I Hear the Savior Say/Jesus Paid It All

(Isaiah 1:18)
Elvina M. Hall (1820-1889) John T. Grape (1835-1915)

Pasian phatna hymn khempeuh lakah a lamal leh a la-aw a kituakpen-a kingaihsun ahi hi. La phuaknu Elvina Hall pen pawlpi mi mawkmawk khat hi lel hi. 1865 kum Nipi Ni zingsang khat a pawlpi ahi America gam Baltimore, Maryland-a Monument Street Methodist Church ah kikhawm hi. A pastorpa Rev. George Scrick’ thugen a ngaih laitakin a lungsim-ah hih la hong suak zuaizuai hi. Zeisu Khazih sunga hotkhiatna a kicinna hangin Pasian’ tungah lungdam ko hi. Tua banga a lungdam koh laitakin a lungsim sungah hih la hong phul-a, a pawlpi labu “The New Lute of Zion” sung a awnna mun khat ah gelhkhia hi. Tua khit ciangin laidal dang khat ah teikhia-a a pastorpa pia hi. Tua khit teh tua la peuhmah phawkin nei kha nawn lo hi.

Pawlpi siapa pawlpi organ tumpa’ kiangah va hawh hi. Tua hun laitakin a biakinn uh puah uh a, kizo dektak ahih manin a sawt lo-a biakinn thak-a kituah ding a vaihawm laitak uh ahi hi. Organ koihna ding om lo ahih manin a tumpa Mr. Grape’ inn ah kikoih hi. Siapa in, “Na inn ah organ koih i hih teh biakinn thak-a sak ding la-aw thak khatpeuh phuah na nei maw?” ci-in dong hi. Mr. Grape in zong a phuahsa la-aw pawlkhat siapa’ngaih dingin tum pah hi. Siapa in, “Kalai! zan deuh mah in Miss Elvina Hall in lamal hoih mahmah khat hong pia hi ve’n, tu-a na tum la-aw tawh kituak dinga kiphuak hi leh lah a kilawm lianzen a!” a cih kawmkawmin a Laisiangtho lem-in a sunga ladal lakhia hi. A nih un tua lamal leh la-aw sa khawm uh-a, kituak lua mahmah hi. A nuntak sungun tua bang peuhmah sinkha tuakkha ngei lo uh a, lamdangsa mahmah uh hi. Pasian’nasepna a hihna tel lua mahmah uh a, Pasian in nalamdang khat sem hi, cih thei uh hi.

A sawt lo-in Baltimore-a pawlpi tuamtuamte ah hih la hong kizel hi. 1868 kumin kikhenkhia a, “Sabbath Chords” kici labu sungah kiguang hi. 1875 kumin Philip P. Bliss leh Ira D. Sankey-te in “Gospel Hymns” kici labu sungah a guan uh ciangin leitung bupah kizel hi.

Hih la a phuak Mrs. Elvina Mable Hall pen June 4, 1820 ni-in America gam Alexandria, Virginia ah suak hi. A pasal tawh Baltimore, Maryland-a Monument Street Methodist Church ah kum 40 val pawlpi mi citak mahmah-in om uh hi. A la-aw phuak John T. Grape bel Baltimore-a suangmeihol khuk nei mihau khat ahi hi. Monument Street Methodist Church ah kum tampi om a, Sunday school ah lah hilh-in, organ tum choir makai lah semkawm hi.

Pasian’ nasepzia a lamdanna kilang mahmah hi. A min kiza het lo numei khat-in pawlpi labu sung a awnna mun khat-a a gelh la, a minthang het lo organ tum khat in a aw hong bulh-a, tua bang a pian nadingin pastor khat in a mal leh a aw gawmtuah a, tuni a i neih labute’ sungah a kihel veu la ngaih mahmah khat hong piangkhia hi.

Print Friendly, PDF & Email
Please follow and like us:

Added by

SHARE