Break Thou the Bread of Life

(Matthew 14:19)

Mary Artemisia Lathbury (1841-1913) William Fisk Sherwin (1826-1888)

Alexander Groves (1842-1909)

Chautauqua Literary and Scientific Circle a phuante’ lakah Bishop John H. Vincent (1832-1920) zong kihel hi. 1874 kuma Lewis Miller tawh kopkhawma a phuat uh ahi hi. New York State sung Finger Lake mun-a Lake Chautauqua a cihna muna Methodist camp-meeting bawlna mun-a kinei den kikhopna ahi hi. Bishop Vincent in Sunday School nasepna thupisa mahmah ahih manin khuakhal sung Sunday school sia/siamahte kipattah nading ngaihsutna-a a phuatkhiat ahi hi. 1878 kuma kipan Chautauqua Literary and Scientific Circle in literature leh science laibu tuamtuam vaihawmsak-a kum simin July leh August kha sungin kikhopna nei den uh hi. Tua lai-ah lecture tuamtuam leh pawi lahna tuamtuam zong om den hi. Tua lai-a home study course-te New York University in accreditation pia hi. Tua laite a sin peuhmah nipikal khat-in khatvei mun khat-ah kimukhawm uh-a, thu kikupnana nei khawm uh hi. Lawhcing lua mahmah ahih manin tua banga pilna sinna lam kimuhkhopna peuhmah ‘chautauqua’ kici hel hi.

Tua lai-a kikhopna pen pilna lam khantoh nading bek ngaihsutna hi lo-a, kha lam mahmah ah phattuamna a om nading tupna ahih mahbangin Bishop Vincent in Miss Mary Artemisia Lathbury’ kiangah tua lai-a kikhawm mite’ ading Laisiangtho sinna tawh kisai la dawng khat a phuah nadingin ngen hi. Miss Lathbury in zong Matthew 14:19 sung a, “Tua ciangin mipite lopa tungah tusak uh hi. Tua anlum nga le ngasa tegel la a, vantung lam ento in, lungdam a koh khit ciangin anlumte a balkham hi. Tua ciangin nungzuite pia a, nungzuite in mipite lakah a hawm uh hi” (ZIV) a cihna mun bulphuh-in taang nih a pha la dawng khat phuak takpi hi. A tang tegel, a paizia kibang hi: (1) Anlumte na balkhap bangin khomun hong balkham in, (2) Khomun thupha na piak bangin na Thu thupha pia in. Thungetna la ngaih mahmah dawng khat hong suak hi.

Mary A. Lathbury bel America gam Manchester, New York-ah August 10, 1841 ni-a suak hi a, a nu leh a pate Methodist pawlpi sunga mi thupite ahi uh hi. A pa leh a sanggam pasal nihte ordained pastor vive ahi uh hi. Bishop Vincent tawh kop-a Chautauqua kikhopna a phuante’ lakah hih la phuaknu Mary Lathbury zong kihel hi. Tawlkhat sung sangsia a sep hangin a nunung lam ciangin biakna nasep bek sem zaw hi. Tua taang nihte banah ah mi tuamtuam in behlap uh a, tu-a i sak taang thumna leh taang linate Alexander Groves in a behlap ahi hi. Groves’ phuah late lakah “Day Is Dying in the West” (Tung Sun Ni A Tum Ta A – Xtian La No. 30) zong kihel hi.

“Bread of Life” kici hih la-aw bel William Fisk Sherwin in 1877 kum khuakhal sunga a phuah ahi hi. Sherwin bel Baptist pawlpi mi khat hi a, Lowell Mason’ khut nuai ah music pilna sin hi. Aw-a kisa music hilh sia khat suak hi. Sunday school nasepna lunglut mahhmah a, Sunday school-a sak ding la-aw ngaih dawng tampi phuak hi. Choir lasakna ah makai hoih mahmah khat hi a, pianpih siamna leh lungsim khempeuh pia-a sepna tawh makaih den hi. Hih bang siamna leh vakna a neih man mah-in Chautauqua Literary and Scientific Circle in makai dingin teel-a, kum sima kikhopnate ah music director leh chorus director-in om den hi. “Galdona Awng Un” (Sound the Battle Cry), “Ngai In! Ka Kha Aw!” (Hark! Hark! My Soul!), “Day Is Dying in the West” (Tung Sun Ni A Tum Ta A – Xtian La No. 30), “Worship the Lord in the Beauty of Holiness” cih late zong a aw leh pawlkhatte a mal tawh a phuah ahi hi.

Print Friendly, PDF & Email
Please follow and like us:

Added by

SHARE