I Need Thee Every Hour

(John 15:5)

Annie S. Hawks (1835-1918) Robert Lowry (1826-1899)

Sakkik – Robert Lowry (1826-1899)

Hih la a phuaknu Annie Hawks in hih la a phuahna thu hih bangin gen hi. “Tuma kum tampi ka kum 37 ka phak lai, zingsang khat ka innsung nasepteng tawh anbukah buai lua mahmah-a ka om laitakin Pasian in kei hong ompihna ka phawk phasan hi. 1872 kum June kha sung ahi hi. ‘Mi khatpeuh a nop hun a dah hun-in Amah lo-in bangci nuntak thei peuhmah ding hiam?’ ci-a ka ngaihsutsut laitakin hih lamalte ka lungsim sungah hong phul zangzang hi. Hih lamalte bekbek in ka ngaihsutna khempeuh hong ukcip hi. ‘Nang kong deih tawntung hi, nuam leng dah leng….’ Hih ngaihsutna leh kammalte bek ka lungsimah om hi.

“Tawlet (padenpauh) gei-ah ka tusuk hi. Ka laikung la-in hih lamalte laidal tungah ka gelhkhia ngelhngelh hi. Tu-a a kisasa bangmah hi phial hi. Tua zawh a sawt lo-in ka pastorpa Rev. Robert Lowry in a aw hong phuahsaka, a sakkik zong hong phuahsak hi. Tua thuteng khempeuh a piang ziaupong banga ka ngaihsut hangin, tu-in bel Pasian’ khut in na sem taktak ahihna ka mu thei hi. Tua lai pan Nitumna lamah kizel-in, kei’ kiang hong tunkik ciangin mi tul tampi-in sa khinzo ta uh a, ka lungdam lua mahmah hi” ci-in gen hi.

Cincinnati, Ohio a National Baptist Sunday School Association Convention khat ah tua kum mah-in kisa hi. A kisak masaknapen ahi hi. A kum kik, 1873 kum ciangin Robert Lowry leh William H. Doane-te in amau’ bawl The Royal Diadem kici labu sungah hel uh a, a thulu dingin,”Without Me Ye Can Do Nothing” (Kei Lo-in Bangmah Na Hih Thei Kei Uh Hi) ci-in John 15:5 bulphuh-in neisak uh hi. Great Britain gama Moody-Sankey campaign-te ah Sankey in sa kawikawi-a kideih mahmah hi.

Hih la a phuah zawh kum 16 ciangin Mrs. Hawks a pasal in sihsan-a dah mahmah hi. A nuntakna khuamial sahpi-in a tuam bangin ngaihsun hi. Ahi zongin Pasian in ama’ phuahsa la mah zangin hehnem-a, tua ciangin a phuahsa la in mi tampitak a hehnep lam phawk phasan hi. Pasian in amah zanga mite a hehnem ding la khat a phuahna tel hi.

Hih la a phuaknu Annie Sherwood Hawks pen Hoosick, New York ah May 28, 1835 ni-a suak ahi hi. A neu lai pek mah-in laphuah siamtuak pah a, kum 14 a phak ciangin newspapers tuamtuamte ah a poem phuahte kikhen ta hi. La kici pongpong dawng 400 val phuaka, tuate lakah hih la bekmah mipi’ theihkhakin om lai hi. 1859 kumin Annie Sherwood leh Charles Hawks-te kiteng uh a, tanu tapa thum nei uh hi. Brooklyn, New York ah sawtpi teng uh a, Hanson Place Baptist Church ah om uh hi. Tua lai-ah hih la-aw a phuak a pastorpa Dr. Robert Lowry pastor-in kum 8 sung om ngei hi.

Hih la a aw a phuakpa Rev. Robert Lowry pen America gam nisuahna lam kuam buppi-a min kiza Baptist pastor khat ahi hi. Philadelphia khua ah March 12, 1826 ni-in suak hi. Pennsylvania, New York City, Brooklyn, leh New Jersey-te ah Baptist pastor sem kawikawi-a, Bucknell University ah zong kum 6 sung professor of rhetoric sem hi. Thu vaihawm siam, thuhilh siam, leh Laisiangtho siam-in minthang hi. Music leh hymn-te uk mahmah a, ahi zongin nasepin nei ngei lo hi. Ahi zongin 1868 kum ciangin William Bradbury hong si a, Biglow Publishing Company-te in music editor dingin Robert Lowry cial uh hi. A sep peuhmah nakpi-a sep pen ama’ zia ahih mahbangin a editor sepna ah zong hanciam mahmah a, ama’ khetkhiat labu leh laibu tuamtuamte hangin America gam leh leitung mun tuamtuamah Pasian phatna music lam khantohna lianpi om hi, ci-in kiciamteh hi.

Music lam sinna kician a neih loh hangin Pasian’ piak ama’ siamna leh a ki-apna tungtawnin la dawng tampi ading la-aw ngaih mahmah tampi phuak hi. Tuate lakah, “Lam Tawntung A Hong Paipih Hi” (All the Way My Savior Leads Me), “Hong Honpa Na Sih Dong” (Savior, Thy Dying Love), “Zion Khua I Pai Hi” (We’ re Marching to Zion) cihte kihel a, a lamal mahmah a phuahte’ lakah “Han Thuk Sungah Lum Hi” (Christ Arose), “Bang Dang Hi lo, Zeisu Si Hi” (Nothing But the Blood), “Gunpi ah I Kikhawm Ding Hiam?” (Shall We Gather at the River?) te kihel hi.

Print Friendly, PDF & Email
Please follow and like us:

Added by

SHARE