Wing Away, Song of My Soul

Tuan Khan Mung (1960- ) Tuan Khan Mung (1960-)

English rendering by Rev. S.T. Hau Go (1920-1996)

139

Tedim kama labu hoihpen hong bawlsak Rev. S.T. Hau Go in Xristian La, Tedim Kam sung laimai xiv a a gen bangin Christian Hymn-te’ Tangthu laibu hibang ka bawl buangin eimi tualsuak khat’ phuah khat hel nopna lungsim ka nei hi. Pasian’ hehpihna tawh ei Zomite thu leh la a va mahmahte i hi a, taanglai i pu i pate bangin thupi khatpeuh a gen nop uh ciangin la dawng khat-in na gen uh a, mangngilh nawn het lo-in a khang a khangin kiciamteh suksuk laimawk hi. Christian upna ah i khan ciang leuleu-in Pasian in la phuaksiam tampi hong pia a, S.T. Khai, Zogam Lalpu, Zolimtui Thawng Kim, Tua Mungte-a kipan la ngaih dawng tampipi a phuak laphuaksiam mi tampi khang khin hi. Tuate’ lakah a taangthu leh a phuahsa hih la’ pianzia a kigenna a om ngeisa Rev. Tuan Khan Mung (Tua Mung)’ phuah hih la “Ka Zai Deih Aw, Va Leeng In” (Wing Away, Song of My Soul) kong hel hi. Rev. S.T. Hau Go in Xristian La, Tedim Kam sung laimai xiv-a a gen bangin kong genkik mai ding hi.

“La hih zahta tei a, labu hih cia ka bawl buangin, eimi tualsual khat’ phuah, a kilawm om leh guang nuam ing, ci a ka kankan laitakin, Tonzangte, Sia Vial Nang’ pawlpi panin tangvalno Tuan Khan Mung’ phuah, “Ka zai deih aw, va leeng in” ka za kha zenzen a, ka bil le ka lungsim hong su pah lek hi. A phuakpa’ kiangah, ka labu bawlna sungah guan theih nading ‘copyright’ ka nget leh ong pia hi.

“Hih la pen a thu luan zia, a aw pai zia, mi siam dangte aa mah baan ka sak tham loin, a thu le a la aw tonin kihual khawm in kilawm ka sa mahmah hi. A thu a haksatna munte-ah a aw zong kalsuan tawng geihgeihin, ama taang-a la a sawlnate-ah la aw zong leeng diaidiai hi. Mual le guam kaan-a pai nadingah a kalsuan zong hi liapliap pahin, tuate tungah la pen a khaak om lo-in leeng viauviau hi.”

Hih laphuakpa Rev. Tuan Khan Mung bel Tozang khua ah 1960 kumin suaka, Tonzang SHS pan tan 10 a zawh khit ciangin MICT, Insein pan LTh, ZTC, Falam pan BTh zo a, MIT< Insein panin MDiv ngah hi. 2002 kuma kipanin Singapore ah Bachelor of Church Music (BCM) a sin laitak ahi hi. 1988 kuma kipan pastor nasep kipana, 1991 kuma panin 2000 kum dong Tonzang khua Vial Nang Memorial Baptist Church ah senior pastor-in om hi. 2001-2002 sung TTBA Mission Secretary sem ngei hi. Kimawlna lam zong va mahmah a, Tonzang Township leh Chin State Football Selected-in kimawl ngei hi. ZBC la kidemna ah mi solo, duet lasaknate ah a khatna ngah ngei hi. Gam leh minam itna leh Pasian phatna la tampi phuaka ngaih thei mahmah hi. Hih la Mangkama a tei Rev. S.T. Hau Go bel a pa Tual Hang leh a nu Awn Niangte’ sung panin October 30, 1920 ni-in Tedim uk sung Lailui khua ah suak hi. Sagaing panin Kawllai distinction tawh tan 10 zo hi. College kah theih nading scholarship kum 5 sung sang hi. Judson College pan B.A. ngah hi. 1946 kumin Madras University panin M.A (Philosophy) ngah hi. 1950 kumin America gam va pai-a Phildelphia khua-a Eastern Baptist Theological Seminary panin M.R.E. ngah leuleu hi. 1947 kumin Luan Za Cing tawh kiteeng uh a, tanu tapa 8 nei uh hi. America gam panin hong tun kik ciangin missionary Rev. F.O. Nelson leh Rev. Robert Johnson-te tawh kithuah-in Falam gam tavuan la hi. 1953 kum Zomi Baptist Convention a kiphuat ciangin General Secretary masapen-in kiteel hi. Kum thum a sep khit ciangin kum thum sem kik dingin a kiteel hangin a cidam lo-a 1957 kumin khawl hi. March 1, 1996 ni-in Yangon khuapi-a a inn panin Topa’ kiang hong zuatsan hi. Eimite’ sungah lai siampen, thu leh la a vapen khat ahi hi. A khan sunga a sep tampite’ lakah Tedim kama Christian la ngaih tampi hong teikhiatsakte a manphapen khat-in ka ciamteh hi.

Print Friendly, PDF & Email
Please follow and like us:

Added by

SHARE