Ka Kha Ading A Hoih Hi
It Is Well With My Soul

(Late 46:1)
Haratio Gates Spafford (1828-1888) Philip P. Bliss (1838-1876)

Christian Hymn-te lakah a kisa munpen khat leh mi tampite’ deihpen la khat ahi hi. A phuakpa Haratio G. Spafford pen Presbyterian pawlpi mi khat hi a, America gam North Troy, New York ah October 20, 1828 ni-a suak ahi hi. A khangno lai mah-in nasep hanciam-a Chicago ah sitni (lawyer) gina mahmah khat suak-a sum le paii zong hau mahmah hi. A hauh mahmah hangin Pasian um mahmah a, Pasian’ nasepna ah a kipia zo mahmah khat ahi hi. D.L. Moody-a kipan tua hun lai-a evangelical makaipi khempeuh phial tawh ki-it mahmah uh hi. Gospel musician minthang George C. Stebbins in, “Amah pen pil mahmah-a a hokum-nuam mahmah khat, a khami mahmah, Laisiangtho thuthuk a kan pha mahmah khat ahi hi” ci-in gen ngei hi.

1871 kum-a Chicago meikaat madeuh-in Spafford in Lake Michigan dungtengah innmun logam tampi lei-in a sumzonna khan mahmah hi. Chicago khua buppi mei-in a kaattum mawk ciangin a neih a lam khempeuh kangtum hiau hi. A zi leh a ta nute tawlngasak nuam kawm, Great Britain ah cialpi bawl-a om Moody leh Sankey lah huh nuam kawmin 1873 kum November kha sungin Europe lam zin ding geel hi. Chicago khua buppi kangtum mawk ahih manin a tanute’ sangkahna zong kibansamsak nuam lo-in England ah a sangkah uh zomsak nuam kawm hi. A dinkhiat kuanun sep loh a phamawh vai pawlkhat hong om a, a zi leh a tanute New York pan Ville du Havre tembaw tuang dingin paisak mai hi. Amah zong a sawt lo-a pai thei ding, a zi a tate a pha dinga kingaihsun ahi hi.

November 22 ni-in England gam-mi khat’ tembaw Lochearn in a zi a tatete’ tuanna tembaw taih kha a, minute 12 sungin tummang hi. Spafford’ tanu lite a suakta om lo-in a li un si uh hi. A nu uh bel tembaw sia singpek khat na kawicip-a, a honkhiate in mu-in honkhia zo teii uh hi. Tawlkhat khit ciangin a nungta sunteng Wales gan Cardiff kitunpih hi. Spafford’ zi-in, “Suakta ingh, keiguak” (Saved, alone) ci-in a lawmpa sikkhausat hi.

Spafford in tua sikkhau lai a ngah ciangin tua ma kum nih lai-a a neih a lam khempeuh mei in a kaattum bel tu-a a supna tawh teh-in bangmah ahih lohna phawk hi. A beisa inn leh lote kilam kik thei-a, a kisumsa sum leh paii bel kizong kik thei hi. A sisa a tanute bel!!! Dah mahmah-a a ngaihsut tam mahmah hi.

A sawt lo-in a dah a kap a zi’ kainga pai dingin Spafford England gam zuanin pai hi. A tanute’ sihna mun a tun ciangin hih la sunga i saksak kammlate hong phuaka, ama’ tuahkhak dahnate’ kawmkal-a a lungnopna kimu thei hi – “Gunpi luan nem bang ka nunna nuam thei-a, Dahna tuihual in hong nawk zong….”

Bangzah-in a dah zongin Spafford tua dahna sung bekah guallel lo a, taang thumna ah Zeisu’ hong hotkhiatna thu na sutkik-in, taang lina ah i Topa’ hong paikik nading lam-etna tawh na kihehnem hi.

Mihing i hihna tawh ngaihsun lehang Spafford banga dahna kahna, lungzuan khuangaihna a tuak mi khat in, “Ka kha ading a hoih hi” a cih theih mawk bel lamdang lua mahmah hi. Ahi zongin Spafford banga khami lua mahmah, Pasian’ adinga kipumpiak den mi khat adingin i nuntaknate “gunpi luan nem banga” a nop hun zong om a, “dahna tuihual in hong nawk” hun zong a om hi a, tua bang hun-a mihingte’ tel zawh loh, mihingte’ kipiak theih loh Pasian’ kiang bek pana hong pai kihehnepna leh lungnopna i cihte a om takpi mah ahi hi.

Spafford in a khantawnin Holy Land a lunggulh den mahbangin 1881 kumin tua a lunggulhnate tangtungin a zi leh a tanu nihte tawh Holy Land pai-in Jerusalem ah teng uh hi. Tua lai-ah American Colony phuan uh a, cinate leh cimawh gentheite kem uh hi. Tua zawh kum 8 ciang, kum 60 pha panin Sapafford a sih zenzen hangin tua nasep thupi kizomsuak hi. A khami mahmah hih Spafford-te innkuan leh a nasepnate uh, a tanu uh Bertha Spafford Vesper’ gelh Our Jerusalem kici laibu sungah cingtakin kigelh hi.

Spafford’ tuahkhak thu leh a kihehnep zawhna hih lamalte a muh ciangin Philip P. Bliss in thupisa mahmah a, a la-aw ding phuak pah hi. Amau tegel bel lawmta ki-it mahmah uh hi a, Chicago khua May Street-a tengkhawm uh ahi hi. 1876 kuma kikhen Sankey-Bliss labu Gospel Hymn No. Two sungah kihel pah hi.

Philip P. Bliss pen American church music tangthu ah mi minthang gospel la phuaksiam hi a, America gam Clearfield County, Pennsylvania ah July 9, 1838 ni-in suak hi. A neu lai-in zawng mahmah uh hi. 1850 kumin Zeisu Khazih a Honpa in sanga Tioga County, Pennsylvania a Cherry Flat Baptist Church ah lut hi. A neu lai mah in music lam uk-in va pah hi. Tawlkhat sung music a sin khit ciangin Chicago ah kisuana, Dr. George Root tawh kithuah-in music hilh leh cialpi bawl-in kum 10 sung om hi. 1874 kumin D.L. Moody leh Major Daniel W. Whittle te in hunbit-a evangelistic nasep sem dingin hanthawnin zol uh hi. Tua huna kipan hun nai lo pi-a a sih dong, tua zawh kum nih sung cialpi kibawlnate ah kihel-in la makaih den hi. A zi tawh Pennsylvania pan Chicago ah Christmas hun laitak khualzin-a a pai na a meileng uh kibungin pi 60 a thuk guam sungah kiasuk-a, mi 100 si hi. Tuate lakah Philip P. Bliss-te nupa zong kihel kha uh hi.

Philip P. Bliss’ phuah late’ lakah hih la “Kha Kha Ading A Hoih Hi” (It Is Well With My Soul) banah, “Mangmah Tatkhiat Nading” (I Gave My Life for Thee), “My Redeemer,” (Kei Ong Tanpa – Xtian La No. 485), “Free From the Law Once for All” (Thukham Pan Suahtakna – Xtian La No. 473), “Hold the Fort,” “Let the Lower Lights Be Burning” cihte kihel hi.

Print Friendly, PDF & Email
Please follow and like us:

Added by

SHARE