The Church’s One Foundation

(Ephesians 5:23)

Samuel J. Stone (1839-1900) Samuel S. Wesley (1810-1876)

Pawlpi tangthu a kin mi peuhmah in a pian cil-a kipan tuni ciang dong pawlpi in bawlsiatna leh suksiat nopna tuamtuam thuak niloh hi, cih thu thei hamtang ding hi. Prostestant pawlpite diakdiak in October 31, 1517 ni-a Martin Luther in Cathedral of Wittenberg ah “ninety-five theses” a suan ni peuhmah mangngilh theih ding hi lo hi. Tua “ninety-five theses” sungah tua hun lai-a pawlpite’ upna leh kalsuan ziate a maan lohna kawkkhia-a pawlpite’ ngaihsut theih dingin pulaak hi. Tua zahkhat-in tua hun ma leh tua hun khit tuni ciang dong mah pawlpi a susia nuam mite’ hanciamna panin Pasian’ mizat tampite in pawlpi keemin hu den uh hi.

Hih la a kiphuahna zong tua bang thu hang mah ahi hi. Church of England pastor Samuel J. Stone in 1866 kuma a phuah ahi hi. Tua hun laitakin Anglican pawlpi sungah tua ma kum 3 lai-a kigelh laibu khat tawh kisai-in buaina lianpi om hi. Anglican pawlpi sunga bishop khat mah ahi John William Colenso in Moses’ gelh Laisiangtho bu ngate (Piancilna pan Thuhilhkikna dong) maan taktak lo ding hi ci-in The Penteteuch and the Book of Joshua, Critically Examined a kici laibu khat gelh hi. Anglican pawlpi sunga bishop khat mah ahi Bishop Gray in a langah nakpi-in gen hi. A sawt lo-in tua makai nihte’ kinialnate Anglican pawlpi sung buppi ah hong kizel hi.

Hih thu in Samuel Stone’ lungsim vut mahmah a, 1866 kumin Lyra Fidelium (“Lyra of the Faithful) kici labu khat bawl-a, tua sungah “Apostles’ Creed” (Sawltakpite’ Upna Pulaakna) bulphuh-a kiphuak la dawng 12 kihel hi. Upna peeng in a sawt lo-in pawlpi phelkhap kha dinghi cih ngaihsun-a ‘Apostles’ Creed’ bulphuh-in tua upna peeng nakpi langpan hi. Hih la pen tua creed sunga taang giatna ahi, “The Holy Catholic (Universal) Church; the Communion of Saints; He is the Head of the Body” a cihna mun tak bulphuh-a kiphuak ahi hi. Pawlpi kipumkhat nadingin a lutang ahi Zeisu Khazih Topa in nei-a, mihingte’ Laisiangtho khiatzia tuamtuam tungah kingak ding hi lo hi, ci-in Stone kiptak-in um hi.

A sawt lo-in Great Britain buppi ah hih la kideih mahmah pah hi. Kampau tuamtuamin kitei-a, Latin pau nangawnin kiteikhia hi. Tua zawh kum nih khit ciangin upna thugilte kikum dingin Anglican bishopte London ah kikhawm uh a, Lambeth Conference kici hi. Tangthu-a minthang mahmah tua kikhopna sungah Stone’ phuah hih la, lapi-in kinei hi. La ngaih tampi a phuakpa a hihna tawh minthang mahmah a, ama’ phuah late tampi kikhen pahpha zawzen hi. Ama’ phuah la peuhmah a kigawmin bu 7 pha a, 1909 kuma kikhen a minthang mahmah Anglican hymnal Hymns Ancient and Modern labu a kibawl lai-in commitee ah kihel hi. La tampi a phuah hangin tuni donga kisa la hih bek mah om mai hi.

Semuel John Stone pen England gam Whitmore, Staffordshire ah 1839 kumin suak hi. Oxford University pan sang a zawh ciangin pastor sem-a, a nuntak sungin London-a pawlpi nih bekbekah sem den hi. Tua lai-ah “mizawngte’ siapa” ci-in itna tawh kisam hi. London khuapi East End a mizawngte leh mi gentheite’ lakah nasem-a, “tua mite’ lakah kikhop nading mun nuam mahmah khat bawlsakin khuamial lakah khuavak tangsak hi” ci-in kiciamteh hi. Ama’ nuntakna pen kawk bang lo-a a siangtho mahmah khat hi a, a tasamte leh a thanemte hehpih den hi. Ahi zongin a upna kiptakin len tinten-a, upna maan lo peuhmah hangsan takin do vilvel hi. Tua hun lai-a kipan laang dinga kipan Laisiangtho up lohna Higher Criticism leh revolutionary philosophies-te peuhmah themkha beek mang lo hi. Pasian’ humuap Laisiangtho a upna ama’ adingin kicing hi. A laigelhte peuhmah “pasal cingtaak khat’ upna tawh khauhtak-a kigen thu, thuhilhna, thungetna, leh phatnate siamtak-a kiheekkhawm” hi ci-in kiciamteh hi.

Stone in hih la a phuah cil lai-in taang 7 pha hi. Tuhun ciangin tua taang 7 te lakah taang khatna, tang nihna, leh taang nganate bek kisa a, tuhun a kisa taang a nunungpen bel Stone’ phuah la taang gukna leh taang sagihna a gual masa 4 te kigawmkhawm ahi hi. Tu huna kisa nawn lo a taang thumna zong lunglut huai peuhmah hi.

The Church shall never perish! Her dear Lord to defend,

To guide, sustain and cherish, is with her to the end;

Though there be those that hate her, and false sons in her pale

Against the foe or traitor she ever shall prevail.

Hih la a aw a phuak bel Samuel S. Wesley hi a, England gam London khuapi ah August 14, 1810 ni-a suak ahi hi. Charles Wesley’ tupa hi a, ama’ hun lai-in church musician minthangpen khat ahi hi. Kum 29 pha panin Oxford University pan Doctorate in Music degree ngah hi. La-aw tampi phuak hi. “Aurelia” kici hih la-aw bel Latin kama “kham” cihna “Aureus” pana kila ahi hi. “Jeresalem the Golden” (Kham Khuapi Jerusalem) kici la adinga kiphuak la-aw ahi hi. 1868 kumin Lambeth Conference ah Stone’ phuah lamal tawh kibulh hi.

Print Friendly, PDF & Email
Please follow and like us:

Added by

SHARE