O Love That Will Not Let Me Go

(Jeremiah 31:3)

George Matheson (1842-1906) Albert L. Peace (1844-1912)

19th century nunung lama kiphuak late lakah a kideihpen la khat ahi hi. A phuakpa a mit-in khua a mu kiuhkeuh lo mit khua mu lo pastor khat hi a, lungsim gimna nakpi-a a thuakna tungtawna kiphuak ahi hi.

Glasgow, Scotland ah March 27, 1842 ni-a suak George Matheson pen a neu tunga kipan a mit hat het lo khat ahi hi. Glasgow University ah pilna sina, a mit hoih lo semsem-a, kum 18 a phak ciangin a mit a taw kiuhkeuh hi mai ta hi. A mit a tawt hangin a university sangkahna zo veve a, Seminary of the Church of Scotland ah zong kah-a sangpi takin ong laimawk hi. 1886 kumin Edinburg a om pawlpi mi 2,000 a pha St. Bernard’s Parish Church ah pastor suak hi. Scotland gam buppi-a thugensiampen pastor-te’ lakah khat-in minthanga Edinburg ah kizahtaak mahmah hi. A thugen ngai dingin mipi tampipi kikhawm den hi.

George Matheson in zi nei ngei lo hi. A sanggamnu in kema, ama’ nasep a huh theih nadingin Greek, Hebrew, Latin kamte sin ngiat hi. George Matheson in hih la a phuahna thu hih bangin gen ngei hi: “Hih la pen June 6, 1882 ni-a ka tenna Innellan sia-inn-a ka phuah ahi hi. Tua ni pen ka naunu’ pasal neih ni hi a, ka innkuanpihte khempeuh Glasgow ah taam suak uh hi. Ka tungah kei bek in ka theih na khat hong pianga, ka lungsim hong gik lua mahmah hi. Tua bang lunggimna ka thuakna panin hih la hong gahkhia hi. Ka nuntak sung buppi-a ka laigelh lakah a manlaangpen ahi hi. Kei’ phuah zong hi lo-in ka sung pan aw khat in hong gen bangbanga a gelh bang lel-in ka kingaihsun hi. Minute 5 sungin a la dawng buppi ka zawh bel ka tel mahmah hi. Puahkik zuunkik kul vet lo hi. Kei’ pianpih in rhythm siam ka hi kei hi. Ka la phuah dangte hanciam-a ka gelh phatphat hi a, hih la bel van pana hong kia tawh kibang hi. Tua bangin khatvei beek la ka phuak thei nawn kei hi.”

George Matheson in hih bang la a phuahna ahi zongin, tua banga lungsim gimna a thuakna a hi zongin ngaihsutna tampi om a, ama’ nuntakna-a thupiang khat hang hi ding hi, ci-in ki-um tek hi. Nidangin lawmngaih nei ngei a, kiteen ding dongmah ngim uh hi. Engagement (zuthawl i ci mai tam maw) nangawn a man khin uh hi napi-in a mit hong siat semsem ciangin a lawmnu a hehpih manin a lawmnu tawh kikhen ding hong ngaihsun hi. A lawmnu kiangah, “Kei lah ka mit sia semsema, a sawt lo-in taw ding ahih teh, mittaw khat’ zi a na khantawn na om ding hong deih ke’ng, kikhen mai ni” a cih teh a lawmnu in mang pah mawkin a engagement khutbuh suahkhia in pia kik ziau hi. Amah mah in zong kikhen lel ding a ngaihsutsa a ahih hangin nasa lua mahmah hi. Mihingte’ ki-it kingaihna i cih hi bang hi tazena, “ong khahsuah ngei lo ding itna” bel Pasian’ itna bek mah om ei, cih hong tel mahmah hi. Pasian’ itna i cih “phal hun” cih bang hong nei ngei lo a, hong lencip tinten ding itna hi bek-a, cih hong phawk saan hi. Tua banga a lungsim a nasak mahmah thu a tuahkhakna tungtawna hih la a phuah hi, ci-in ki-um tek hi. [Hih la leh tua a lawmngaihna thu kisai kha kei, tua huna pawlpi sunga buaina a piangsaksak ta Charles Darwin’ phuahtawh ‘evolutionism’ tawh kisai a lunghihmawhna hanga a phuah hizaw hi, a ci pawl zong om hi. Gentehna-in, Edward E. White, Singing With Understanding (Warburton, Victoria, Australia: Signs Publishing Company, nd), 113.]

Matheson in a nuntakna a nunung lamin Mangkama kigelh ngei devotional lai laka hoihpen laibu pawlkhat gelh hi. Moments on the Mount, Voice of the Spirit, Rests by the River cihte ahi hi. A la phuahte lakah hih la bek phialmah a kitheipen hi a, ahi zongin la dawng tam simsim phuak hi. “Make Me a Captive Lord, and Then I Shall Be Free” a cih zong ama’ phuah mah ahi hi.

Hih la a aw a phuakpa bel tua hun lai-a organ tumsiam-a minthang Albert L. Peace ahi hi. Matheson in a mal a phuah zawh kum khat cianga a aw kiphuak ahi hi. Scottish Hymnal Comittee in George Matheson’ phuah la tawh kituak ding la-aw a phuah nadingin a tuam vilvel-in ngen uh hi. Peace in a genna ah, “Hih la a malte limtaka ka sim khit ciangin a aw ka phuaksuk ziaupah hi. A taw ka tunin a khung lama te a laitui nangawn keu man nai lo ding hi” ci zawzen hi.

Print Friendly, PDF & Email
Please follow and like us:

Added by

SHARE