Majestic Sweetness Sits Enthroned

(Solomon’ La 5:10-16)
Samuel Stennett (1727-1795) Thomas Hastings (1784-1872)

Evangelical hymn lakah tuampian simsim-a a ngaih mahmah hih la bel Solomon’ La 5:10-16 sung kibulphuh-a kiphuak ahi hi. I Topa mahmah phatna ahi zongin, eite’ adinga hong zawhsaksa A nasepte hanga Amah phatna ahi zongin a kiphuahna hih la pen a tungin taang 9 pha hi. “The Chief Among Ten Thousand” ahi kei leh “The Excellencies of Christ” kici hi.

Samuel Stennett pen England gam Exeter ah 1727 kumin suak hi. A pa Dr. Joseph Stennett pen London Khuapi a Little Wild Street Church-a Baptist pastor minthang mahmah khat ahi hi. 1748 kumin Samuel in a pa’ nasepna ah huhsia sema, kum 10 khit ciangin a pa’ mun luahto in kum 37 sung tua lai-ah semsuak hi. Ama’ hun lai-a thugensiam evangelical makai khat-in kiciamteh hi. Tua hun lai-a gam-ukna lama sem ulian tampite’ muanin om a, Kumpi George III nangawn in thupisa mahmah hi, kici hi. 1763 kumin University of Aberdeen in a nasepna tampite pahtawina-in Doctor of Divinity Degree pia hi. August 24, 1795 ni-in London ah si hi. Pawlpi khat bekbekah citak takin kum 37 sung pastor sem hi.

Theology thulu tuamtuam tampi tawh lai tampi gelh-a, la dawng 39 phuak hi. Tua late a tamzaw 1787 kuma kikhen Rippon’ kaihkhop Baptist collection khat ahi A Selection of Hymns from the Best of Authors kici labu sungah kimu thei hi. Stennett’ phuah late lakah hih la mah minthangpen hi. “Zawdan Gun Gei-Ah” On Jordan’s Stormy Banks) a cih la zong ama’ phuah mah ahi hi.

Hih la a minthanna pen a lamalte a hoih mahmah banah tua lamalte tawh kituak ding la-aw a kiphuah man ahi hi. American church musician minthang Thomas Hastings in 1837 kumin hih la-aw na phuak hi. Amah October 15, 1784 ni-in America gam Washington, Connecticut ah suak hi. Music taktak a sinna tam lo-in a mit mahmah a hat loh den hangin a khan sungin church music bu 50 sanga tawmzaw lo gelh a, la-aw dawng 1000 leh lamal dawng 600 phuak hi. Mi tuamtuamte’ phuahsa la bu 50 bang kaikhawm lai hi. 1858 kumin the University of the City of New York in ama’ nasepna thupite pahtawina-in Doctor of Music Degree pia hi. American church music a khangtosak taktak Thomas Hastings leh Lowell Mason hi, ci-in ciaptehna ngah hi. Ama’ la-aw phuahte lakah hih “Hong Hon Topa Zeisu’ Tal-Ah” (Majestic Sweetness Sits Esnthroned) banah, “Kei’ Ading Ta Khang Suangpi” (Rock of Ages), “A Dahte Hong Pai un” (Come, Ye Disconsolate), “From Every Storm Wind That Blows” cih late kihel hi.

Print Friendly, PDF & Email
Please follow and like us:

Added by

SHARE