Ding Un, Ding Un, Zeisu’ Mi
Stand Up, Stand Up for Jesus!

(Ephesians 6:14)

George Duffield (1818-1888) George J. Webb (1803-1887)

Adam Geibel (1885-1933)

1858 kumin a khua buppi a lok zo kha khanlawhna khat Philadelphia khua ah tung hi. “Philadelphia-a Pasian’ nasepna” (the work of God in Philadelphia) kici hi. Tua sunga kihel Pasian’ nasemte’ lakah Episcopal pawlpi sia Dudley Tyng zaha muibun om lo ding hi, kici tek hi. A kithuahpih sia dangte zong a thuzawh mahmah khat ahi hi. A pa, Rev. Stephen H. Tyng pen Philadelphia khua-a pawlpi lian mahmah khat ahi Episcopalian Church of the Epiphany-a pawlpi kem sia ahi hi. Tawlkhat sung a pa’ nasep huh-in assistant-in om a, tua khit ciangin a pa’ nasep luahto hi. A thuhilhnate ah thutang lua a, tua hun lai-a America gama kizang sila neihna (slavery) langpanin thugen den ahih manin a pawlpi mite pawlkhat lungkim lo uh hi. A nasep tawp pah-ek a, ama’ nungzui mi citak pawlkhat tawh the Church of the Covenent kici pawlpi khat phuan uh hi.

A pawlpi thak uh khang mahmah hi. Tua a khang mahmah pawlpi thakah pastor a sep bek hi lo-in, khuapi laizanga om YMCA ah sun ciangin cialpi bawl den hi. Ama’ thuhilhna ngai dingin mi tampipi kikhawm den hi. March 30, 1858 ni-in sunkam-a ama’ thuhilhna ngai dingin mi 5,000 val kikhawma, Paikhiatna 10:11 tungtawnin thuhilhna nei hi. “Pasal kisateng kuan unla, Topa’ na sem un” ci-a thu a hilh ciangin mi 1,000 val in a nuntakna uh Pasian’ adingin ki-ap uh hi. Tua hun lai-a thuhilhna khempeuh lakah a muibunpen hi, ci-in kiciamteh hi.

A thuhilhna sungah, “Ka Topa’ nasem ka hih manin Pasian’ lungdamna thu genna ah ka cihtak loh sangin hih ka taklam khut a bul pan a kitankhiat ding utzaw ingh” ci-in gen ngeu hi. A kal kik sung khua lamah hawh-in, vaimim um kigawikhiatna set (corn thresher) a et laitakin a duap in a puanban teep mankha-in a sihuipi kitat-a, a thagui zialcip hi. Sisan tam luang lua ahih manin ni li khit ciang, April 19, 1858 ni-in si hi. Si dinga lupna tungah a lup laitakin a lawmte in a kam nunung a dot uh ciangin, “I vek-in Zeisu’ ading ding ni” ci-in vaikhak hi.

A Nipi kik ciangin a lawm it mahmah a naseppih, Philadelphia khua-a Temple Presbyterian Church pastorpa Rev. George Duffield in zingsang huna a thuhilhna ah a lawmpa a pahtawina-in Ephesians 6:14: “Tua ciangin na kawnguah thutak kawnggak gaksa, na awmuah dikna awmdal bulhsa…in ding un”(ZIV) a cihna mun simin thuhilhna nei hi. A khupna-in, a it mahmah a lawmpa’ kam nunnung a zakna tungtawn-a a phuah tang 6 a pha poem khat simkhia hi. Rev. Duffield’ pawlpi-a Sunday School superintendentpa a lungsim lawng mahmah a tua lamalte a dal-a hawmkhiat dingin khenkhia lian hi. Baptist pawlpi laihawm khat-a editorpa in a muh ciangin hoihsa mahmah a, mi a tamzawte’ sim theih dingin hawmkhia sawn hi.

George Duffield bel America gam Carlisle, Pennsylvania ah September 12, 1818 ni-a suak ahi hi. Yale Universiry leh Union Theological Seminary ah pilna sin hi. Pasian’ ading na tampi a sepnate pahtawina-in Knox College in Doctor of Divinity Degree pia hi. Kum 6 sung University of Michigan Board of Regents member khat-in om hi.

Hih la-aw pen “Webb” kici a, George J. Webb’ phuahsa leitung la khatpana hymnal editor khat in a lak ahi hi. Tua la bel “‘Tis Dawn, the Lark Is Singing” (Khua Phalvak Ta, Luivan’n Zong Zaila Awi) a cih khat ahi hi. Atlantic Tuipi tunga kilehleh tembawpi khat tunga lasate’ sak theih la khat hi, kici hi. Webb bel England gam Salisbury ah June 24, 1803 ni-a suak ahi hi. 1830 kumin America gam tung hi. Boston ah tenga, tua khua kiima music tawh kisai munte ah kihel pha mahmah hi. Tua khua-a om Old South Church ah kum 40 sung organist sem hi.

A la-aw dang khat pen “Geibel” la-aw kici a, Adam Geibel in 1901 kuma Duffield’ lamal tawh kituak dinga a phuah ahi hi. Adam Geibel bel September 15, 1885 ni-a Germany gama piang ahi hi. America gam a tun ciangin organist leh music hilh sia-in om hi. Adam Geibel Music Company phuan-a, a nunung lam ciangin Hall-Mack Company kici a, tua khit ciangin Rodeheaver Company tawh kigawm lai-a Rodeheaver Hall-Mack Company suak hi. Geibel pen kum 8 a phak lai-in a mit na-a, a mit tegel taw kiuhkeuh hi. A mit in khua a muh loh hangin organist, conductor minthang mahmah khat suak veve a, la-aw tampi phuak hi. Leitung la zong phuaka, tuate’ lakah “Kentucky Babe,” leh “Sleep, Sleep, Sleep” a cih late bang minthang mahmah hi. Male Voice kici pasal bekbek sak late a phuahsiam deuh a, arrangement bawl zong siam hi ci-in minthang mahmah hi.

William Cowper’ cih mahbangin, “Pasian’ tatzia tel zawh hi lo” takpi a, khangno Episcopalian thuhilhsiam mahmah khat, vaimim um gawina set, sihna ciang a piangsak tuahsiatna, Presbyterian pastor khat in a phuah pahtawina lamal, la-aw nih – khat pen leitung la hi a a khat pen mit khua mu lo khat’ phuah la-aw, “Pasian’ nasepna” kici 1858 kuma kha khanlawhna – hih teng a kigawm ciangin “Ding Un, Ding Un, Zeisu’ Mi!” kici la ngaih mahmah khat hong piangkhia-a, tuni dongin i labute lema hih la i sak simin i lungsim hong thosak den hi.

Print Friendly, PDF & Email
Please follow and like us:

Added by

SHARE