Thanks to God!

(Ephesians 5:20)

August Ludvig Storm (1862-1914) John Alfred Hultman (1861-1942)
Tranlated ito English by Arranger: Norman E. Johnson (1928-1983)

Carl E. Backstrom (1901-?)

Hih la zong Sweden gam pan leitung buppi-a kizel la khat ahi hi. A malte in i nisim nuntakna hong lak deuh-a, a aw pen a sak nuam folk music nam ahih manin leitunga minam khempeuh in deih mahmah uh hi. Tunai-a evangelical labute-a ong kihel Swedish late lakah hih la, “Nuam Lua ing, Ka Honpa Hang” zong khat ahi hi. A dang Swedish late lakah “Day by Day,” “He the Pearly Gates Will Open,” “More Secure Is No One Ever” cihte kihel hi.

Hih la a phuakpa August Ludvig Storm pen 1862 kum October kha-a Sweden gam Motala-a suak ahih hangin Stockholm khuapi ah tengzaw hi. A neu lai mah-in Salvation Army kikhopna khat ah piangthak hi. Salvation Army sungah lut a, a maikai officer khat-in om hi. Hih la mahmah zong Sweden gama Salvation Army-te’ laihawm Stridsropet (The War Cry) sunga hel dinga December 5, 1891 ni-a a phuah ahi hi. A Swedish pau-a a kiphuahcilna ah taang 4 pha a, a taang patna khempeuh tack (thanks, “lungdam”) cih kammal tawh kipan hi. “Lungdam” cih kammal 32 vei om hi. Pasian’ tunga a lungdam kohnate’ lakah “tuukhun” a kipan “khuakhalhun” dong, “natna” a kipan “nopna” dong, “lingpakte” a kipan “lingte” dongin huamkim hi. 1910 kumin J. A. Hultman in ama’ phuah la-aw tawh na bulh-a, Solskenssonger laihawm sungah a hel-a kipan Sweden gam leh America gamte ah hong minthanga, leitung buppi ah hong kizel hi.

Kum 37 a phak-in August Storm in nungnatna khat ngah kha a, tua natna hangin a khantawnin poilawh hi. Lam nangawn pai thei lo-a a om hangin a sih dongin Salvation Army mah ah sem suak hi. July 1, 1914 ni-in si a, a sih ma kum khat lai-in a nuntak sunga nop hun leh dah hun, dam hun leh nat hunte hangin Pasian’ tungah lungdam kohna poem khat phuak lai hi.

Hih la a aw a phuak John Alfred Hultman bel Sweden gamah July 6, 1861 ni-a suak ahi hi. August 7, 1942 ni-in America gam California ah si hi. A neu lai-in a innkuanun Sweden gam pan America gamah lal uh a Iowa ah teng uh hi. A neutunga kipanin music lam a vakna leh a aw mahmah pha-a la a siamna kilang pah hi. Kum 60 sung Sweden leh America gam kawmin kileh kawikawi-a ama’ siam bangin gospel la sa den hi. A paina mun khempeuh ah mipi khawm zo den hi. A la sak zia leh a maitaii den ama’ nuntak zia hangin “Sunshine Singer” kici hi.

Hultman bel lasiam khat cih bang bek hi lo hi. Mission Covenant Pawlpite ah pastor sem, Chicago, Illinois a North Park College ah zong laihilh, pawlpi sungah organist-in zong om ngei, piano zong tampi bawl ngei, la dawng 500 val a aw phuak, la dawng tampi kaikhawm-in labu tampi khenkhia, cih bangin nasep nam tampi a sem ngei khat ahi hi. Kum 81 a phak laitakin Burbank, California a Covenant Church ah lasa-a, tua lai ah si hi.

Hih la Mangkama a teipa Carl Ernest Backstrom zong pastor mah hi a, Evangelical Mission Covenant pawlpi ah pastor sem hi. Nebraska, Iowa leh Ohio state-te ah sem kawikawi hi. Hih la, Covenant Hymnal sunga hel dinga a teikhiat hi a, 1931 kuma kikhen ahi hi. Swedish pau a taang thumna a nusiat hangin tua sunga thute a taang dangte ah hel veve hi.

Arrangment a bawlpa Norman E. Johnson bel Singspiration Publishing Company tawh nasemkhawm den khat hi a, Evangelical Covenant pawlpi ah music director sem ngei hi. “Not What These Hands Have Done” kici la zong a aw ama’ phuah ahi hi.

Print Friendly, PDF & Email
Please follow and like us:

Added by

SHARE