Sweet By and By

(John 14:2,3)

Sanford F. Bennett (1836-1898) Joseph P. Webster (1819-1875)

Thu-ummi tampite a dah a kah huna hehnepna lianpi a pia late lakah hih la zong la ngaihpen khat ahi hi. 1868 kuma Joseph P. Webster in a kaihkhop The Signet Ring, a New Collection of Music and Hymns, Composed for Sabbath Schools kici labu sungah a kihel-a kipan leitung buppi ah a kideihpen la khat-in om den hi.

American Civil War (Tualgal) ven ciangin Elkhorn, Wisconsin ah hih laphuakpa Sanford Bennett ciahkik hi. Tua lai-ah zatui zuak-in om a, a zatui zuak kawmin siavuan sin hi. Hih la a aw a phuakpa Joseph Webster bel a khua sung vua music siam-a minthang khat ahi hi. Hih tegel lawmta hi a, Bennett’ zatui zuakna ah kituah-in thucin thutang genkhawm zel uh hi.

Musician dangte mahbangin Webster zong lungsim ngek mahmah khat hi a, khat veivei lungkia diipdeep thei hi. Na khempeuh lungkiat nadingin ngaihsun pongmawk thei hi. Bennett in bel a lawmpa’ omzia tel lua mahmah a, a kimuh simun a lawmpa lungkia a om maw, ahih kei leh lungzuansuah gawp maw cih encik-a, a tua cih ciangin a lungsim a khauh nading a phuahsa la thak khatpeuh pia-in a la-aw ding phuaksak zel hi.

Phalbi sung nitak khat, a lenuai-ah violin khat tep kawmsa-in Bennett’ omna ah Webster hong pai hi. Tua laitak Bennett sabuai ah tu-a lai khat a gelhgelh laitak ahi hi. A lawmpa’ lamah kiheii-in, “Bang vai om ahia?” ci-a a dot leh, “Bangmah hi kei e, nung ciangin hong hoihhoih lel inteh” cihsan hi. Bennett in tua kammalte a zak ciangin, “Nung ciangin a nopna! Tu-a pen la-in phuak leng e?” a cih leh Webster in, “Hoih kha mah inteh”cihsan lel hi. Bennett sabuai lamah kiheii-in, a manla’n theihtawpa manlangin gelh pah ngelhngelh hi. Tua lamalte a lawmpa Webster pia phei hi. Webster in tua lamalte en a, sabuai lamah kiheii-in, a aw ding phuak pah hi. A violin la a, a phuahsateng a tum khit ciangin a sakkik ding phuak hi. Tua lamalte gelh dinga Bennett in a laikung a lak a kipan a lawmta vua tua la a sak dong uh minute 30 sawt lo ding hi, ci uh hi.

Sanford Fillmore Bennett pen a nuntakna a namkim mahmah khat ahi hi. June 21, 1836 ni-in America gam Eden, New York ah suak-a, June 12, 1898 ni-in Richmond, Indiana ah si hi. Methodist revival kikhopna khat ah piangthak hi. University of Michigan ah pilna sin a, Richmond, Illinois ah school superintendent sem hi. Elkhorn, Wisconsin ah kituah-a, nipikal sima kihawm The Independent ah associate editor sem hi. Civil War sungin Fortieth Wisconsin Volunteers (galkap) sungah second lieutenant za ciang ngah hi. Gal ven ciangin Elkhorn ah ciahkik a, zatui zuak kawmin Rush Medical College-ah siavuan sin hi. 1874 kumin a sangkahna zo a, kum 22 sung siavuan sem hi. Dr. Bennett in a khan sungin lai tampi gelh-in la tam simsim phuak hi. Tuni donga kisa la cih theih dingin hih “Nung Ciangin A Nopna” bek mah om mai hi.

Joseph Philbrick Webster pen ama’ hun lai-in music siam-a minthang ahi hi. Boston, Massachusetts ah Lowell Mason tawh sangkah khawm uh hi. Kum tampi sung New York leh Connecticut ah music hilh-a concert zong bawl kawm hi. Sila deih lo lua pawl ahih manin gal pian ma-in Elkhorn, Wisconsin ah lal hi. A music phuah pongpong 1,000 val a, Sunday School Hymnal The Signet Ring a kaikhawmpa ahi hi. 1868 kumin tua labu sungah hih la, “Nung Ciangin A Nopna” zong hel hi. Kum 56 a phak laitak, January 18, 1875 ni-in si hi.

Wisconsin state-a Elkhorn khua a pai peuhmah 9th century lai-a kilam Webster’ tenna inn-ah hawh thei lai a, hih la a kiphuah cil lai-a a tum violin zong en thei ding hi.

Print Friendly, PDF & Email
Please follow and like us:

Added by

SHARE