Surely Goodness and Mercy

(Late 23)
John W. Peterson (1921- ) John W. Peterson (1921- )
Alfred B. Smith (1916- ) Alfred B. Smith (1916- )

Laisiangtho Pasian’ humuap hi-a, a mal kim leh a buppi-in a kibanga Khasiangtho’ humuap hi ci-in i um hi. Ahih hangin Late 23 zah-a mi kim’ lungsim a nuamsak, hehnepna leh tha thak a guan om lo mai kha ding hi. I pangpaat i thanem laitakin hih Late sunga David’ kammalte in bangzah-in i tha hong hatkiksak den! Bangzah-in hong lungmuangsak! Tua banah Laisiangtho mun khat peuhpeuh sangin hih mun bulphuh-a kiphuak la mahmah zong tamzaw ding hi. Hih la “Surely Goodness and Mercy” mahmah zong 1958 kuma John W. Peterson leh Alfred B. Smith-te in Late 23 mah bulphuh-a a phuah uh ahi hi.

“Prince of Preachers” kici zawzen thuhilhsiam Charles Haddon Spurgeon in The Treasury of David kici volume 7 a pha Late hilhcianna khat na gelh ngei a, tuni dong mah kisim tangtang lai-in hoih kisa mahmah hi. Late hilhcianna a gelh lai-in a zawh nading kum 20 val sawt hi, ci hi. Charles H. Spurgeon in, “Late thuk taka a lung ngaingai mi bekmah in a sunga thu thuk manphate mu thei bek ding hi” ci-in gen ngei hi.

John W. Peterson in hih la a phuahna thu uh tawh kisai hici gen ngei hi: “Ni khat, Montrose, Pennsylvania-a ka studio sunga ka piano mai-ah ka tut laitak, tua hun laitaka ka naseppih Alfred B. Smith inn sungah hong tum hi. Bang hang hiam zong thei lian nawn kei mai ingh e, ka nih un hih la ka phuak khawm uh hi. Mi dang khatpeuh tawh tua banga la ka phuah khop lam thei kei mai ingh. Tua khit lam teh bel ka nih mah un la dawng 2, dawng 3 bang phuak khawm lai ungh.”

Alfred B. Smith in, “Philip P. Bliss’ tu le tate’ lak panin khat in lai hong khaka, Bliss a neu lai-a a sangsia numei khat’ thu hong gen hi. Tua sangsianu bel Philip Bliss in a it mahmah khat ahi hi. A min Murphy kici hi. Lai a sim theih ma, a gelh theih ma un Late 23 hilh-in lotngahsak hi. ‘Surely goodness and mercy shall follow me’ a cihna mun a tun ciangin Philip Blisss in, “surely good Miss Murphy shall follow me all the days of my life” a ci-in ngaihsun ngiat pongmawk hi. Tua thu ngaihsun-a ka genkikna uh tungtawnin hih la a thulu ding hong pianga hih la a kiphuak hi mai hi” ci-in a tangthu a cingzaw-in gen ngei hi.

John Willard Peterson kici min bel Galpi Nihna khit lam peuhmah-in evangelical-te’ lakah a za ngei lo om lo mai kha ding hi. “Dean of contemporary gospel song writers” kici liang namah-a khangthak laphuakte’ lakah a min dawkpen ahi hi. America gam Lindsborg, Kansas ah November1, 1921 ni-a suak ahi hi. A nu a pate music lam a va mahmah Swedish minamte ahi hi. Galpi Nihna lai-in Asia gam tengah Air Force-a sem vanleenghawl ahi hi. Sen gam leh Kawl gam gamgi dung, Kawl gam sung mahmah khawngah vanleeng-in leengleeng hihtuak hi. Gal ven ciangin Moody Bible Institute leh American Conservatory of Music-te ah music sin hi. Western Conservative Baptist Semianry leh John Brown University-te panin pahtawina doctorate degree ngah hi. Gospel la dawng 1,200 val phuak-a, cantata 25 val phuak hi. A la phuahte copy awn guk (six million copies) kizuakkhia khin hi.

Missionary la “So Send I You” zong Peterson’ phuah mah ahi hi. “Nuntak Tawntungna Ciktui Ka Dawn Hi” (Spring of Living Water), “Heaven Came Down”(Ka Sung Khuavak Tang Sak Ta Hi – Xtian La No. 285), “All glory to Jesus,” “Come, Holy Spirit,” “Jesus Is Coming Again,” “God’s Final Call,” “No One Understands Like Jesus,” “Shepherd of Love,” “Over the Sunset Mountains,” “It Took A Miracle,” cih late zong ama’ phuah mah ahi hi. A la phuahte ngaih thei mahmah a, ahi zongin ei Tedim kama kitei tam nai lo hi. A kitei sunsun ngaih thei mahmah hi.

John W. Peterson tawh kopkhawm-a hih la a phuak Alfred Barney Smith zong gospel hymn tawh kisai-in a thei lo om lo hi. “Dean of gospel music” a kici zawzen pa ahi hi. November 8, 1916 ni-in America gam Midland Park, New Jersey ah suak hi. Moody Bible Institute leh Juilliard School of Music-te ah music sin hi. 1943 kumin Wheaton College panin a sangkahna zo hi. Wheaton ah a sangkah sungin Wheaton College Symphony Orchestra ah concertmaster-in om hi. Tua khit ciang Singspiration Publishing Company phuan-in 1962 kum dong president sema, gospel la ngaih bu tampi khenkhia hi. A kideih mahmah Inspiring Hymns zong ama’ khet mah ahi hi. 1972 kumin Encore Publications kici music campany khat phuan leuleu a, Living Hymns kici labu hoih mahmah khat-a kipan evangelical hymn bu tampi khenkhia hi. Gospel la, chorus dawng 500 bang phuaka, “For God So Loved the World” leh “With Eternity’s Values in View” te minthang mahmah hi.

John W. Peterson leh Alfred B. Smith-a kipan gospel laphuakte ki dong thei zel-a, la a phuah uh ciangin bang zia (method) zang uh hiam? A lamal phuak masa maw, a la-aw? La a phuah uh ciangin a suah laitakin gelhkhia henhan uh ahia, ahih kei leh ngaihsunsun, geelgeel-a a phuah uh hiam? Hih laphuaksiam tegel in bel, la a phuah uh ciangin a zuih uh thukhun ‘set pattern’ cih bang tentan om lian lo a, la i cih a hun tawh kizui a mun tawh kituakin pawlkhatte thakhat thu-a a ngah uh omin, pawlkhatte hanciam mahmah a kul zong om hi, ci-in gen uh hi. Bang bang ahi zongin laphuaksiam mahmah nih in Late 23 bulphuh-a a phuah uh hih la ngaih mahmah dawng khat hong piankhiat manin Pasian’ tung leh amau’ tungah i lungdam mahmah hi

Print Friendly, PDF & Email
Please follow and like us:

Added by

SHARE