All Hail the Power of Jesus’ Name

(Kilaakna 19:12,16)
Edward Perronet (1726-1792) “Coronation” Tune: Oliver Holden (1765-1844)

Altered by John Rippon (1751-1836) “Miles Lane” Tune: William Shrubsole (1760-1806)

“Diadem” Tune: James Ellor (1819-1899)

Hih lapi pen “National Anthem of Christendom” (Christiante’ Minam Lapi) kici a, “Kei’ Ading Tam Khang Suangpi” (Rock of Ages) la a phuakpa Augustus Toplady in editor a sepna Gospel Magazine sungah 1779 kum November kha-in suaka a kikhet masaknapen ahi hi. Christian upna a tunna mun khempeuh ah kampau nam tuamtuamin kitei khin hi. A kisakna khempeuh ah mite lawpsakin thathak guan den hi. Mipil ngel khat bangin, “Leitungah Christian kici peuhmah a om laiteng hih la kisa dinga, tua khit teh vantungah kisa lai ding hi” ci zawzen a, hi peuhmah hi.

Hih lamal a phuakpa Edward Perrenet pen England gam Sundridge, Kent ah 1726 kumin suak hi. Biakna lam bawlsiatna hangin France (Piancik gam) panin Switzerland gamah, tua pan England gama tai a minthang mahmah French Huguenot innkuan sung pana piang ahi hi. A pa pen State Church of England sungah pastor khat ahih hangin Wesley-te unau leh George Whitefield-te’ makaih evangelical movement a paakta mahmah khat ahi hi. Edward zong a pa bangmah-in Anglican pawlpi sungah pastor-in oma, ahi zongin pawlpi kalsuanziate lungkim lo-in genkhia den hi. “I was born and I am likely to die in the tottering communion of the Church of England, but I despise her nonsense” ci-in gen den hi. Ama’ gen bang hi lo-in a sawt lo-in tua pawlpi nusia-in 1740 leh 1750 kumte in Wesley-te’ nasepna nakpi-in panpih hi. Tua hun sung pen Wesley-te leh amau’ nungzuite in amau’ nasepna a thukimpih lo mite’ bawlsiatna nakpitaka a thuak hun lai uh ahi hi. Tua banga a thuaksiatnate uh tawh kisai-in John Wesley in a diary sungah: “Rockdale panin Bolton ah ka pai uh a, Bolton-ate tawh tehna in Rockdale a huumpite tuuno na hi mai uh hi. Edward Perronet kisialpaii-a, buan lakah kihualgawp hi. Suangtum leeng keiimawka tawlette(padenpauhte) kitam ziahziah hi”ci-in gelh ngei hi.

Ni khat, kikhopna khat ah John Wesley in kikhop kik-ah Edward Perronet in thu hilh ding hi, ci-in mipi’ tungah thuzaksakna nei hi. Wesley sangin kum 18 nauzaw ahih mahbangin Edward Perronet in Wesley’ mai peuhmah ah thu hilh nuam ngei lo hi. Mipi’ mai ah Wesley’ thu nial nuam lo ahih manin pulpit ah dinga ama’n tua a thuhilh ding cikmah-a mang ngei lo a hihna gen hi. Tua khit ciangin, “Ahi zongin, leitunga kihilh ngei sermon laka thupipen kong hilh ding hi” ci-in Mualtung Thuhilhna simkhia-a tu kik hi.

Perronet in hymn dang tampi a phuah hangin tuni donga kisa la cih theih ding hih la bek mah om hi. Hih lamalte a minthanna pen hih lamalte tawh kisa la-aw thumte hang ahi hi. America gamah Oliver Holden’ phuah “Cornation” la-aw kilimzatpen hi. Holden pen Massachusetts a khutsiam (carpenter) khat hi a, ama’ sintawmin music siama lasak sinna sangah sangsia (singing school teacher) sem hi. Great Britain gamah Perronet’ lawmpa William Shrubsole’ phuah “Miles Lane” la-aw kilimzatpen hi. English layman (pawlpi mi mawkmwk) James Ellor’ phuah “Diadem” la-aw bel choir-te ah kilimzat hi. Pawi la-aw tepawl hi a, ei’ kiangah zong hih la-aw kideih hi.

Hih la a kizatna tawh kisai a zaknop mahmah tangthu tampi om ngei hi. India gama missionary pai masa mahmah pawl ahi E.P. Scott khualzina a paina ah misuamte in umcih-in teipi tawh ngim uh hi. Ama’n zong a ipsunga a puak den violen lakhia-in hih la sa hi. “Hih leitunga mi nam kim in” a cihna mun a tun ciangin tua mi gilote in a khut vua a tawi uh teipite khiasuk-in a khitui uh bua huahua keiimawk hi, ci hi. Scott in tua minamte’ kiangah Pasian’ itna leh tatkhiatna thu a sih tawp dongin hilh hi. Pasian in Ama’ hawmsiamna tawh lungdamna thu a kisam lua mahmah tua mite’ tungah hih la zangin lungdamna thu gen hi, cih ding hi mawk inteh!

Print Friendly, PDF & Email
Please follow and like us:

Added by

SHARE