O Happy Day

(Khangtangthu Nihna 15:15)

Philip Doddridge (1702-1751) Edward F. Rimbault (1816-1876)

Hih la a phuakpa Philip Doddridge leh Charles Wesley-te 18th century lai England gama hymn phuaksiampente-a kiciamteh ahi hi. Doddridge pen Isaac Watts thupi a sa mahmah khat hi a, tua hun lai-in Watts’ hanciamna tawh England gamah mipi lasakna kinakzat mahmah ta hi. Watts leh Doddridge-te ki-it mahmah uh a, 1748 kuma Watts a sih ciang dong lawmta ki-it mahmahte hi den uh hi.

Philip Doddridge bel June 26, 1702 ni-in England gam London khuapi-a suak ahi hi. Unau 20 pha uh a, amah a nautumpen ahi hi. A pumpi dam lo dena, a khan tawn zawngkhal den mai hi. A neu lai-in a nu leh a pa in sihsan sawnsawn hi. Mi lungsim hoih mahmah pawlkhat in kemin sangkahsak uh hi. A sangkahna ah kipaakta mahmah a, Duchess of Bedford in a sang man ciangin Anglican pawlpi sungah minister a sep ding leh Cambridge University ah sangkahsak dingin ngim hi. Amah ut lo a, non-conformist sang khat ah kah-in a tawpna ah England gam buppi-a minthang evangelical, independent pawlpi makaipi khat suak hi.

Kum 27 a phak ciangin Northampton-a Castle Hill Congregational Chapel ah pastor sep kipana, kum 22 sung sem hi. Tua lai-ah Laisiangtho sang khat honga, independent pawlpi a sem ding mi 200 val pantah thei hi. Hebrew, Greek, mathematics, philosophy, Laisiangtho mahmah leh theology-te hilh hi. Mipil scholar khat ahihna kithei semsem-a, Aberdeen University in 1736 kumin Doctor of Divinity Degree pia hi. Laibu tampi gelh-a, “The Rise and Progress of Religion in the Soul” a cih theology bu khat zong gelh-a kampau nam 7 bangin kiteikhia hi. Family Exposition kici Thuciam Thak hilhcianna zong gelh-a, kideih mahmah hi. Tuate sangin hymn dawng 400 val a phuakpa ahihna tawh kiciamtehzaw hi. A hymn phuah peuhmah a thuhilhna sermonte a tomlakna vive hi den hi.

A la phuahte ama’ khan sungin kikhenkhia lo hi, ahi zongin England gam bup-a non-conformist pawlpite ah kihawmkhia hi. 1755 kum, ama’ si zawh kum li ciangin a lawm it mahmah Job Orton in a la phuahte kaikhawmin khenkhia-a, Doddridge’s Hymns, Founded on Various Texts in the Holy Scriptures ci-in min pia hi.

A kum 48 a phak laitak, a nasepna a lawhcin mahmah laitakin TB natna (tuberculosis) ngah ciitciat hi. Khuahun nuamzaw ah om leh a nuntakna sau zawdeuh ding ci-in a lawmte tampi-in sum zongin Portugal gam Lisbon ah paisak uh hi. Ahi zongin ziakai lua ta hi. October 26, 1751 ni-in si hi. Lisbon-a English han-ah kivui hi. A sihna thu a kizak ciangin England gam bup-in kah uh hi. Na tampi a sepna, Pasian’mi taktak-a a nuntaknate hangin pawlpi kideidanna om lo-in England gam buppi-a Christian makaipite leh mipilte’ zahtaakna ngah hi.

“Lungdam Huai Hi, Nang Kong Teel Ni” in mi khat Pasian tawh kizopna maan a neih cianga a lungdamna hong lak hi. Doddridge’ phuah late lakah a kideihpen la khat ahi hi. A phuah cil lai-in, “Rejoicing in Our Covenant Engagement to God” kici a, Khangtangthu Nihna 15:15 kibulphuh ahi hi. Tua lai-ah, “Judah buppi tua kiciamna ah lungdam hi: bang hang hiam cih leh amaute a lungsim khempeuh uh tawh kiciam uh a, a lunggulhna khempeuh uh tawh Amah zong uh hi; A maute in Amah mu takpi uh a, Topa in a kiim a paam panun tawldamna pia hi.” (kei’ own translation) ci-in kigelh hi. 1755 kum, ama’ sih khit-a a kikhet masak lai-in hih la-in sakkik nei lo hi.

A mal a kiphuah zawh kum 100 sung bang tu-a a la-aw kiphuak nai lo hi. A sakkik la-aw dingin Edward F. Rimbault’ phuah “Happy Land” la-aw kiguanga, a taangte’ aw ding bel a min kithei lo musician pawlkhat’ phuah hi ding hi, kici hi. Tu-a i sak la-aw pen 1854 kuma William McDonald’ khet The Wesleyan Sacred Harp labu sungah lamal dang khat tawh kithuah-in suak ngei hi. A sakkik bel hih la mah hi bilbel hi.

Hih la-aw phuakpa Edward Francis Rimbault bel England gam London khuapi ah June 13, 1816 ni-a suak ahi hi. London khuapi-a pawlpi tuamtuam ah organ tumin om a, music siam musicologist leh scholar khat-a kiciamteh ahi hi. Sang tuamtuam in pahtawina Doctorate of Music pia uh a, Harvard University in zong pia hi. Labu tampi khenkhia hi.

Hih la bel pawlpi tuamtuam-ah ki nakzat mahmah a, British kumpite in a tanote uh’ confirmation service-te ah zong zang uh hi. Methodist leh Baptist pawlpite ah tuiphum hun ciangin kisa deuh hi.

Print Friendly, PDF & Email
Please follow and like us:

Added by

SHARE