Doxology

(Late 100)

Thomas Ken (1637-1711) Louis Bourgeois (c.1510-1561)

A beisa kum 300 sung gual li bek a pha hih “Phatna La” sanga kisa munzaw la om lo ding hi. Tuni dongin kisasa-a kisasa lai ding hi. Theology bu khempeuh kigawm sangin hih “Phatna la” dawng khat bekbek in Trinity upna hilhcian zaw hi kici hi. “The Protestant Te Deum Laudamus” kici zawzen hi.

Hih la a phuakpa pen 17th century lai-a hi a sakte “hi”, hi a sak lohte “hi lo” ci ngam lah lo-a hangtaka thugen den Anglican Bishop Thomas Ken ahi hi. England gam Little Berkhampstead ah 1637 kumin suak hi. A neutungin a nu leh a pate in sihsan-a tagah-in khangkhia hi. Winchester School ah sangkah a, tua lai-ah a unu leh a unu’ pasal, tua hun-a tangthu (history) siam-a minthang Izaak Walton-te in kem uh hi. Tua panin Oxford University ah pilna sina 1662 kumin Church of England sungah ordination kipia hi. Buaina pawlkhat leh lawhcin mahmahna pawlkhat thuahkhawmin nasem hi. Ordination a ngah khit ciangin Bishop of Winchester ading chaplain sem hi. 1679 kumin Hague-a kumpi-inn ah English chaplain sem dingin Holland kipaisak hi. Dutch khuapi-a thunei mite’ siatna genkhia ngam lua ahih manin a kumkik ciangin kiciahkiksak hi.

England gam a tunkik ciangin Kumpi Charles II in ama’ chaplain khat-in koih leuleu hi. Kumpipa’ mawhnate kawkin ko ngam mahmah zel hi. Ahi zongin Kumpi Charles in tua banga a hanna thupisa mahmah zawsop bilbel hi. “My good little man” ci-in minphuah a, chapel hun a tun ciangin, “Ken in ka khialhna bangteng a gen tam thu ka va ngaih loh phamawh in cei” ci den hi. A tawpna ah Kumpipa in Bath leh Wells gamteng uk dingin bishop-in koih hi.

Bishop a suah zawh ni 12 pha panin a lawmpa Kumpi Charles II si mawk hi. A sawt lo-in kumpi thak King James II in “the Royal Declaration of Indulgence” simkhia dinga a sawl ciangin ut lo ahih manin kumpipa hehsak pahlian a, Anglican Church makai dang 6 tawh Tower of London ah thong kikhum hi. A mawhna pan kipengsak a, ahih hangin kumpi kah thak William III in a bishop hihna pan lakhia hi. A nuntakna nunung lamteng a lawm it mahmah Lord Weymouth inn, Longleat, Wiltshire ah om a, tua lai ah 1711 kum, ama’ kum 74 a phak ciangin si hi.

Bishop Ken in la dawng tampi phuaka pawlpi sungah tua hun lai-a kizang Psalmody leh Bible canticles te bek sasa lo a, thu um mite in Pasian a phat nop bang vua a phat dinguh a lunggulh den mi khat ahi hi. Laisiangtho sunga Late bek ahi lo biakna la a phuak masa pawl ahi hi.

1673 kumin Thomas Ken in A Manual of Prayers for the Use of the Scholars of Winchester College kici laibu khat gelh hi. Tua laibu sungah Bishop Ken in sangnaupangte in nisim-a a sak dingua a deih la dawng 3 hel hi. Tua late “Morning Hymn,” “Evening Hymn,” “Midnight Hymn” kici late ahi hi. Tua la khempeuh tu-a i sak den “Phatna La” tawh kikhum den hi. Bishop Ken in hih late a phuah khit ciangin zingsang simin a devotion lak ciangin “Morning Hymn” sa dena tamngai tum kawm hi, kici hi.

Hih la-aw pen “Old Hundredth” kici a, Christian hymn la-aw khempeuh lakah a mingthangpen ahi hi. France gam Paris ah 1510 kum pawla suak Louis Bourgeois in a phuah ahih kei leh a kiphuaksa a lak hi ding hi, kici hi. 1541 kumin Switzerland gam Geneva ah kisuan-a, tua lai-ah John Calvin nung zui-a Reformed Reformation Movement ah nakpi-in kihel hi. 1562 kuma kikhen Geneva Psalter a kikhetkhiat zawh nadingin nakpi-in pang hi.

Hih la-aw bel French pau a Late 134 tawh sak dinga kiphuak ahi hi. Anglo-Genevan Psalter ah 1551 kumin kihel khin hi. Hih la-aw tawh a kibulh masapen Mangla pen William Kethe’ phuah Late 100 kiphuak, “All People That on Earth Dwell” hi a, tua hang mah in hih la-aw min “The Hundredth” kici hi. 1696 kumin Tate leh Brady-te in a kaihkhop uh New Version a khetkhiat uh ciangin hih la-aw a kizang ngeisa ahihna a lah nadingun “Old” cih kammal tawh lak uh a, tua huna kipan “Old Hundredth” a kici ahi hi. a khetkhiat uh

Print Friendly, PDF & Email
Please follow and like us:

Added by

SHARE