Saved By Grace

(Late 17:15)

Fanny J. Crosby (1820-1915) George C. Stebbins (1846-1945)

19th century bei kuan lam leh 20th century bul lama a khang mahmah evangelical movement i ngaihsut ciangin mi thupi mahmah thum mangngilh theih ding hi lo hi. Evangelist D. L. Moody, musician minthang Ira D. Sankey leh hymn phuak minthang Fanny J. Crosby-te ahi uh hi. Pasian’ na kum tampi a sep khit uh ciangin Moody-Sankey cialpite a lawhcinna pen Fanny Crosby’ phuahsa late a kizat hang hi, ci-in Sankey in gen ngei hi.

1870 panin 1915 kuma a sih dong Fanny Crosby in gospel hymn mal dawng 8,000 leh dawng 9,000 kikal phuak ding hi, ci-in ki-um hi. Tuni donga kisasa late, a zawdeuh-in 1870 kumte-a a phuah hi, kici hi. Tuate lakah, “Lungmuan Huai Jesu’ Angah” (Safe in the Arms of Jesus), “Lungmuanna Thupha” (Blessed Assurance), “Hong Paisan Ke’n, Migi Topa” (Pass Me Not, O Gentle Savior), “Singlamteh Kiangah’ (Jesus, Keep Me Near the Cross), “Hong Nai Sak In” (Draw Me Nearer), “Lam Tawntung A Hong Paipih Hi’ (All the Way My Savior Leads Me), “Nang Kiangah” (Close to Thee), “Phat Un, Phat Un” (Praise Him, Praise Him), “Pasian Min Pha Ta Hen” (To God Be the Glory), “A Sia Ding Honkhia In” (Rescue the Perishing) cihte mi kim’ theih late ahi hi.

Hih “Khatvei Ciangin Khungkhau Tat-in” la bel Fanny Crosby in 1891 kum, ama’ kum 71 a phak laitaka a phuah ahi hi. Moody-Sankey cialpi nunung lama a kizangpen la khat ahi hi. A sawt nai het lo-a si a lawm it mahmah pastor khat thugenna tract laihawm a simna pana a phuah ahi hi. Tua laihawm sunga kigelh thute lakah hih mit khua mu lo laphuaksiamnu Fanny Crosby’ lungsim a sukha pen mun bel, “Khazih in hong piak hehpihna ah thumaan tek hi lehang, bangci nuntak ding cih hong hilh tua hehpihna in bangci sih ding cih zong hong hilh ding hi” a cihna mun ahi hi.

Pasian’ makaihna tawh Fanny in hih la sawt phuak het lo hi. A la phuah thak pen “Some Day” (Ni Khat Ni Ciang) ci-in thulu guan hi. “A lungtang pana a phuah hi,” ci-in gen mun mahmah hi. A phuah khit ciangin a la phuahte a khen den Biglow-Main company-te khak hi. A la phuah manin dollar nih ngah hi. La khenpa in file sungah koihcip-a kum thum sung a thu a la bangmah kiza lo hi.

1894 kum khuakhal sungin Northfield, Massachusetts-a kinei den Christian Workers’ Conference ah Fanny Crosby kihel hi. Tua kikhopna ah Fanny Crosvy hong kihel thei cih a theih ciangin sun hunteng tavuan a la Dr. A. T. Pierson in thugen dingin cial hi. Fanny ut lo a, thu ngai ding beka pai a hihna a gen khit ciangin, “A pongpongin ko numeite peuhmah biakinn sungah pau lo-a om ding hizaw lo ka hi uh hia?” ci-in a nuikawmin dawng hi. Dr. Pierson in mang tuan lo a, a tawpna ah Fanny Crosby in Thursday sun lamin thugen dingin mang hi.

Tua ni-in thu ngai dinga pai mi tam mahmah hi. A nuntakna a Pasian’ piak thuphate teci pang ngelhngelh-a, a mit khua muh lohna nangawn Pasian’ piak nasep a sep theihna a hih manin lungdam ko hi. Hamphatna bangin ngaihsun hi. A thugen a khitna-in tua ma kum nih lai-a Poughkeepsie-a camp meeting a pai lai-a a phuah poem khat tawh khum hi:

Khatvei ciangin khuangkhau tat-in,

Tu bangin-ah zai nawn lo ding;

Ahi hang ka khanlawh ciangin,

Kumpi inn sungah nuamsa ning.

Tua a phuahsa poem a malmal-in lo ngelhngelh-a daii khipkhepin kingai hi. A khupna-in,

Cik ciang a’ diam, kigingkhol ning,

Ka meivak bawlsa sinsen-in;

Ka Topa’ ang kidenna ning,

Vantung kongpi a hon phet-in. (Rev. S. T. Hau Go’ tei Xistian La pan)

Tua ni-a kikhawm peuhmah khitui luang lo om lo hi. Mite’ lungsim lawng mahmah hi. A nitak ciangin Fanny Crosby’ kiangah Ira D. Sanky pai vingvenga a la-aw a phuah theih nadingin tua lamalte ngen hi. Fanny in Biglow and Main Publishers-te’ kiangah a khak khit lam gena, tua ni dongin la-aw kiphuak nai lo ahih manin kuama’n la-in phuahtaaksa lo uh hi ding hi, ci-in gen hi. A pongpongin tua lamalte ama’ thugennate ah a zat zelzel theih dingin amah guakin kem nuam lel hi leh zong kilawm hi. La-aw kiguan leh mun khempeuh ah kizel pak ding ahih manin a aw kiphuak khol kei leh utzaw mai hi.

Ahi zongin tua kikhopna ah London Christian Paper panin reporter khat kihel-a, Fanny Crosby’ poem ngaihsa lua mahmah hi. A phuaknu in tua lamalte a kep khinkhian nop lam thei lo-in, a malmal-in na tei-a, a sawt lo-in tua London Christian Paper ah suaksak hi. Ira D. Sankey in mu pah a, Fanny Crosby’ kiangah a la-aw a phuahsak nading phalna ngen hi. Crosby leh Sankey-te bel a ki-it mahmah lawmta taktak uh hi a, ahi zongin Crosby in tua la lian pen George C. Stebbins in phuak leh a utna gen hi. Sankey in zong George Stebbins hopih pah a, a lawmnu uh’ deihna gen hi. Stebbins in a aw phuakpah takpi-in a sakkik ding phuahbeh-a la ngaih mahmah khat hong piangkhia hi.

Moody leh Sankey in a cialpi bawlna peuh vuah hih la nakzat mahmah uh hi. Kikhopna khempeuh ah hih la a kisak loh hun om lo mai hi. Kikhopna khatpeuh ah hih la a kisak simin tutphah tung khat-ah tu-a gamlapi en-a a hak ciiciai Moody a khutui luan loh hun om lo hi, kici hi.

August 13, 1908 ni zanin Ira D. Sankey si hi. A sih ni zingsang lamteng khua phawk lo-in oma, tua laitakin hih la sung pan a nuai-a taang khat sa hiauhiau hi, kici hi:

Khatvei ciangin khuangkhau tat-in,

Tu bangin-ah zai nawn lo ding;

Ahi hang ka khanlawh ciangin,

Kumpi inn sungah nuamsa ning.

American gospel music ah mi minthang mahmah George C. Stebbins pen February 26, 1846 ni-in Canada gam Orleans County, Ontario ah suak hi. Orleans County pen tuizeu minthang mahmah Niagara Falls pan nisuahna leilu lam tai 50 na pawla om ahi hi. Kum 23 a phak ciangin America gam Chicago ah lalsukin Lyon and Healy Music Company ah nasem hi. 1874 kumin Boston ah kisuana Clarendon Street Baptist Church ah music director sem hi.

1876 kumin amah tawh nasem khawm dingin D.L.Moody in sama kum 25 sung Moody leh Sankey-a kipan evangelist minthang George F. Pentecost leh Major D.W. Whittle-te tawh kithuah-in la makai, choir director, la-aw phuak, gospel la kaikhawma a khenkhiapa cih bangin om hi. La minthang tampite a la-aw ama’ phuah hi a, tuate’ lakah hih la “Khatvei Ciangin Khuangkhau Tat-in” (Saved By Grace) banah, “Siantho Nang Hun Zang In” (Take Time to Be Holy), “Kei’ Dahna Khualmial, Koltanna Pan” (Jesus, I come), “There Is a Green Hill Far Away” (Khuapi Umna Kulh Pua Lam – Xtian La No.101), “Ye Must Be Born Again” (Nih Vei Na Suak Kik In – Xtian La No. 464), “Savior, Breathe an Evening Blessing” (Topa aw, Ka Ihmut Ma-in – Xtian La No. 34), cihte kihel hi.

George C. Stebbins in Pasian’ piaksa nuntakna man nei takin zanga, a kum 91 a phak laitak October 6, 1945 ni-in Catskill, New York ah si hi.

“Queen of Gospel Hymnody” kici Fanny J. Crosby’ tangthu bel i theihtheihsa ahi hi. Ahih hangin hilai-ah a cingzaw-in tawmkhat i genkik ding hi.

Amercica gam Southeast, New York ah March 24, 1820 ni-in suaka Bridgeport, Connecticut ah February 12, 1915 ni-in si hi.

Nipi kal guk (kha khat leh a lang) a phak laitakin a mitna-a zatui kinuh khial ahih manin a mit lang nih-in tawcip hi. A mit in khua a muh loh hangin sun leh zan khen thei hi. Mit khua muh lohna pen mi cin lohna in ngaihsun ngei lo a, mit khua mu lote in mit khua mute bangmah-in na khempeuh sem thei hi, ci-in gen den hi.

A neu lai-in midangte mah bang-a, nuamsa mahmah lel hi. “Zulei khat bangin singkung tung ka kah thei -a, a tuanna phah lo-in sakol tung ka tuang thei hi” ci-in gen ngei hi.

A kum tawm mahmah lai-in Laisiangtho lotngah kipana Piancilna pan Thuhilhkikna ciang, Lungdamna thu bu lite, Ruth leh Solomon late lotngah-in ci thei hi. “Laisiangtho in ka nuntakna bup hong zun hi” ci-in a sih kuanin gen hi.

New York Institute for the Blind mittaw sangah kum 12 sung sangkah hi. 1847-1858 sung sangsia sem kik hi. Language leh history hilh hi.

A music siamna leh a poem phuah siamna tawh minthang mahmah hi. A paisuak-aw (soprano) hoih mahmah nei a, guitar, harp, piano, leh organ tum zong siam hi. Classics of music kiphuaksate a theih loh tam lo hi. A lamal phuahate’ ading la-aw a phuah pawlkhat om a, ahi zongin zat ding deih lo hi. Bang hang hiam cih leh mi nautang’ sak dingin haksa lua, ci-in ngaihsun hi.

A sepna mittaw sanga sem mitkhua mu lo musician leh sangsia mah Alexander Van Alstyne tawh 1858 kumin kiteng uh hi. A nupa thu uh kitam gen kha khol lo a, a lawmpa Van Alstyne bel New York kima minthang mahmah organist khat hi, cih ciang kithei hi. A kiten zawh uh a kum kik teh nau khat nei napi uh, a ngekin si pah mawk hi. Tua a ta’ sihna peuhmah gen kikkik nuam vet lo, kici hi.

Fanny Crosby pen a tha neu mahmah khat hi a, a tun pi nga pha zo lo hi. Pound 100 val gik ngei lo hi. A mel zong hoih lo a, a mai sau heuhau-in, a ha phu piana, a ha tu tegel kikal vang sawnsawn hi, kici hi. A sam sah neunau-in kil theuthau-a, a laizangah a gi khenin a nung lamah kai-a, a liangko tungah khah hi, kici hi. Mit khua mu lo ahih mahbangin mit-limlang sik-li, a vom gemgam khat bulh den hi, kici hi. Ahih hangin thu gen peuh leh mi huup keii a, a mai tai-in it huai semsem-a ngaih baang semsem hi, kici hi.

A neu tunga kipan biakna mi mahmah a hih hangin November 20, 1850 ni-in Methodist kikhopna khat-ah piangthak pan hi. “Vantung khuavak ka sungah hong tang hi… ka khut langkhat-in leitung len-in, a langkhat-in Topa a len ka hih lam ka kiphawk hi” ci-in gen hi. Nidang ciangin tua November kha sunga a pianthakna thu gen kik-a, “Topa in ka sungah aksi khat hong guan-a kuamah in tua khuavak mitsak zo nawn lo hi” ci-in gen ngei hi.

A khangno lai-in poetry tampi gelh-in leitung la tampi a phuah hangin, tua hun lai-a gospel laphuaksiam minthang William B. Bradbury’ hanthotna tawh 1865 kumin gospel la khat phuaka a phuah masaknapen ahi hi. Tua hun-a kipanin gospel hymn phuah ding pen a nasep lianpen-in ngaihsun hi.

Hymn phuah nasep-a a neih banah amah leh amah home mission nasem bangin kingaihsun den hi. New York khua sung missions nasepnate ah nipi kal khat-in ni tam pipi hun zang den hi. Tua mi hehpih huaite ama’ tate bangin ngaihsun hi.

A phuahsa late’ tungtawna pianthakna teci panna a zak ding lawp mahmah den hi. A nuntak sungin mi awn khat peuhmah ama’ tungtawna a pianthak ding ama’ thungetna hi den hi.

“Aunt Fanny” in naupangte it mahmah den-a, a kum tam mahmah khit nangawnin thuhilh dinga a kicial ciangin naupangte’ ading sermon khat peuhmah hel den hi.

Methodist pawlpi a ngaih deuh hangin, “Zeisu it a, Laisiangtho a sang” thu-ummi peuhmah a lawm bangin ngaihsun hi. Thuhilhsia laka a pahtaakpen Henry Ward Beecher’ thuhilhna ngai dingin Brooklyn khua-a Plymouth Brethren Church ah kikhawm pahpah hi. Fifth Avenue Presbyterian Church leh Phillips Brooks in thu ahilh ciang diakdiakin Trinity Episcopal Church ah zong kikhawm thei zel hi.

A mah a thei mite in Fanny Crosby pen ciamnuih hat mahmah mi khat hi, ci-in ciamteh uh hi. A sermon-te leh a thugennate ah nuih theih nading ciamnuih tom nono leh tangthu zaknop nono hel den hi. “Mite taii-a i thuhilh nop ciangin amau leh amau kiphawksak-a nuihsakna a hoihpen hi” ci-in gen ngei hi.

A nuntakna a nunung lam ciangin America gam bupah thu gen dingin kisam mun mahmah hi. Thugen dinga a pai ciangin amah guak zin geugeu lel hi. A thugenna munte ah hun-ukte in amah kua hiam cih mipite’ tungah a kigen ciangin, “the Protestant saint” (Protestant misiangthonu), “the most wonderful person living” (mihing nungta laka lamdangpen nu) cih bangin gen thei den uh hi.

Print Friendly, PDF & Email
Please follow and like us:

Added by

SHARE