Si-a Khut Guak Masuan Ding Maw?
Must I Go-and Empty-handed?

(Daniel 12:3)

Charles C. Luther (1847-1924) George C. Stebbins (1846-1945)

1877 kumin Evangelist A.G. Upham in America gam New England kual-a Rev. Charles C. Luther in pastor a sepna pawlpi khat-ah cialpi bawl ngelhngelh hi. Tua cialpi kipat ni-in Rev. Upham in ni bangzah hiamkhat sung thu kigen dingte’ thulu genkhol hi. Tua hun lai-a zatzia bangmah-in a masa lamteng piangthaksa thu ummite’ ading thuhilhna nei hi. A deihna taktak-ah a piangthaksa thu ummite Pasian tawh a kalsuan maan-a thu um nai lote’ tungah teci panga kikhopna sungah mi a kaihkhop theih nadinguh ahi hi. A muibun mahmah zatzia khat ahi hi.

Tua bang thuhilhna a kineih laitak nitak khat, Evangelist Upham in a thuhilhna thulu dingin, “Na Kumpi Lukhu Ading Aksi,” ahih kei leh “Khamangthangte’ Tunga Teci Panna A Thupina” cih thulu teel hi. A thuhilhna sungah gentehna khat gena, a pianthak khit kha khat pha pana tuahsiatna khat tungtawna si dinga om tangval khat thu, thupiang takpi khat gen hi. A natna nasia semsem-a, nungta lo mai ding cih a kitel semsem ciangin a piangthak mahmah a lawmte khat in sih ding a lau hiam cih dong hi. Ama’n dawngkika, “Lawm aw, Zeisu in hong hon khin ahih manin sih ding peuhmah kihta ke’ng. Ahih hangin piangthaka Amah ka theih khit kei bangmah-a mawhnei mi khat beek Ama’ kiang ka tut zawh loh zawzen! Sih ding bel lau ke’ng; ahi zongin pai taktak leng – khut guak masuan-a pai takpi ding ka hih zawzen!” ci-in thum ngaungau hi.

Tua thuhilhna, a diakdiakin tua tangvalpa’ tangthu in Rev. Charles C. Luther’ lungsim sukha lua mahmah-a la dawng khat phuak hi. Rev. Upham in thu a gengen laitak mah-in a Laisiangtho sunga laidal khat tungah hih lamalte gelhkhia samsam hi. Khawl het lo-in gelh hi. Ngaihsut kul vet lo-in a lungsim sungah phul zuahzuah lel hi. Providence, Rhode Island-ah cialpi bawla om George C. Stebbins kiangah a tangthu a cingin gena a phuahsa hih la khak hi. George Stebbins in a la-aw ding phuaka, “Ka la-aw phuahsa khempeuh lakah a ol-penpen pawl hi” ci-in genkik hi.

Hih la-aw phuakpa George C. Stebbins pen American gospel music a mi minthang mahmah khat hi a, February 26, 1846 ni-in Canada gam Orleans County, Ontario ah suak hi. Orleans County pen tuizeu minthang mahmah Niagara Falls pan nisuahna leilu lam tai 50 pawla om ahi hi. Kum 23 a phak ciangin America gam Chicago ah lalsukin Lyon and Healy Music Company ah nasem hi. 1874 kumin Boston ah kisuanin Clarendon Street Baptist Church ah music director sem hi.

1876 kumin amah tawh nasemkhawm dingin D.L.Moody in sam a, kum 25 sung Moody leh Sankey-a kipan evangelist minthang George F. Pentecost leh Major D.W. Whittle-te tawh kithuah-in la makai, choir director, la-aw phuak, gospel la kaikhawma a khenkhiapa cih bangin om hi. 1876 kumin Philip P. Bliss a sih vat mawk ciangin tua hun laitaka a labu khetna ah Ira D. Sankey panpih uh a, George C. Stebbins leh James Mcgranahan-te’ [anpihna tungtawnin Sankey in Gospel Hymns, bu thumna, bu lina, bu ngana leh bu guknate khenkhia zo hi.

La minthang tampite a la-aw ama’ phuah hi a, hih la, “Si-a Khut Guak Masuan Ding Maw?” (Must I Go-and Empty-handed?), banah, “Siantho Nang Hun Zang In” (Take Time to Be Holy), “Kei’ Dahna Khualmial, Koltanna Pan” (Jesus, I come), “There Is a Green Hill Far Away” (Khuapi Umna Kulh Pua Lam – Xtian La No.101), “Ye Must Be Born Again” (Nih Vei Na Suak Kik In – Xtian La No. 464), “Savior, Breathe an Evening Blessing” (Topa aw, Ka Ihmut Ma-in – Xtian La No. 34), “Saved by Grace” cih late kihel hi.

1924 kuma a khet ama’ tangthu leh a khan lai-a thute a gelhna Memoirs and Remeniscences kici laibu tungtawnin George C. Stebbins’ thu cing takin kithei thei hi. Pasian’ piaksa nuntakna man nei takin zanga, a kum 91 a phak laitak, October 6, 1945 ni-in Catskill, New York ah si hi.

Print Friendly, PDF & Email
Please follow and like us:

Added by

SHARE