Abide With Me

(Luke 24:29)

Henry F. Lyte (1793-1847) William H. Monk (1823-1889)

Sih ding peuhmah lunghihmawh-a a nei lo mite bekmah tupna ngimna leh lungmuanna tawh nungta thei bek hi, ci-in kigen ngei-a hi mahmah hi. Kuama’ theihkhak khol loh Mangkangte pastor khat ahi Henry F. Lyte zong tua bang mi na hi gige hi. A sih madeuh, 1847 kumin hih lamalte na phuak-a a upna leh a lungmuanna na pulaak hi. Tua hun-a kipan leitung mun khempeuh-a thu ummite’ adingin dahna leh lungdonna lianpi a thuak uh cianga hehnepna a pia a kideihpen den la ngaih khat-in om den hi.

Henry F. Lyte bel Scotland gamah June 1, 1793 ni-in suaka Ireland gam Dublin khua a Trinity College ah pilna sin hi. A khantawnin Church of England pawlpi mi citak mahmah khat hi den hi. A nuntak sung tawntung a pumpi a zawngkhal hangin a upna leh a lungsim a kha a thahat mahmah khat hi, ci-a ciaptehna a ngah mi khat ahi hi. A pumpi a hat loh hangin laphuaksiam poet minthang khat, musician khat leh minister khat ahihna tawh gim thei lo tawl thei lo-in na sem den hi. “It is better to wear out than to rust out” cih kammal bang ama’ kammal minthangte laka khat a ahi hi. A sepna peuh ah ki-it mahmah-a kithupisan mahmah hi.

A nuntakna a nunung lam kum 23 sung England gam Lower Brixham, Devonshire a ngabengte’ lakah nasema, a pawlpi mite mizawng vive ahi hi. A nunnung lam ciangin a ci dam lo semsem-a, a cidam nadingin khua a lumzawkna Italy gama ah a pai loh hong phamawh hi. September 4, 1847 ni-in a pawlpi mite’ tungah a sermon nunungpen gena, a pulpit zuanin pai zo lo ahih manin bokvaksa-in pai-a, a aw suak zo lo-in misi ding khat’ aw tawh kibang hi, kici hi. A kammal nunungte in a mite’ lungsim nakpi-in vut hi. “Zeisu Khazih’ sihna a sanna uh leh tua tunga a kingakna uh tungtawnin hong tung ding gimna hun ading a kigingkhol dingin” a mite hanthawn hi. Italy gam zuan-a a pai laitak, France gam Nice a tun laitakin si-a, November 20, 1847 ni-in tua lai-a English hanah kivui hi.

Henry Lyte in hih la a pawlpi Lower Brixham-ah a thuhilh nunungpen Nipi Ni madeuh-a a phuah hi, kici a, a lamal bek hi lo-in a la-aw tawh a phuahkhawm ahi hi. Ahi zongin 1850 kumin London-a Lyte’s Remains kici laibu sungah a kikhet mateng England gamah kitamzat nai lo hi. America gamah bel Henry Ward Beecher in 1855 kuma a bawl Plymouth’s Collection sungah kihel a, “hih la pen a lamal sim ding bek hi a, la-a sak ding hi lo hi” ci-in kigelh hi. Ahi zongin tua khit lam ciangin Hymns Ancient and Modern kici Anglican Church hymnal editor William Henry Monk in mukha a, 1861 kuma kikhen tua labu sungah hel pah hi.

Tua labu sungah bel William Monk in ama’ phuah la-aw dawng 50 hel-a, Henry Lyte’ phuah hih la “Kei Tawh Omkhawm In” ading zong a aw phuaka, “Eventide” kici hih la-aw a phuah lai-in nai lang zong sawt lo hi, kici hi. A nuntakna ah dahna nakpi-a a thuak laitak hi napi-in nitum kuan hoih lua mahmah a muh laitakin hih la-aw a lungsima suak ahi, kici hi. Hymnal kikhen ngei lakah a thupipen khat-a kingaihsun hih Hymns Ancient and Modern kici Anglican Church hymnal a kikhet lai-in editor a sep bek hi lo-in London khuapi-a King’s College ah choir director leh organist-in zong om hi.

“Look, Ye Saints! The Sight Is Glorious,” leh “The Strife Is Over” kici late zong a aw Wiiliam Monk phuah mah ahi hi.

Henry Lyte in hih la “Kei Tawh Omkhawm In” a phuah lai-in Emmaus lam zuana pai nungzui nihte’ tunga i Topa’ kilatna leh tua nungzui nihte in i Topa’ tunga, “Ni kai lua ta a, ni tum phial ta a hih ciangin ko kiangah hong tam in” (Luke 24:29 ZIV) a cihna mun panin a lamal ding a lak ahi hi. Hymn dang tampi a phuah loh hangin “Jesus, I My Cross Have Taken” (Jesu Aw, Kei Kisuan Khin – Xtian La No.210) zong Henry Lyte’ phuah mah ahi hi.

Print Friendly, PDF & Email
Please follow and like us:

Added by

SHARE