My Redeemer

(Titus 2:14)

Philip P. Bliss (1838-1876) James McGranahan (1840-1907)

Hih la phuakpa Philip P. Bliss pen American church music tangthu ah mi minthang mahmah khat ahi hi. Gospel la phuaksiam mahmah khat ahi hi. America gam Clearfield County, Pennsylvania ah July 9, 1838 ni-in suak hi. A neu lai-in zawng mahmah uh hi. 1850 kumin Zeisu Khazih a Honpa in sanga Tioga County, Pennsylvania a Cherry Flat Baptist Church ah lut hi. A neu lai mah in music lam uk-in va mahmah hi. Tawlkhat sung music a sin khit ciangin Chicago ah kisuanin Dr. George Root tawh kithuah-in music hilh leh cialpi bawl-in kum 10 sung om hi. 1874 kumin D.L. Moody leh Major Daniel W. Whittle-te in hunbit-a evangelistic nasep sem dingin hanthawnin zol uh hi. Tua huna kipan hun nai lo pi-a a sih dong, tua zawh kum nih sung cialpi kibawlnate ah kihel in la makaih den hi.

Philip P. Bliss a sih-in kum 38 pha pan hi. Pasian’ muhna ngaihsun lo-in leitung mit tawh en lehang bel “hun nai lo pi-a” si hi mai hi. 1876 kum Christmas hun sungin a neu lai-a a teenna Rome, Pennsylvania-ah a zi tawh hawh uh hi. Tua mun pan a teenna Chicoga lam zuana a ciahna Ashtabula, Ohio a tun uh ciangin meileeng lampi-a leii kicimin a tuanna uh meileeng pi 60 a thuk guam sungah kiasuk hi. A nuai a tun ciangin a meileeng uh kuang sawnsawna a tunga tuang mi lakah mihing 100 si hi. Philip P. Bliss bel a kiatsukna panin suakta teii-a tawllet (padenpauh) khat pan pusuak thei sam hi. Ahi zongin a meileeng sungah a zi awkcip cih a theih ciangin a zi honkhia dingin tua meileeng kuang sungah lutkik-a a zi tawh a nih-un suakta zo lo-in sikhawm uh hi. Leitung buppi kiliinglawng mahmah hi.

Tua tuahsiatna sunga mei-in a kaattum loh Philip P. Bliss-te nupa’ van lakah singkuang khat na om hi. Tua singkuang sungah hih la, “Kei Ong Tanpa” (My Redeemer) phuahsa-in na om hi. Lamal ahi a, la-aw ahi zongin a phuaksiampa Philip P. Bliss in hih la-aw ding phuak man nawn lo ahih manin James McGranahan in a aw ding phuahsak hi. Philip P. Bliss a sih ciangin a nasepna ah la makai a sem dingin Major Daniel W. Whittle in James McGranahan sam hi. Tua hun sunga a phuah ahi hi. Major Whittle in mipi’ tungah hih la Philip P. Bliss’ van laka kimu ahihna leh James McGranahan in a aw a phuahna, James McGranahan in Philip P. Bliss’ patsa nasep zomin ama’ munah la makai a sep nading thute a gen ciangin mipite’ lungsim lawng mahmah hi. Tua hi-a hih la pen a kisak masaknapen ngiat-ah mite’ lungsim a khoihkha mahmah la ahi hi.

1877 kuma kikhen Welcome Tidings kici Sunday school-te’ adinga Robert Lowry, William H. Doane, leh Ira D. Sankey-te in a kaihkhop uh labu sungah kihel pah hi. Hih la, “My Redeemer” (Kei Ong Tanpa – Xtian La No. 485) banah, “Mangmah Tatkhiat Nading” (I Gave My Life for Thee), “Ka Kha Ading A Hoih Hi”(It Is Well With My Soul), “Kei Nangawn Hong It Hi’ (Jesus Loves Even Me), “Free From the Law Once for All” (Thukham Pan Suahtakna – Xtian La No. 473), “Hold the Fort,” “Let the Lower Lights Be Burning” cih late zong Philip P. Bliss’ phuah la minthangte ahi hi.

Print Friendly, PDF & Email
Please follow and like us:

Added by

SHARE