Blest Be the Tie That Binds

(I John 2:10)
John Fawcett (1740-1817) Hans G. Naegeli (1773-1836)

Hih la a phuakpa John Fawcett pen England gam Lidget Green, Yorkshire ah 1740 kumin mizawng innkuan sung khat-a piang ahi hi. kum 16 a phak ciangin George Whitefield’ thuhilhna tungtawnin piangthak hi. Kum 26 a phak ciangin Baptist pawlpi-ah ordination kipia a, England gam khunglam Wainsgate-a pawlpi neu khat ah pastor sem dingin kisam hi. Tua pawlpi neu mahmah in zawng mahmah hi. A khasum tawm mahmah a, a innkuan lah khangkhangin sumzatna zaii semsem hi. Wainsgate ah tawlkhat sung a sep khit ciangin London khuapi a Carter’s Lane Baptist Church ah pastor sem dingin kisam hi. A minthang mahmah Dr. Gill’ nasep maban zom dinga kisam hi a, a pawlpi lian mahmah-in hau mahmah a, pawlpi thupi mahmah khat ahi hi.

Wainsgate pana a dinkhiat ni dinguh hong tun ciangin a van uh a pua ding leengte’ kiimkot-ah a pawlpi mite khitui naptui tawh dahmai kahmai-a ding khipkhep-a om a muh ciangin a zi Mrs. Fawcett in thuak zo nawn lo a, “John aw, kei bel hibang pi-in pai teiiteii zo kei ning. Bangci banga pai teiiteii ding cih thei zo nawn ke’ng” ci-in hong kapkhia hi. A lawmpa in zong, “Kei zong e, thei zo nawn tuan ke’ng”ci ngeungau ta mai hi. A kiguangsa vanteng kisuahkhiakiksak hi.

Rev. Fawcett in a pawlpi mite’ tunga a thuhilhna khat ah hih lamalte hel-in thu hilh a, 1782 kuma kikhen Rev. Fawcett’ phuah poem dawng 166 kikhumna labu sungah “Sanggam Ki-itna” (Brotherly Love) cih thulu tawh kihel hi.

Rev. Fawcett in hih mite’ kiangah kum 50 val pastor semsuak hi. A khasum kumkhat-in $200 val ngei lo hi, kici hi. Thuhilhsiam leh laithei mipil khat-in a min hong kiza mahmah hi. 1777 kumin khangno thuhilhsiate’ adingin sang khat hong hi. 1793 kumin England gam Bristol-a Baptist Academy ah siapi sem dingin kicial napi-in a pawlpi mite nusia nuam lo ahih manin pai lo hi. Christian nuntakna tawh kisai laibu tampi gelh-a, pawlkhatte bang bu tampipi kikhenkhia-a kikhawng mahmah hi.

1811 kumin America gama Brown University in Pasian’ na a sepnate pawhtawina-in Doctor of Divinity Degree pia hi. July 25, 1817 ni-in pumzaw natna tawh tuk-a, a nuntakna a bei dongin Wainsgate-a a pawlpi mite nusia lo hi. Mimal tupna leh meetnate suplawh ngama Pasian leh a mite a it taktak khalam makai hoih taktak khat ahi hi.

Hih la a aw a phuak bel Hans G. Naegeli hi a, May 26, 1768 ni-in Switzerlang gam Zurich khuapi gei-a suak ahi hi. Music khetkhiat bekbek nasep-a nei khat hi a, Swiss Association for the Cultivation of Music ah president zong sem ngei hi. Music pilna sinna lamah madawk khat-in kiciamteh hi. America gama church music leh pilnna sinnate’ pa a kici Lowell Mason nangawn ama’ nungzui bangin kigen hi. Hih la aw min “Dennis” pen Swirzerland gama piang masa hi a, a nunglam ciangin 1837 kuma Europe gam a zin sungin Lowell Mason in lei-a, George J. Webb tawh 1845 kuma a khetkhawm uh The Psaltery sungah kihel a, “arranged from Naegeli” ci-in ciaptehna khat kiguang hi.

Print Friendly, PDF & Email
Please follow and like us:

Added by

SHARE