Joyful Joyful We Adore Thee

(Galatians 5:22)

Henry van Dyke (1852-1933) Ludwig van Beethovan(1770-1827)

Hih la bel Pasian’ tunga lungdamna la-in sa-a a kilahkhiatna la ngaihpen khat ahi hi. A phuakpa Henry van Dyke pen November 10, 1852 ni-in America gam Germantown, Pennsylvania ah suak hi. A nuntak sung tawntung America gama Presbyterian thulhihsiampen khat-a kiciamteh ahi hi. Thuhilhsiam ci-a a minthan bek hi lo-in 1900 pan in 1923 dong Princeton University ah professor of literature sem laimawk hi. A pawlpi sung vuah a thupi mahmah moderator zong sem ngei hi. Leitung Galpi Masa lai-in Navy chaplain sem ngei a, President Wilson hun lai-in Holland leh Luxembourg gamte ah American ambassador-in om ngei hi. Devotional laibu tampi gelh-a, a gelh laibu pawlkhatte a kikhawngpen laibu suak pahpah hi.

Hih la, “Lungdamin Kong Bia Uh Hi” bel ama’ phuah late lakah a kitamtheihpen ahi hi. Pasian’ bawlsa nate leh thu um mite genkaak-a kiphuak ahi hi. “Lungsim pak bang palh Na mai-ah, Na vaangtaang sung hong malh hi” a cihna munte ah kimu thei hi. A taang nihna ah Pasian’ bawlsa nate in Ama’ minthanna hong lak dena hong Bawlpa i biak ding hong hilh hi. Taang lina ah leitung vantung a kipiansak hun lai-a kisa phatna lapi (Job 38:7) sakpih-a, tua banga i hihna hangin nuntakna-a kisam thathakte i lak nading hong kizawn hi.

Henry van Dyke in hih lamalte a phuah laitakin Williamstown, Massachusetts-a Williams College ah thuhilh-a a om laitak ahi hi. Zingsang khat van Dyke in tua lamalte college presidentpa pia a, “Hilai-ah nang’ ading hymn khat, na mualte uh (the Berkshires) ka etkawma hong suak hi ei. Beethovan’ la “Hymn of Joy” la-aw tawh sakkhop ding hi” ci-in hih la pia hi. 1911 kuma kikhen van Dyke’ labu Book of Poems sungah kihel pah hi.

A la-aw “Hymn of Joy” bel Ludwig van Beethovan in 1817 pan 1823 sunga a phuah Ninth Symphony sunga a nunungpen khawk ahi hi. Beethovan in hymn aw ding ngimin music khatpeuh a phuah ngei loh hangin ama’ music phuahte panin hymn aw ding tampi kila khin ta hi. Tuate lakah hih lamalte leh hih la-aw kithuahkhawm pen mah a minthangpen ahi hi.

“The Ninth” ahih kei leh “Choral” Symphony bel Beethovan’ phuah music-te lakah a nunungpen hi a, a music phuah khempeuh lakah a hoihpen-a kiciamteh ahi hi. Kum 6 sung phuak hi. Mihing aw leh tumtheih tuamtuamte kigawmkhawm ding a tupna lianpen ahi hi. A German lawmpa laphuaksiam Friedrich Schiller’ gelh la (poem) khat a simna tungtawnin hih la phuah nopna lungsim hong suak hi. Tua poem thulu “Ode to Joy” cih ahi hi. Kum 30 a phaka a beng a ngongcip Beethovan in bangci bangin hih bang la ngaih phuak thei hiam cih tel hak mahmah hi. 1824 kumin Vienna, Austria ah hih music a kisak cil ni-in solo sate tau tung pan hong tuaksuk-in Beethovan mipite’ lamah heii uh a, mipite’ khutbet ziahziahna ensak uh hi, kici hi.

Print Friendly, PDF & Email
Please follow and like us:

Added by

SHARE