Hong Pai Ciangin
When He Cometh

(Malachi 3:17)

William O. Cushing (1823-1902) George F. Root (1820-1895)

Hih “Suangmanpha la” pen naupangte’ adinga kiphuak ngei la a kici peuhmah lakah a kideihpen la khat ahi hi. A phuakpa William O. Cushing in hih lamalte 1856 kumin ama’ Sunday School naupangte’ adinga a phuah ahi hi. Malachi 3:17 bulphuh-a a phuah ahi hi.

William O Cushing in Sunday School la tampi phuaka kideih thei mahmah hi. Tuate banah Ira D. Sankey’ labu Sacred Songs and Solos bu sunga kihel la dawng tampi zong phuak lai hi. Tua late lakah “Nang Kong Beel Hi’ (Hiding in Thee), “Ring the Bells of Heaven,” “Under His Wings,” “There’ll Be No Dark Valley,” leh “Down in the Valley With My Savior I Would Go” late zong kihel hi.

William O. Cushing pen America gam Hingham, Massachusetts ah December 31, 1823 ni-in suak hi. Kum 20 val sung Disciples of Christ pawlpite ah pastor sema lawhcing mahmah hi. 1870 kumin a zi si-a, a cidam lo ahih main a nasepna pan khawl hiau hi. A pum peuh zaw pianmawk-a, a aw zong suak mel lo hi. A lungman mahmah laitakin, “Topa aw, Nang ading ka sep ding khatpeuh hong pia in” ci-in thu ngen ngeungau hi. A thungetna Pasian in dawnga mi mawkmawkte’ phuah theih khol loh a hi leklek piana kisa Sunday School la tampi a phuak dingin Pasian in zang hi. Ira D. Sankey, Robert Lowry, George F. Root-a kipan gospel laphuaksiam tampi tawh kithuah uh hi. A nuntak sungin gospel hymn dawng 300 val phuak hi. Mi thupi, mi nuam, a khami mahmah mi khat ahi hi. Amah tawh kithei kha peuhmah in it uh hi. A kimuhpih peuhpeuh thathak guan den hi. October 19, 1902 ni-in hih leitunga a nasep hun bei ta a, Lisbon, New York ah si hi.

Hih la-aw phuakpa George Frederick Root bel America gam Sheffield, Massachusetts ah August 30, 1820 ni-a suak ahi hi. A khangno lai mah-in tangthu-a minthang Boston khua-a Park Street Church ah organist-in om pah hi. Tua khit tawlkhat sung Lowell Mason’ khut nuai-ah music sin-a, music hilh sia minthang khat suak hi. Tawlkhat sung New York ah kisuan-a, tua lai-a New York Institute for the Blind ah laihilh hi. Fanny Crosby bang a sangnaupangin om ngei hi. 1850 kumin France gam Paris ah kum khat sung music sina, America gam a tunkik ciangin The Flower-Queen kici cantata khat phuak hi. A lamal ding Fanny Crosby in phuahsak hi. American Tualgal hun sungin Root in gam itna, minam itna la pawlkhat phuaka kideih mahmah hi. Leitung la phuaka a minthan mahmah hangin ama’ uk taktak bel William Bradbury’ patsa nasep ahi mikim’ sak theih ding, a Sunday School suah gospel late (Sunday school type gospel songs) phuah ding mah ahi hi. Musician minthang khat ahihna tawh kizahtaak mahmah a, tua banah ama’ nuntakzia ngiat mite’ maingap theih dingin oma, kha thu ah a upna leh a dinmun kip mahmah hi.

1872 kumin music lam a sepna tampite pahtawina in University of Chicago in Doctor of Music Degree pia-in pahtawi hi. Root in a khan sungin gosple la dawng za tampi a phuah banah labu 75 kikaikhawma a kikhetna ah kihel hi. Tua banah music hilhna laibu tampi gelha cantata dawng tampi phuak hi. Root and Cady music firm min tawh ladal tampi hawmkhia hi. Tuni donga kisa ama’ phuah late’ lakah “Hong Honpa Kiangah Hong Pai Meng In” (Come to the Savior Make No Delay), “Ring the Bells of Heaven,” “The Lord Is in His Holy Temple” cihte minthang deuh hi.

George Root in hih la “Hong Pai Ciangin” ading la-aw a phuah ciangin tualgam bei khit pawla minthang mahmah “Johnny Schmoker” kici leitung la khat panin a la-aw la hi, kici hi. William Cushing’ phuah lamal leh George Root’ phuah la-awte a kithuahkhop ciangin America gam leh England gam-a kipan leitung bupppi-a kideih la ngaih mahmah khat hong piang hi.

19th century musician minthang George Root August 6, 1895 ni-in Bailey’s Island, Maine ah si hi.

Print Friendly, PDF & Email
Please follow and like us:

Added by

SHARE