Holy Bible, Book Divine

(Late 119:9)

John Burton, Sr. (1773-1822) William B. Bradbury ((1816-1868)

Christian-te in i neihgil pen Laisiangtho hi a, tua Laisiangtho la-a a kiphuah hih la zong Christian hymn-te laka tul thei lo la ngaih mahmah khat ahi hi. John Burton, Sr. kici England gam Nottingham-a Sunday school sia khat in a phuah hi a, 1803 kumin ama’ gelh “Youth’s Monitor in Verse” kici laibu sungah kihel hi. A phuah cil lai-in hih la thulu “Incentive to Early Piety” kici a, 1805 kum Sunday school hymn book khat sungah kihel-a a phuakpa’ min kigelhna mun ah “J.B” kici ziau hi.

Hih la phuakpa in Laisiangtho a manphatna la-a a phuah hi a, Laisiangtho in i piankhiatna hong hilh-in, i tun nading hong lak hi, cih thu na limgen mahmah hi. Hong makaih-in, hong tai-a, i nuntak sungin hong hehnem hi, cih thu na gen hi. Hong tung ding hun ah a tawntung nuamna hong kamciamna zong na mangngilh lo hi. A taang lite sungah “kei’a” cih kammal 11 vei na zang hi. Laisiangtho’ hong hilhna bangbang i manna pen ei Christian-te’ adingin siatna pana kikepna ahi hi. “Tangvalno khat in a gamtatna a siangtho-in bangci kep thei ding hiam? Na thu banga nuntakna in a siangthosak thei ding hi” (Late 119:9 ZIV).

Hih la-aw “Aletta” a phuakpa William B. Bradbury bel October 6, 1816 ni-in York, Maine ah suak hi. A tangval ciangin Boston, Massachusetts ah lal a, tua lai-ah “American pilna sinna le music-te’ pa” (father of American public school and music) kici Lowell Mason tawh kithuah uh hi. Tuiphum pawlpi lianpipi tampi ah choir director leh organist in om ngei a, naupangte’ laka a nasepnate minthang deuh hi. A nasep minthangte’ lakah Music Festival kici naupang tul khat kaikhawm-a, puan kibang silhsak, ama’ lapuahte a saksakna la-pawite minthang deuh hi. La phuah bek hi lo-in, la tawh kisai laihilhna, la ngaihte khetkhiatna nasepte bekbek sepin nei a, 1841 kuma kipanin 1868 kuma a sihkhiat ciang dong Pasian’ la, leitung la bu 59 kaikhawmin khenkhia hi.

Bradbury’ phuah la-awte lakah hih la “Laisiangtho, Pasian Thubu” (Holy Bible, Book Divine), banah, “Ama’n Hong Kha” (He Leadeth Me) “Ka Hi Bangin” (Just As I Am), “Thunget Hun Nuam” (Sweet Hour of Prayer), “Zeisu’n Hong It Ka Thei Hi” (Jesus Loves Me), “Depth of Mercy,” “Even Me”, “The Solid Rock” cihte minthang mahmah hi.

Hih la mah a aw dang khat “Horton” tawh kisa zel-a, 1826 kuma Fraz Xavier Schnyder von Wartensee (1786-1868) in a phuah ahi hi. Amah Switzerland gam Lucerne-a pianist khat hi a, 1817 kuma kipanin Germany gam Franfurt-on-Main-a numeite’ sang khatah piano hilh sangsia khat ahi hi. Choral society khat phuanin operettas, choral late, la tuamtuam leh pianoforte pieces tuamtuam phuak hi.

Print Friendly, PDF & Email
Please follow and like us:

Added by

SHARE