Cleanse Me

(Late 139:23,24)

J. Edwin Orr (1912-?) Maori melody

Arranged by Norman Johnson (1928-1983)

Hih la a phuakpa J. Edwin Orr pen evangelist minthang mahmah khat hi a, tua banah khanlawhna tangthu kan-a laibu tampi a gelh mipil mahmah khat ahi hi. America gam Los Angeles, California a om Oxford Association for Research in Revival or Evangelical Awakening kici kipawlna ah president sem hi. Leitung gam khempeuh phial pana pawlpi makai tampite’ kipawlna hi a, 1974 kuma kipan England gam Oxford-a kibawl kum sim-a kikhopna pana piangkhia kipawlna ahi hi. Evangelical Awakening kici kha khanlawhna tawh kisai thu kan-a kaihkhopna ahi hi. Leitung mun tuamtuam ah hih thu mah genin lecture pia kawikawi-a, kikupkhopna workshop bawl kawikawi hi. Dr. Orr in laibu minthang tampi gelh-a, Mangkam bek hi lo-in leitunga kampau tuamtuamin kiteikhia hi. 1930 kumte in a kikhawngpen best-seller bu khat gelh ngei hi. 1970 kumte in sanga sin theih ding textbook khat-ta kum simin gelh den hi. 1967 kuma kipanin Fuller Theological Seminary School of World Mission ah professor sem-a, a nunung lam ciangin professor emeritus sem hi. Tua lai ah missionary sem dingte tungah leitung mission tangthu hilh a, theologians-te’ tungah evangelistic apologetics hilh hi.

James Edwin Orr bel January 12, 1912 ni-in a pa American, a nu Bristish nu leh pate’ sung panin Ireland gam Belfast khua-a suak ahi hi. Pilna sinna sangpi takin nei-a Europe, Asia, Africa, leh America gama university tampi panin sin teekteeka a ngah doctorate degree tampi nei hi. Engalnd gam Oxford Univeristy panin Ph.D degree la a, America gama university minthangpen khat ahi University of California in Los Angeles (UCLA) panin Ed. D degree la hi. 1943-46 sung Pacific Tuipi-a United Sates Air Force ah chaplain (galkapte’ pastor ci mai ni) sem ngei hi. Galpi ven ciangin America gam California ah teng den hi. Dr. Orr pen khualzin mahmah mi khat hi a, leitung gam 150 pha ngei hi. Leitunga khuapi lian 600 te’ lakah 2/3, khuapi 400 val pha ngei hi.

A khan sungin Pasian’ ading a sep tampi a om hangin hih “Ong Sit Tel In” cih la ngaih a phuakpa ahihna tawh kiphawk denzaw ding hi. Sak nuam mahmah-a, i lungsim sukha-in Pasian’ ading i nuntak nop nadinga ong “to” den la khat ahi hi. Dr. Orr in hih la 1936 kuma a phuah ahi hi. New Zealand gam Ngaruawahia khua ah Thawhkik Ni Easter hun laitakin Khasiangtho in nakpi-in na sem hi. Easter a tun ma deuh teng mite’ lakah lawpna lianpi khat om hi. Khua sung mun khempeuh ah thunget kikhop kinei phangphanga, mawhna pulaakin khat leh khat mawhna kimaisak, a kilem lote kilemkik cih bangin Khasiangtho nasep ding lam-enin ngaklah-in om uh hi. Easter Sunday kikhopna ah mi tam lua a, zankim-a kikhop nading khat geel pha uh hi. A piangthak nai lo sangnaupang tampite piangthak ziahziah uh hi. A zing ciangin kikhopna khempeuh teci panna bekbekin kizanga “vantungah zong tua ci ngel inteh” cih ding zah-in lasakna khempeuh nuam lua mahmah hi. Tua kha khanlawhna kizel-a New Zealnad gam Wellington, Christchurch, Dunedin leh Aukland khuate zong lawh hi.

New Zealand gam pan Dr. Orr a ciahkhiat ding ciangin tua gam a minam khat ahi Aborigine minam nungakno li in mangpha khakna la Maori pau-in sak uh hi.

Po atu rau, I moe a i ho ne; E haere ana, Koe ki pa ma mao;

Haere ra, Ma hara mai ano Ki-ite tau, I tangi atu nei

ci-in amau’ kampau-in mangpha khak uh hi. Dr. Orr in tua Polynesian la-aw ngaihsa lua mahmah a, tua la tawh kituak dingin hih lamalte Ngaruawahia khua lai-to (post office) ah lai-ip nung khat-a a gelhkhiat ahi hi. Hih lamalte New Zealand gam cialpi leh kha khanlawhna hanga kiphuak ahih hangin Late 139:23,24 pana kila ahi hi:

Pasian aw kei hong pheklek inla,

ka lungsim thei in;

Hong zia-et inla

ka lunghihmawhnate thei in.

Ka sungah langbawlna lampi

khatpeuh a om kha hiam cih mu inla,

tawntung lampi ah kei hong kha in.(ZIV)

1930 kumte-in Australia gam leh tua khit cianga Mangkam kipauna mun khempeuh-a Dr. Orr’ cialpite ah hih la kisa den ahih manin leitung buppi ah kizel hi. 1952 kum Brazil cialpi mahmah ah zong Pasian in Portugese kama kitei hih la a kisakna zangin kha khanlawhna tungsak hi.

Hih “Moari” la-aw bel “Now Is the Hour” kici leitung la-a zong a kisa la-aw khat ahi hi. Leitung Galpi Nihna hun lai leh 1950 kumte-a minthang mahmah la khat ahi hi.

Dr. Orr in, “Laisiangtho sunga kha khanlawhna kici peuhmah Pasian’ nasep ahi hi” ci-in gen mun mahmah hi. “Lawpna thak hong guan lo ding na hi hiam? (Late 85:6, kei’ own translation). “Na nasepna hong tawhkuangkik in, Topa aw!” (Habakkuk 3:2, kei’ own translation).

Print Friendly, PDF & Email
Please follow and like us:

Added by

SHARE