kammal telnop nono tawh lai gelh lehang mi kim in telnopsa hi, ci-in phawk hi. Tua mah tawh kizui-in Eden Huan panin Bethlehem bawngkuang sung, tua pan i Topa leitungah a om lai-a a nasepnate gelhkhia hi. Tua laibu 1868 kumin kikhenkhia a, “The Old, Old Story” cih thulu tawh kihawmkhia hi. Khen nih kisuah-a, a masa lamteng “The Story Wanted” kici a, 1867 kumin kikhen hi. Tu-a la-a i sak pen hi pah hi. A nunung lamteng “The Story Told” ci-in kikhenkhia leuleu hi. Tua laibu kideih mahmah-a, kampau tuamtuamin kitei hi.

1867 kumin Canada gam Montreal-a kibawl leitung buppi YMCA kikhopna ah William H. Doane zong kihel hi. Tua kihkopna ah Mangkang galkapmang minthang mahmah Major-General Russell in Miss Hankey’ phuah poem a masa lamteng simkhia hi. A sim kawmkawmin a khitui tolh datdat-a, tua kikhopna sunga kihel mi peuhmah khitui luang lo om lo hi. Pasian’ hong itna a thakin phawk tek uh hi.

Kikhop man ciangin William Doane in tua ladal dal khat ngen pahlian hi. Tua zawh nipikal bangzah hiamkhat khit ciangin White Mountains lam manawh-in sakol leeng tuangin Glens Falls, New York pan William Doane dingkhia hi. Lampi ah tua Miss Hankey’ phuah poem sim kik hi. Tua la a sim kawmin Canada gam kikhopna-a Mangkang galkap mangpa’ thugennate ngaihsun kik hi. A tupna mun a tun ma-in a la-aw ding a phuak khin hi ziau leuleu a, la ngaih mahmah khat hong piangkhia hi. Nitak ciangin a lawmte tawh tua la thak sa uh-a, a kisak masaknapen ahi hi.

Kum khat khit ciangin Moody-Sankey cialpite-a choir makai church musician minthang mahmah William G. Fisher in Miss Hankey’ la a nunung taang li teng a aw phuaka “A Thu Ka Gengen Nuam Hi” (I Love to Tell the Story) kici la ngaih mahmah khat hong piangkhia leuleu hi.

Hih lamal phuaknu Arabella Katherine Hankey bel England gama banker hau mahmah khat’ tanu hi a, 1834 kumin suak hi. A nu leh a pate Anglican pawlpi sunga kilang mahmah mite a hih uh hangin Evangelical lam pawlzaw den uh hi. A pa pen Anglican pawlpi leh England gam a thuzawh zo mahmah Clapham Sect-a member khat ahi hi. A neutunga kipan mah-in “Kate” ci a kisam Katherine zong a pa mahbangin evangelical lam mah-a pang den ahi hi. London khua sunga mizawng mihau a kuamapeuh adingin Sunday school phuan kawikawi-a, lawhcing mahmah hi. Tua Sunday school pana khangkhia khangno tampite hunbut-a Pasian’ nasem suak uh hi. Laibu zong tampi mah gelh-a, Bible Class Teaching kici Anglican pawlpi sunga confirmation tawh kisai laibu leh la dana kiphuak lai tampi gelh hi. Tua laibute a kizuakna pana kingah sum peuhmah gamdang mission nasepna-in kizang den hi. Kum 30 pha panin dam lohna lianpi thuaka, damdam-a a noptuam ciangin a tunga i gen Topa Zeisu’ nuntakna tawh kisai laibu a gelh ahi hi.

Hih “Tangthu Hong Gen In” la a aw a phuak William H. Doane bel America gam Preston, Connecticut ah February 3, 1832 ni-in suak hi. Mihau mahmah khat hi a, factory president khat ahi hi. A om ngei nai lo van-zat thak 70 phuankhia hi, kici hi. Music lam a uk mahmah hangin nasep-a nei bel hi lo hi. Tua hun lai-a gospel musician minthang mahmah khat hi veve hi. A nuntak sung buppi Mount Auburn Baptist Church of Cincinnati, Ohio ah pawlpi mi-in om den-a, kum tampi sung Sunday School superintendent leh choir leader sem hi.

A la-aw a phuah gospel la dawng 2,000 val hi. Hih la “Tangthu Hong Gen In” (Tell Me the Old, Old Story) banah, “A Sia Ding Honkhia In” (Rescue the Perishing), “Hong Paisan Ke’n Migi Topa”(Pass Me Not, O Gentle Savior), “Nang A Hi’ng, Topa”(Draw Me Nearer), “Singlamteh Kiang”(Near the Cross), “Pasian’ Min Pha Ta Hen”(To God Be the Glory), “Zeisu Min Manpha Na La In” (Take the Name of Jesus) cihte kihel a, a tamzaw-in Fanny Crosby’ laphuahte a aw phuahsak denzaw hi.

Print Friendly, PDF & Email
Please follow and like us:

Added by

SHARE