Huihpi Nun Cianga Kidalna
A Shelter in the Time of Storm

(Late 94:22)
Vernon J. Charlesworth (1839-) Ira D. Sankey (1840-1908)

with alteration

Ira D. Sankey’ hangin khangthak gospel hymn bangzah taktakin khangto cih i gen ding haksa mai ding hi. Cialpi khat i bawl-a, Bible conference khat i nei ahi zongin Sankey’ phuah la khatpeuh, ahih kei leh Sankey’ khet la khatpeuh, ahih kei leh Sankey’ hangin kizel-a a kideih la khatpeuh sa lo-in kikhop kiman ngei lo mai hi. Sankey in Pasian’ piak ama’ siamnate gospel la ngaih dawng 80 val phuahna-in zanga, hymnbook 10 val kaikhawmin labu dang zong pawlkhat khenkhia lai hi. A kum tam pian lam ciangin la dawng tampite ah a min a tuan lam phawkkhia a, pseudonym kici ama’ min taktak a hi lo min dang khat zang zawmai hi. Tua minte’ lakah khat pen Rian A. Dykes hi a, a laphuah tampite tungah hih min tuang hi. Hih min-a laimalteng gual pha lehang Ira D. Sankey mahmah a suak veve dinga a geel ahi hi.

Ira D. Sankey pen August 28, 1840 ni-in America gam Edinburg, Pennsylvania ah suaka, 1856 kumin pianghtak hi. 1857 kumin New Castle, Pennsylvania ah lal uh a, tua lai-ah Methodist Episcopal pawlpi ah lut hi. A sawt lo-in Sunday School superintendent-in kikoih a, choir leader zong sem hi. American Civil War (Tualgal) sung 1860 kumin Union Army ah lut hi. Sergeant za ciang ngah hi. September 9, 1863 ni-in State Senate member John Edwards’ tanu Fanny V. Edwards tawh kiteng uh a tapa nih nei uh hi. Gal ven ciangin New Castle ah ciahkik-a, a pa’ nesep ahi Internal Revenue Service ah a pa huh-in om hi. 1867 kumin amau’ khua a YMCA ah secretary, tua khit teh president cih bangin kitel hi. 1870 kumin Indianapolis khua-a YMCA kikhoppi ah taangmi-in kah-a D.L. Moody tawh kimu uh hi. Tua a kimuhna vuah Moody in hun-bit-a Pasian nasem dingin zol hi.

1871 kumin D.L. Moody tawh kithuah dingin Chicago ah kituah a, kum 30 val kithuah uh hi. 1873 pan 1875 sung Great Britain ah lungdamna thu tangko-in pai hi. 1873 kumin Sacred Songs and Solos khenkhia hi. Kikhen kikkik-a, la zong kibehlap toto hi. 1903 kuma a kikhet ciangin la dawng 1,200 pha ta hi. 1874 kumin Philip P. Bliss tawh kopkhawma a khet uh Gospel Hymns Numbers 1-6 khetkhiat kipan-a, la dawng 739 pha hi. 1881-84 sung British Isles ah lungdamna thu tangko-in zin kik uh hi. 1885 kumin a labute zuakna pana kingah sum lak panin Newcastle, Pennsylvania a YMCA inn lam nading $ 40,000 piakhia zo hi. 1891-92 sung British Isles ah zin kik uh-a, 1898 kumin Holy Land ah zin hi. 1899 kumin mangpha khakna-in England gam zin leuleu hi. December 22, 1899 ni-in a lawmpa D.L. Moody si-a dah mahmah hi. 1903 kuma kipan a mit in khua mu nawn lo hi. August 13, 1908 ni-in Topa’ kiang Van-inn ah ciah ta hi.

Hih la banah, “Nang Kong Beel Hi” (Hiding in Thee), “Trusting Jesus” (Jesu Muang In), “The Ninety and Nine” cih late zong a aw Sankey’ phuah ahi hi. Tuate banah “Nang Ading Thu Ka Ngen” (For You I Am Praying), “Upna in Zawhna Hi” (Faith is the Victory), leh “Under His Wings I Am Safely Abiding,” cih late zong a aw a phuah ahi hi.

“Huihpi Nun Cianga Kidalna” lamal bel English pastor khat, Vernon J. Charlesworth’ phuah ahi hi. Amah 1869 kumin Charles Spurgeon’ phuat Stockwell Orphanage ah siapi headmaster-in kikoih hi. 1885 kumin Ira D. Sankey in ama’ phuahsa la-aw leh hih lamalte bulhkhawma a sakkik phuahbeh lai-a, Late 94:22 bulphuh-in “ My God Is the Rock of My Refuge” ci-in thulu pia hi.
Sankey in hih la ama’ khet Sacred Songs and Solos leh Gospel Hymns No 5 te ah hel hi. My Life and the Story of the Gospel Hymns laibu sungah Sankey in hih la tawh kisai hibangin gen hi: “London khuapi-a laihawm khat sungah hih la ka mu a, “The Postman” kici hi. England gam khung lama nga bengte’ deih mahmah la hi, kici hi. Huihpi a nun laitak tuipi nawl lam zuana a pai kawmun sa den uh hi, kici hi. Minor aw khat-a kisa dengdeng hi se a, mi khempeuh in a sak theih dingin a aw laih ding ka ngaihsun pah hi.”

Print Friendly, PDF & Email
Please follow and like us:

Added by

SHARE