O Little Town of Bethlehem

(Luke 2:4)

Phillips Brooks (1835-1893) Lewis H. Redner (1830-1908)

Christmas carol laka minthang mahmah hih la bel America gama thuhilhsia minthang mahmah Phillips Brooks’ phuah ahi hi. Phillips Brooks pen “Prince of the Pulpit” kici zawzen namah-a ama’ thugente lai-in kihawm-a American litrature ah classic suak pahpah hi. Pastor sem ngei lakah amah zah-a thuhilhna leh laphuahna tawh mi a zo dang om lo hi, kici hi.

Phillips Brooks in hih la 1868 kuma a phuah hi, kici hi. 1866 kumin Holy Land ah zin hi. Bethlehem khua ngiat-ah hawh a, December 24 ni nitak-in tuucingte’ tunga vantungmite’ kilatna mun hi, ci-a a kiciaptehna mun va hawh hi. A zingciang Christmas ni-in zingsang nai 10:00 AM pan nitak lam nai 3:00 PM dong i Topa’ suahna mun hi, ci-a a kiciaptehna muna om Church of Nativity ah kikhawm hi. Tua a kikhopna in a lungsim zo mahmah hi. A kisa late leh tua mun mahmah-a a omna tungtawnin a lungsimah la dawng khat suak hi. Ahi zongin 1868 kum ciangin tua la phuak pan hi. Tua kumin Philadelphia, Pennsylvania-a a pastor sepna Holy Trinity Church ah Sunday School Christmas progam-a naupangte’ sak ding la khat zongzong hi. A lungkim bangin a la mu lo-a, a beisa kum thum lai-a Holy Land a pai lai phawk sitset lai ahih manin la khat phuah ding ngaihsun hi.

La khat phuak takpi a, tua a phuahthak Christmas carol a organist lah ahi Sunday School Superintendent lah ahi Lewis H. Redner pia a, naupangte’ sak theih dingin a sak baih ding la-aw a phuah nadingin ngen hi. Redner bel Philadelphia kiimtengah Sunday School lam a hahkat mahmah khat leh church music lam a kin mahmah-a kithei khat ahi hi. Pastorpa’ lamal tawh kituak ding la-aw a ngah nadingin tawlkhat sung mah buaipih hi. Tua program kipat ding ni khat in a sap ni-in a ihmutna pan thakhat-in khanglo-a hih la-aw phuak hi. Redner in hih la-aw vantung pana hong ki “letsong” hi ci den hi. Naupangte’n deih mahmah pahlian uh a, nitu dongin naupangte bek hi lo-in pisalte’n zong a deih la khat hong suak hi. 1874 kumin kikhenkhia hi. Brooks in naupangte’ ading la tampi a phuah hangin tuni donga kisa cih theih ding hih la bek phialmah om mai hi.

Phillips Brooks bel America gam Boston, Massachusetts ah 1835 kuma suak ahi hi. Harvard University leh Episcopal Theological Seminary pan sang a man khit ciangin 1859 kuma kipan kum tampi a nasep ahi pastor nasep kipan hi. 1859 pan 1869 ciang Philadelphia ah, 1869 pan 1891 ciang Boston-a Trinity Church ah sem hi. 1893 kuma a sih madeuh-in Massachusetts State sunga om pawlpi khempeuh a uk dingin Bishop-in kikoih hi.

A mi mahmah gol ngiat-a (6’6”), a lungtang zong lian-in zai mahmah hi. Minute khat sungin kammal 250 val bang pau-in thu hilh hi. Tua banga a thuhilhnate hangin tua hun lai-a New England-a laang mahmah Unitarianism nakpi-in kikhaktan zo hi, kici hi. Unitarian upna in a zawhgawp Harvard University nangawn kilok zo hi kici hi.

Zi nei ngei lo tangvalpi a hih hangin in naupang it thei mahmah hi. A laisimna inndei sungah naupangte hawh-a a holim nop nadingun naupangte’ deihtheih kimawlna leh milim tuamtuam kem den hi, kici hi. Pulpit tungah ding viavua-a thu a hilh ngaungau siapa, naupangte tawh a inn sung sual tungah bialin kimawl thei zel hi. Thakhata a sih ciangin a mah a theikha mi peuhmah dah mahmah uh-a, a kap lo om lo hi. Kum 5 a pha pan Phillips Brooks’ lawmte naupangno khat in siapa a muh loh sawt ahih manin lungnuam thei lo-in a nu dong hi. A nu in Bishop Brooks van-inn-a a ciahna thu a gen ciangin tua naupang in, “ Nu, vantung mite nuam zen si inteh!” ci hi, kici hi.

Print Friendly, PDF & Email
Please follow and like us:

Added by

SHARE