The Love of God

(Jeremiah 31:3)

Frederick M. Lehman (1868-1953) Frederick M. Lehman (1868-1953)

Mun khempeuh-a a kideih mahmah hih la pen Germany gamah 11th century lai-a kiphuak Jewish poem khat tungtawna kiphuak ahi hi. Hih la a phuakpa Frederick M. Lehman in 1948 kumin laihawm sung khatah hih la “Pasian’ Hong Itna” a kiphuahna thu a nuai-abangin gelh ngei hi.

Tua hun ma kum 50 lai pawl, a nasep kipat cil lamin, America gam nitumna laizang pawlah, evangelist khat in a thuhilhna hih la taang nunung pen tawh khum hi. Ngaih mahmah-in thuk mahmah ahih manin kiciamteh tek hi. Lehman in zong ciamteh hi.

“California lam tungin hun-awng tawmkhat a ngah ciangin tua la taang thumna tawh kisakhawm dingin a taang dang nihte leh a sakkik phuak hi. Tampaza tui thawl koihna singkuang hawm khat tungah laidal them khat tunga a gelh ahi hi.

A taang thumna pen Jew-te laphuaksiam khat-in tuma kum 1,000 lai-a a phuah hi a, Gentile laphuaksiam F. M. Leman in 1917 kuma a lai ciaptehna sunga a kep ahi hi.

Hih la a Jewish la-in Hadamut kici a, gual nih ta a pha lavui 90 pha hi. Acrostic (ABC malte khiatna nei-in kigual-a kiphuakte) a kiphuak hi a, a phuakpa’ min mahmah a khupna lamah kihel hi. 1096 kuma Rabbi Mayer in a phuah ahi hi. Amah Germany gam Worms a Jew-te’ kikhopna-a la makai Isaac Nehorai’ tapa ahi hi.

Tua poem pen khen nih kisuah thei hi. A masa lamah Pasian pen leitung ukpa, vantung mite a kipan na khempeuh a piangsak Pa ahihna a kiphatna kimu thei hi. Israel mite Pasian’ teeltuam mite ahihna zong tua la sungah kihel hi. A khen nihna ah Pasian’ teeltuam Israel mite leh mi nam dangte a kinialna kimu thei a, Pasian’min a siantho nadingin hih mite in a khang a khangin bawlsiatna thuakin, thahna nangawn a thuakna uh na gen hi. Jew-te in amau’ biakna nusia-in mi namdangte tawh kibanga a om nadingun mi namdangte in a hanciamna uh zong kigelh hi. Ahi zongin Israel mite in hih leitungah muhdahna leh suksiatna a thuak uh hangin hong tung ding leitungah amaute’ Pasian in Ama’ minthan nadinga a teelsa minamte a hihna uh laktel ding hi, cih a upna hangin tua bang mi nam dangte’ hanciamnate a man lohna uh zong kimu thei hi.

Tua Hadamut sungah hih la phuakpa in a gen nalamdang khat zong kimu thei hi. Tua na lamdang tawh kisai-in ngaihsutna nam thum bang om hi. A masa-in tua na lamdang pen Thukham Sawm kipiakna a gen nuam hi ding hi, ci-a ngaihsun pawlkhat om hi. Tua hang mahin Shavuot Pawi (Nipikal Pawi, Paisan Pawi pan nipi kal sagih) ni masa ni-in Thukham Sawm a kisim ma-in hih la kisim den hi. Ngaihsutna a nihna ah bel, tua nalamdang pen bang hiam cih lian kithei lo hi, ci-a ngiahsutna ahi hi. A thumna ah, Worms khua-a piang na lamdang hi ding hi, ci-a ngaihsutna ahi hi. German priest khat in Jew-te’ siat nading gen hi. Kumpipa in tua pa’ thugenna langah amau leh amau a kihuut theih nadingun taangmi khat a teel nadingun Jew-te sawl hi. Tua Jew-te’ taangmipa a gualzawh leh a minam bupun kithat lo ding hi, ci-in thupia hi. Jew-te’ langa thugen pa a gualzawh leh Worms khua-a Jew khempeuh kithatmang ding hi, ci-in thupia hi. Jew-te’tell taangmipa gualzo bilbel-a Worms-a Jew-te in thahna thuak lo uh hi.

Hih Jewish poem sung buppi ah Ama’mite’ tunga Pasian in a neih tawntung itna leh lunghihmawhna kilang mahmah hi.

Tuipi khempeuh laitui hi-in,

Vantung khempeuh laidal hi leh,

Singkung khempeuh laikung hi leh

Pasian hong itna gelhsak leng,

Tuipi hong bei ding hi,

Vantung dimin i gelh zongin

Kicing zo lo ding hi

Frederick Martin Lehman pen Nazarene pawlpi kem sia hi a, a khantawn-in Indiana leh Illinois state-te ah nasem hi. 1911 kumin Kansas khua ah kituah-a, tua lai-ah Nazarene Publishing House phuan hi. 1953 kumin Pasadena, California ah si hi. A khan sungin poem tampi phuaka, Songs That Are Different kici labu volume 5 khenkhia hi. 1919 kuma a khet volume nihna ah hih “Pasian’ Hong Itna” la kihel hi. A thu a aw a cinga a gual taktak bel Lehman’ tanu, Claudia (Mrs. W. W. Mays) ahi hi. Nazarene Publishing House ah tawlpi khat sung secretary sem ngei hi.

Hih la “Pasian’ Hong Itna” pen a beisa kum tampi lai-a kipan gospel musician peuhmah in nakpi-a a zat uh la khat ahi hi. Tuni dongin labu kici tengah kihel kawikawi hi.

Print Friendly, PDF & Email
Please follow and like us:

Added by

SHARE