Hark! The Herald Angels Sing

(Luke 2:14)

Charles Wesley (1707-1788) Felix Mendelssoln (1809-1847)

Altered by George Whitefield (1714-1770)

Hih “Ngai Un! Vantung Mi’n Lasa” la ngaih zong Charles Wesley’ phuah la dawng 6,500 laka khat ahi hi. 1738 kum, Aldersgate-a a pianthak khit kum khat khawng cianga a phuah hi dingin ki-um hi. Hih la leh “Hong It Zeisu Topa Aw” cih late, Charles Wesley’ phuah late’ lakah a ngaihpen-a kingaihsun ahi hi. Hymn lamsang a siam-a minthang John Julian’ genna bangah bel Mangkama kiphuak la khempeuh laka kideihpen dawng 4 tengkhia lehang hih la zong khat-in kihel ding hi, ci hi. Leitung buppi ah Christmas hun cianga kisa lapi “classic” suak takpi hi. Hih lamalte 1739 kuma kikhen Hymns and Sacred Poems sungah kihel pah hi.

A phuah cil lai-in gual li ta a pha tang sawm-a kiphuak la ahi hi. A Mangkam mahmah zong tuhun-a Mangkam tawh kibang lo a, a taang masa bangah, “Hark, how all the welkin (“heaven”- “sky” a cihna tanglai kammal) rings, Glory to the King of Kings” cih bangin na om hi. George Whitefield’ bawl Collection of 1753 sungah tu-a i sak danin na kikhel hi. A kikhelsuk a kikheltoh hangin Charles Wesley’ phuah mah hi a, a kilamdanna bel om lo sam hi.

Charles Wesley’ phuah la dangte mahbangin hih la mahmah zong Laisiangtho thugilpi (doctrine) la-in kiphuaka a kitomlak ahi hi. A taang masa ah vantungmite in a suakthak Kumpipa’ thu tuucingte’ kianga a taangkona uh a gen khit ciangin tua Zeisu Khazih nungak siangtho sung pana a suahna, Pasian taktak ahihna, kha a kici peuhmah a sih theih lohna, suahthakna, Khazih tawh kibanga nuntak ding lunggulhna cihte kimu thei hi.

Charles Wesley’ phuah late lakah, “Hong It Zeisu Topa Aw”( Jesus, Lover of My Soul), “Mi Tulsawm’ Aw Nei Zen Leng” (O for a Thousand Tongues), “A Charge to Keep,” “Depth of Mercy,” “Christ the Lord is Risen Today,” cihte minthang mahmah hi.

Hih la-aw “Mendelssohn” pen 19th century bul lama la-aw phuaksiam-a minthang Felix Mendelssohn’ phuah ahi hi. Amah Germany gam Hamburg ah February 3, 1809 ni-in Jewish-Christian innkuan sunga piang ahi hi. November 4, 1847 ni-in Germany gam Leipzig ah si hi. Amah Jew-te hi- a, a hih hangin piangthak Christian ahi hi. Kum 9 a phakin mipite’ mai-ah a piano siamna lak khin ta hi. Music tum siam leh conductor siam bek hi lo a, a nuntakna a tom mahmah sung tawntung la-aw tampi mah phuak man hi. Symphony tampi, chamber music tampi, concertos tampi phuaka, organ, piano-a tum ding music zong tampi phuak hi. Mihing’ aw mahmah-a sak ding vocal music zong tampi phuak hi. Tuni donga kideih mahmah bel a oratorio phuah Elijah ahi hi. August 26, 1846 ni-in kisa kituma, a kisak a kitum masaknapen ahi hi.

Hih la-aw “Mendelssohn” bel 1840 kuma a phuah German kama Festgesang, opus 68 pana kila ahi hi. Lai khetna a kibawl theih zawh kum 400 cinna phawkna-a a phuah ahi hi. Hih la-aw leh hih lamalte kigawma la dawng khat a suaksak taktak bel Mangkangte musician leh scholar minthang Wiiliam H. Cummings hi-a, 1857 kuma Richard Chope in a khet Congregational Hymn and Tune Book sungah kihel masapen hi. Hih la tawh sakkhop dingin la-aw tuamtuam a kibulh kawikawi hangin hih “Mendelssohn” la-aw mah tawh kituakpen hi.

Print Friendly, PDF & Email
Please follow and like us:

Added by

SHARE