Calvary Ah
At Calvary
(Ephesians 1:7)

William R. Newell (1868-1956) Daniel B. Towner (1850-1919)

Singlamteh tunga Topa Zeisu’ thuakna leh sihna tungtawna hong kilangkhia Pasian’ itna leh hehpihna a kicinna teci panna hih la William R. Newell’ phuah hi a, amah Moody Bible Institute-a sangsia sem den khat ahi hi.

William R. Newell pen America gam Savannah, Ohio ah May 22, 1868 ni-in suaka April 1, 1956 ni-in Deland, Florida ah si hi. Wooster College, Princeton Theological Seminary leh Oberlin Theological Seminary-te ah pilna sin hi. Chicago khua-a om Moody Bible Institute ah assistant superintendent-a a kikoih ma-in tawlkhat sung pastor sem hi. Laisiangtho hilh siam leh conference-a thugen minthang ahi hi. Kum tampi sung khuapi tampi ah Laisiangtho sinpihna nei kawikawi hi. Laisiangtho hilhcianbu tampi gelhkhia a, tuate’ lakah Romans, Hebrews leh Kilaakna bute minthang deuh hi. Studies in the Penteteuch leh Studies in Joshua-Job (Kregel Publications) zong gelh hi.

Ni khat, Institute-a a class ah laihilh dinga a pai laitakin hih lamalte hong suaka, kuama’ om lohna classroom khat ah lut-in a ip sunga a puak lai-ip tung khat ah gelhkhia ngelhngelh-a tu-a i sak banglian hi pah hi. Tua khit a sawt lo-in tua sanga a seppih Director of Music Dr. Daniel B. Towner tawh kituak uh-a tua lamalte lak hi. Tua zawh nai khat khit, a laihilhna pan a ciahkik ciangin a lawmpa Towner in a la-aw phuahsa in na nei a, a lawmta un Pasian’ tungah lungdam lua mahmah-in tua la sa khawm pah uh hi. 1895 kuma kikhen Famous Hymns labu sungah kihel pah hi.

Hih la phuakpa William R. Newell pen a pianthak ma-in pastor sem a pa a lungkhamsak ngei khat ahi hi. A pa lungkham lua-in Moody Bible Institute a President Dr. R. A. Torrey’ kiangah ap nuamin lai khak hi. Nisimin Laisiangtho kisimna leh piangthak khangno dangte tawh kithuahkhopna ah om leh a nuntakna kikhel zo ding ci-in lam-en hi. Torrey in ngaihsun-a, tua sang pen Pasian’ nasem dingte kipattahna mun hi a, khangno siate’ kipuahphatna mun hi lo ahih teh ci-in sang lo dektak hi. A tawpna ah a pa in thum teiiteii a, Dr. Torrey’ thukhun bangin nisimin amah tawh kimu den-a, sang thukhun khempeuh a zuih taktak ding leh kisang bek ding hi ci-in thukimna bawl uh hi.

Newell hong pai takpi a, buaina hau lua mahmah takpi hi. Ahi zongin sang thukhunte bel a kimin zui zo vanglak hi. Nisimin Dr. Torrey kiangah pai dena, dotna tampipi nei den hi. Dr. Torrey in tua dotnate Laisiangtho panin dawng den napi-in Newell in suahtakna taktak ngah thei het kei leh kilawm hi. Ahi zongin zingsang khat a mai hong taii mahmah a, Pasian in a thungetnate uh dawng taktak cih Dr. Torrey in thei lian hi. Tua ni-in William R. Newell mi thak suak takpi hi. Tua ni a kipanin Newell pen sangnaupang khempeuh lakah a etteh huaipen sangnaupang hong suak hi. Tua bek tham lo-in America gam buppi a Laisiangtho hilh a siampen khat hong suakto lai hi.

Daniel B. Towner pen March 5, 1850 ni-in America gam Rome, Pennsylvania-a suak hi a, October 3, 1919 ni-in Longwood, Missouri ah si hi. Evangelical gospel music lamah a pha ding om lo hi, ci-a kiciamteh ahi hi. Music hilh sia, conductor, solo sa, la-aw phuak, lamal phuak – siam loh mahmah a nei lo khat ahi hi. Ama’ pattahsa mi minthang tampi zong om hi. Charles M. Alexander, Harry Dixon Loes, Homer Hammontree, H.E. Tovey, George S. Schuler-te a kipan evangelical la makai tampite ama’ pattahsa vive ahi hi.1885 kum, D. L. Moody Cincinnati ah evangelistic campaign bawl dinga a pai-a kipan Moody leh Towner-te kizom den uh hi. Tua kikhoppite ah Towner in choir makaih-a Moody in a siam a vakna, kha lama a cihtaknate thupisa mahmah a, amah tawh kithuah dingin kun hi. Tua huna kipanin a sihkhiat dongin D.L. Moody tawh ahi zongin, Moody tawh kizom gospel nasepna khatpeuhpeuh tawh ahi zongin sem khawm den hi.

1893 kum khuakhal sungin D.L. Moody in ama’ phuat sangpi Moody Bible Institute ah Music director a sem dingin Towner cial hi. Khangno lamte gospel music makai dinga pattah nading tupna ahi hi. Gospel la makai dingte limtaka pattahna kician neih ding kisam hi ci- a a phawk masa Moody leh Towner hi, kici thei hi. Music hilh sia khat ahihna, la khatpeuh a phuahna, mipi mai-a la a makaihna khempeuh ah mite Zeisu Khazih tawh a kizop nading uh, mite Pasian tawh a kinai nading uh tup-in nei vinven hi.

La-aw dawng 2,000 val phuaka, labu 14 kaikhawmin sangah laihilhna-a a zat ding textbook pawlkhat zong gelh hi. Ama’ phuah la-awte lakah, “Muang Ding Mang Ding” (Trust and Obey), “I Topa Hong Itna Lamdang” (Grace Greater Than Our Sin), “Saved By the Blood,” “Nor Silver Or Gold,” “My Anchor Holds,” “Only a Sinner” late minthang deuh hi.

Print Friendly, PDF & Email
Please follow and like us:

Added by

SHARE