Faith of Our Fathers

(Late 22:4)

Frederick W. Faber (1814-1863) Henri F. Hemy (1818-1888)

Adapted by James G. Walton (1821-1905)

Hebrews 11 sungah upna pa tampite’ thu kimu hi. Pasian a upna hang vua a nuntakna uh a pia velvel upna pate’ thute i sim ciangin hong lawpsak-a hong hangsak hi. Thuciam Thak a kigelh cil hun-a kipan upna thu a hutna uh hanga a nuntakna uh a na pia mi tampi na om khin hi. Tangthu siamte’ genna ah i Topa’ kikhailup hun-a kipanin upna hanga thahna a thuak mi a kigawmin awn 50 peuhmah pha khin ding hi, ci uh hi. Tuhun, mite pil khin a kicih hun nangawnin, upna hanga bawlsiatna leh bawlsiatna gentaak loh thahna nangawn a thuak mi tampi om lai hi.

Hih la a kisak simin Hebrews 12:1,2 a, “hih zah taka a tam teci meiipite in hong um ahi ciangin” a cih misiangthote etteh-in i “mai-a kiciamtehsa tai kidemna” sikdo taka i tai ding hong phawksak den hi. Christian upna tangthu ah nuntakna sangin Pasian upna a thupisakzaw mi tampite’ gou a luah i hih lam i phawk den ding hoih hi. 1st century hun lai-a thu um mite leh Roman Catholic pawlpite’ bawlsiatnate, Louis XIV hun lai France-a bawlsiatna thuak Huguenots-te, a hih kei leh biakna lam bawlsiatna a thuak mite in suahtakna lunggulh-a gamthak a satna pan un America kici gam thupi mahmah khat hong piankhiatnate zong gengen theih ahi hi.

Ahi zongin hih “Tanglai Pate’ Upna” la sunga kigen tanglai pate leh a upna bilbel uh bel 16th century lai-a thahna a thuak Roman Catholic makaite leh a upna uh a kigenna ahi hi. Hih lamalte a phuakpa Frederick William Faber pen England gam Calverley, Yorkshire ah June 28, 1814 ni-in suak hi. A pa Pasian’ nasem khat hi a, Calivinism upna ah khauhtak-a kipantah khat ahi hi. 1843 kum, Oxford University ah pilna a sinna a zawh ciangin Elton, England-a Anglican pawlpi neu khat ah minister-in om hi.

A khangno lai-in Roman Catholic upna leh ngeinate nakpi-in langpan hi. Ahi zongin tua hun laitak pen Oxford Movement ahih kei leh Tractarian Movement in Anglican pawlpi nakpi-a a nawk laitak hi a, Wesley-te unau in mimal pianthakna uanggen-a lai nangawn a thei lo mipite in san nop a sak mahmah laitakin, laithei mipil zawdeuh-a kinei Oxford Movement makaite in pawlpi ngeina tuamtuamte (liturgical and ceremonial church services) tungtawnin biakna maan taktak kinei thei hi, ci-in gen uh hi. 1833-1850 hun sungtengin Oxford Movement in England gam biakna kalsuanzia zo mahmah a, Anglican Church makai tampite Roman Catholic pawlpi ah lut uh a, pawlkhatte in Anglo-Catholics a kici khat phuan helzen uh hi.

Faber zong a nasep kipat cil lamin Oxford Movement in zo sim mahmah hi. Anglican Church minister a sep zawh kum thum khit ciangin Roman Catholic pawlpi ah lut hi.A sawt lo-in Father Wilfrid cih min ngah pah hi. Roman Catholic pawlpi ah a lut khit a sawt lo-in tua pawlpi sungah mipi la kisam mahmah cih mukhia hi. Anglican pawlpi sung, a diakdiakin a evangelical lam deuhte ah mipi laksakna bangzah in thupi cih thei ahih manin Catholic pawlpi tangthu leh upna a khangsak ding la phuah ding tup lianpenin nei pah hi. Kum 49 pha a a sih ma-in tua bang la dawng 150 phuak takpi hi. Tua banga a hanciamnate pahtawina-in Pope in Doctor of Divinity Degree pia hi.

Faber in Great Britain gamah Henry VIII in kumpi a sep laitak, Anglican Church a kiphuat cil lai-a thahna a thuak a makaite uh a kiphawkkik nadinga hih “Tanglai Pate’ Upna” a phuah ahi hi. Hih lamalte 1849 kuma Faber’ kaihkhop Jesus and Mary: or Catholic Hymns for Singing and Reading labu sungah kihel hi. Ni khat ni ciangin England gam buppi Roman Catholic suakkik ding cih Faber’ lam-etna ahi hi. Tuhun-a kisa “Tanglai Pate’ Upna” la sunga kihel lo, a phuah cilna sunga taang khat bangah hibangin gen hi:

Faith of our fathers! Mary’s prayers

Shall win our country back to thee;

And through the truth that comes from God,

England shall then indeed be free.

Faith of our fathers, holy faith!

We would be true to Thee till death.

“St. Catherine’s Tune” kici hih la-aw bel Roman Catholic laphuaksiam minthang Henri Hemy’ phuah ahi hi. Amah England gam Castle-Upon-Tyne ah November 12, 1818 ni-in suak hi. Tynemouth-a pawlpi ah a kizahtaak mahmah organist leh la-aw phuaksiam ahi hi. 1864 kumin a kideih mahmah Catholic Hymnal, Crown of Jesus kaikhawmin khenkhia hi. Hih la-aw bel “St. Catherine, Virgin and Martyr” kici Catholic a,4th century hun lai-a thahna a thuak Catherine of Alexander pahtawina-a a phuah ahi hi. 1874 kuma a khet Plain Song Music for the Holy Communion Office kici labu sungah “Faith of our fathers, holy faith, we will be true to Thee till death”a cih teng James G. Walton in a behlap ahi hi.

Print Friendly, PDF & Email
Please follow and like us:

Added by

SHARE