O Perfect Love

(Ephesians 5:31)
Dorothy B. Gurney (1858-1932) Joseph Barnby (1839-1896)

Hih la bel Mangkama kiphuak ngei kiteenna la khempeuh lakah a ngaihpen khat-a kiciamteh ahi hi. 1883 kuma English numei khat, Dorothy B. (Blomfield) Gurney in a phuah hi a, Gurney in a nuntak sungin hih la sim loh la dang khat beek phuak lo hi, kici hi. A unu’ pasal neih ni a sak dinga a phuah ahi hi. A phuaknu in, “Pum khat suahna taktak i cih itna leh nuntakna cih thu nih kigawm hi cih ngaihsutna tungtawna ka phuah hi a, ka phuahna mahmah ah zong Pasian in hong huh-a haksa het lo hi” ci-in gen ngei hi. Hih lamalte 1889 kuma kikhen Anglican Church Hymnal Hymns Ancient and Modern, Supplement ah kihel pah hi.

A sawt lo-a pasal nei ding a unu’ kiang English Lake region of Windermere ah va hawh hi. Tua mun pen William Wordsworth-a kipan romantic poem a phuak tampite’ tenna mun ahi hi. A unu in a a sawt lo-a a bawl dinguh kiteenna pawi-a sak dingin John B. Dykes’ phuah “Strength and Stay” la-aw tawh sakkhop ding la ngaih a zonzon hanga a muh zawh lohna a naunu tungah gen hi.

Nipi Ni nitak khat la sasa uh a, a unu’ deih mahmah “Strength and Stay” la zong sa uh hi. A lawmte khat in, “Hih lamalte na kiteenna vuah kisa thei lo sese dinga mataw!” a cih leh a unu zong Gurbey’ lamah kiheiiphei-in, “Sanggan numei poem phuak thei khat kinei kici a, ka mopawi vua sak ding la khat beek hong phuahsak kei lawmlawm lecin banga hong mang mawk ding ka hia?” ci phei hi. Dorothy B. Gurney in zong a hymnbook manin, “Kuama’n nong nawngkaisak kei ding nak uh leh laisimna inndei sungah va pai ningin bangkhat peuh kong hih thei hiam en lehang ai ve” ci-in pai hi. Minute 15 khit ciangin hong paikhia kik-a, “Itna Nuam Aw!” lamal phuahsa in hong tawi-a a vekun “Strength and Stay” la-aw tawh sa pah uh hi. A unu zong lungkim mahmah a, a mopawi vuah sak dingin kipsak pah hi. Kum nih kum thum sung khawng London-a kiteennate ah kisa a, tua khit ciangin leitung buppi-ah kizel hi.

Dorothy Frances Gurney bel October 4, 1858 ni-a England gam London-a suak ahi hi. A pa Frederick G. Blomfield pen Anglican Church sunga London parish-a rector ahih zahkhat-in Gurney-te unau pastor innkuan sung panin khan hoih taka khang uh ahi hi. A pu bel a minthang mahmah bishop of London ahi hi. Dorothy Gurney pen a neu tunga kipan laphuahsiam ding ahihna a kilang pah khat hi a, poem pawlkhat phuakin, devotional bu A Little Book of Quiet kici laibu khat zong gelh hi. Nidanga actor a sem ngei Anglican Church sunga minister Gerald Gurney tawh kiteng uh hi. Ahi zongin 1919 kumin Rev. Gruney-te nupa in Anglican pawlpi nusia in Roman Catholic pawlpi ah lut uh hi.

Hih la-aw khat veivei “O Perfect Love” kici zel, khatvei leh “Sandringham” zong kici zel hi. 19th century lai England gama church musician minthang mahmah khat ahi Joseph Barnby’ phuah ahi hi. London-a a church choir bang minthang mahmah hi. 1871-76 sung organist leh choir director a sepna St. Ann’s Soho Church ah Jodeph Barnby in kum simin “J.S. Bach’ passion music” lasak pawi bawl den hi. A khan sungin Barnby in la-aw dawng 246 phuaka, a vekin bu khat kisuah-a a sih khit kum khat khit ciangin kikhenkhia hi. Oratorio khat zong phuaka, liturgical anthem tampi phuak hi. Hymnal thupi mahmah bu nga khena, tuate lakah 1872 kuma kikhen The Hymnary bang minthang deuh hi. 1892 kumin English culture a picingsak la tampi phuaka la lam a nasepna thupite hangin England Kumpinu in minphatna “Sir” pia (knighted) hi. .

1898 kumin Joseph Barnby in Dorothy Gurney’ phuah lamal tungtawnin Duke and Duchess of Fife-te’ kiteenna-a sak ding anthem khat phuak hi. Hih “Itna Nuam Aw!” la mahmah zong tua anthem pana kila ahi hi. Hih la-aw “Sandringham” bel 1898 kuma kikhen John Stainer’ labu The Church Hymnary sungah a kihel masakna kimu thei a, Norfolk-a England gam kumpite’ teenna mun khat a kitamsak min ahi hi. Hih law aw bel lamal dang tuamtuam bulh-a kisasa la-aw ahi hi. Anna B. Warner’ phuah “We Would See Jesus” la, Lucy A. Bennett’ phuah “I Am the Lord’s! O Joy Beyond Expression” la cih bangte tawh zong kibulh ngei hi. 1954 kum Evanston, Illinois a kibawl Second Assembly of the World Council of Churches ah Hymnal Commitee in tua kikhopna sunga sak dinga kiphuak lamal tawh sakkhop dingin hih la-aw mah teel ngei uh hi.

Joseph Barnby’ phuah la-awte lakah “May Jesus Christ Be Praised” la-aw “Laudes Domini,” “Now the Day Is Over” la-aw “Merrial” cihte kihel hi.

Print Friendly, PDF & Email
Please follow and like us:

Added by

SHARE