Nearer My God to Thee!

(Piancilna 28:10-22)

Sarah F. Adams (1805-1848) Lowell Mason (1792-1872)

Hih la a phuaknu Sarah F. Adams hi a, numei laphuakte’ lakah la ngaihpen khat a phuak-a kiciamteh ahi hi. England gam Harlow ah February 22, 1805 ni-in suak hi. Kum 43 a phakin si hi. A nuntak hun a tom hangin man nei takin zang hi. Tawl khat sung London ah “Lady Macbeth” ciingin stage tungah limlak hi. A dam loh den luatna hangin a tup bangin na a sep theih loh hangin laigelhna lamah zong min ngah mahmah hi. 1834 kumin civil engineer leh inventor minthang John Brydges Adams tawh kiteng uh hi. A teen zawh uh kum 14 sung, Sarah sih ciangdong London ah teng uh hi. Amah a theikha mi peuhmah in Sarah’ a melhoihna, na a vak a siamna, a it huaina leh a nuntak zia a hoihnate hangin zahtaakin it mahmah uh hi.

Sarah’ sanggamnu Eliza zong music va mahmah khat mah ahi hi. Sarah’ phuah late tampi a aw ding phuahsak den hi. Ni khat, a pastorpa uh (a upna unitarian hi zawlai!) Rev. William Johnson Fox in a pawlpi mite’ adinga a kaihkhop labu thak a bawlna ah a huh nadingun huhna ngen hi. Tua unau tegel in zong a pastorpa uh nakpi-in panpih uh a, lamal thak dawng 13 leh la-aw thak dawng 62 phuak uh hi.

Hih la bel a inn leh a sanggampa Esau’ kiang pana taimang Jacob in gamsunga a mangmatna bulphuh-a kiphuak ahi hi. Vantungmi a suktuah tawh a tokah tawh a muhna tua a mangmatna pan a khanlawh ciangin Jacob in tua mun “Bethel” (Pasian’ Inn) ci-in min phuah hi. Ni khat, tua unaute leh a siapa un a labu bawl uh a ma hial dingin kithawi ta uh hi. Siapa in Piancilna 28:10-22 sung bulphuh-a gen a sawm a sermon khup nading tua bang la khat om leh a lunggulhna gen kha laizang hi. Eliza in, “Sarah, i hymnal sunga hel ding la thulu hoih mahmah khat ngah cei, bang dia nangma’n Jacob’ mangmatna la-in phuak lo na hia?” ci-in hanthawn hi.

“Hoih ngel ei!” pastorpa’n zong thukimpih-in hanthawn hi. Tua ni nitak lamin Piancilna sunga Jaocb tangthu sim phapha a a kiim le a paama thu omziate a lungngaihngaih khit ciangin Sarah in taang 5 a pha hih la hong phuakkhia a, tuni dongin kisasa lai hi.

Hih la sungah Zeisu Khazih thu leh a nasepte khatbeek kihel lo ahih manin pawlkhat bangin mawhsak nuam pian uh hi. Sarah a nuntak sung tawntung phial unitarian pawlpi bekah om phial hi. Tua hang mah-in hih la pen evangelical suah pha lo hi ding hi. Ahi zongin hih la mun khempeuh ah kideih mahmah a, labu kici khempeuh ah kihel kimin, kampau kici peuhmah-in kitei kim mai hi. Sarah a sih kuanin piangthaka London-a Baptist pawlpi khatah lut hi, ci-in kigen hi.

1841 kuma kikhen hymnal thak khat sungah hih la kihel pah hi. Tua labu Hymns and Anthems kici a, London a Pastor Fox’pawlpi Unitarian Congregation-a zat dinga kibawl hi deuh hi. Kum thum khit ciang, 1844 kumin hih la America gam tung hi. Ahi zongin tu-a i sakna la-aw “Bethany” tawh a kibulh mateng kum 12 sung kideih khol lo mai hi.

Hih la-aw “Bethany” pen Lowell Mason’ phuah hi a, amah bel January 8, 1792 ni-in America gam Medfield, Massachusetts ah suak hi. A khangno lai-in Savannah, Georgia ah tenga, 1827 kumin Boston ah kisuan-a, tua lai-ah a ten sungin Boston School of Music phuan hi. Boston-a sangte ah music a kisin nadingin a phuangkhiapa ahi hi.

Tua khit ciangin Europe gam lamah zin-a laihilhzia sin hi. America a tunkik ciangin music kikhoppite vaikhawma mite in paakta-in mi zo mahmah hi. 1851 kumin New York City ah kituah a, tua lai-ah hymn leh la tampi kaikhawmin khenkhia hi. La-aw dawng 700 val phuak hi, ci-in kiciamteh a, tuate lakah hih la, “Nang Tawh Naizaw Nuam Ing” (Nearer My God to Thee) banah, “Vanglian Kumpipa Hong Sihna” (When I Survey the Wondrous Cross), “Vuuk Paakna Gam Mual Panin” (From Greenland’s Icy Mountain), cihte kihel hi. “Leitung Lungdam Topa Hong Pai” (Joy To the World) la a gualpa (arranger) zong hi lai hi, a aw bel George F. Handel’ (1685-1759) phuah hi, kici hi. 1855 kumin New York University in Doctor of Music degree pia a, America gama sang khatpeuh in tua bang degree a piak masaknapen ahi hi.

Hih la a kizatna tawh kisai a theihnop huai thu tam simsim hi. 1871 kumin America gam pan theologian minthang mahmah Professor Hitchcock, Professor Smith leh Professor Park-te Palestine ah zin uh hi. Mun khat a tun uh ciangin hih la kisa za uh a, a va naih uh leh, singkung nuai khat-a Syrian sangnaupang pawlkhat khut kilena a beem vilvial-a ding kawma hih la sa mu uh hi. A nung ciangin Professor Hitchcock in tua banga Syrian khangnote in tua la a sak uh a muh ciangin a khitui luanga la kisa a zak ngei lakah a lungsim sukhapen hi, ci-in genkik hi.

May 21, 1889 ni, Johnson City tuikhangin a tup laitakin meileeng khat tuihual sungah kiasuk hi. A meileeng kilumlet-a suahtak theih nading om nawn lo hi. Tua meileeng sungah Nisuahna lam peka missionary pai dinga kithawi numei khat om hi. Tua nu in suahtak nading lam-et a om lo tua mite’ tungah thu tawm a gen khit ciangin thungenin hih la mah sa hi. Midangte in zong huh uh a, a pua lam-a om mite in hehpih lua mahmah uh a, a cih nading uh lah thei tuan lo-in kap ziahziah uh hi. Tua nu-a kipan tua meileng sunga tuang piangthak mi peuhmah in hih la sa kawmsa-in Pasian’ kiang zuan uh hi.

Leitunga gam makai tampite in zong hih la deih uh hi. Mi’ suam-a si American President William Mckinley in a sih dongin hih la sa a, a aw nangawn suak lo ahih manin aw-heu thialthial-in a husan tawp dongin hih la sa hi, kici hi. 1901 kumin ama’ kivui hun leh amah phawkna hun khempeuh ah hih la mah kisa den hi, ci-in kiciamteh hi. 1912 kumin Atlantic tuipi sungah mi 1500 val tawh Titanic tembawpi a tumsuk ding laitakin tembaw band-te in hih la mah sa uh hi.

A unitarian suah pian hangin hih la Pasian in zang mahmah a mi tampite’ tungah hehnepna leh thupha a tun nadingin na zang hi. Mihing tate in Pasian tawh kinai-a gualzawhna a ngah dinguh a lunggulh tawntungna uh hong lak hi.

Print Friendly, PDF & Email
Please follow and like us:

Added by

SHARE