Aman’ Hong Kha
He Leadeth Me

(Late 23)
Joseph Henry Gilmore (1834-1918) William B. Bradbury (1816-1868)

Hun sawtpi lai-a kipanin America gama Philadelphia khua pen Christian hymn-te le Gospel la ngaih tampite’ piankhiatna mun hi den hi. Tua bang late lakah a minthang penpen khat bel “ Ama’n Hong Kha” cih la ahi hi.

Hih la a phuakpa Joseph Henry Gilmore pen April 29, 1834 ni-in America gam Boston, Massachusetts ah suak hi. A pa zong mi minthang khat hi a, tawlkhat sung New Hampshire State ah governor sem ngei hi. Newton Theological Seminary ah pilna sina 1861 kumin zo hi. A khan sungin Tuiphum pawlpi tam simsim-ah pastor sema, tawlkhat sung bel governor sem a pa’ secretary-in om ngei hi. Newton Theological Seminary ah professor of Hebrew sem ngei a, Rochester University ah Engish literature hilh ngei hi. Tua lai ah lai a hilh sungin college tuamtuama kizang college textbooks tampi gelhkhia hi. La zong tampi mah phuak-a, ahi zongin a laphuah dangte hih la, “Ama’n Hong Kha” zah-in minthang lo hi. Biakna lam leh sanglam-a a sepna tuamtuamte ah mite’ zahtaak-in om a, tuate sangin ama’ kum 28 a phak lai, Philadelphia khua a pastor nei lo pawlpi khat ah donghu sia a sep laitak-a a phuah “Ama’n Hong Kha” cih la a phuakpa a hihna tawh kitheipen zaw hi.

March 26, 1862 ni-a hih la a phuahna thu Gilmore in hici gen hi:

Philadelphia khua, Broad leh Arch Street-te’ kituahna a om, First Baptist Church ah Ni Thum Ni nitak kikhopna ah Late 23 sung ka gengen laitak hi a, a diakdiak-in Pasian in eite hong makaih ziate in ka lungsim hong lawng deuh hi. Kikhop man ciangin leengla do a siam mahmah den Deacon Watson-te’ inn ah ka tawlnga uh hi. Thu ka gengen kawmun Pasian in hong makaihna a manphatna ka phawk semsem-a, ka laikung la-in tuni a i sak hih lamalte ka gelhkhia ngelhngelh hi. Ka man ciangin tua ka la gelhna laidal ka zi piaphei-in, tua thu peuhmah phawk-in ka nei nawn kei hi. Ka theih loh kalin ka zi in tua la Watchman and Reflector magazine ah na khak hi. Tua magazine sungah na kikhen-a, mite’ muh-a a kikhetkhiat masaknapen ahi hi.

Kum thum khit ciangin Rochester, New York-a Second Baptist Church ah pastor sem dingin sap hong sawm uh a, thuhilh dingin ka pai hi. Biakinn sung ka tum phet in a labu uh la-in, “Bang la peuh a sasa peuhmah uh tam?” ci-in labu ka lem hi. “Ama’n Hong Kha” a kici la khat ka tuak liana, pawlpite-a kisa la ngaihte’ lakah kei’ phuah la khat zong na kihel zenzen cih ka theih cilna ahi hi.

1926 kum in Philadelphia khua laizang tak-a om tua First Baptist Church kiphelkhia-a, tua mun-ah zum-inn golpi khat kilam hi. Tua zum-innpi kiu ah sumngo pek khat tungah hih la a taang masa kigelh-a, tua nuai-ah, “March 26, 1862 ni-in New Hampshire State-a governor sem ngei khat’ tapa Reverend Joseph H. Gilmore in Broad leh Arch-te’ leilulam kiu a om First Baptist Church ah thu a hilh khit phet-in Deacon Watson-te’ inn ah “Ama’n Hong Kha” cih la phuak hi. Tua biakinn leh Deacon Watson’ inn pen tu-a hih innpi kilamna mun lian-a om ahi hi” ci in kigelh hi.

“Father of the Gospel Songs” (Gospel Late’ Pa) kici William B. Bradbury in Baptist magazine khat ah hih lamalte mukha-a, a lamal tawh kituak ding la-aw a phuah ahi hi. Amah October 6, 1816 ni-in York, Maine ah suak hi. A tangval ciangin Boston, Massachusetts ah lal a, tua lai-ah “American gam pilna sinna sang le music-te’ pa” (father of American public school and music) kici Lowell Mason tawh kithuah uh hi. America gam nisuahna lama Tuiphum pawlpi lianpipi tampi ah choir director leh organist sem a, naupangte’ laka a nasepnate minthang deuh hi. Tuate’ lakah Music Festival kici naupang tul khat kaikhawma, puan kibang silhsaka, ama’ lapuahte a saksakna la-pawite minthang mahmah hi. La phuah bek hi lo-in, la tawh kisai laihilhna, la ngaihte khetkhiatna nasepte bekbek sepin nei a, 1841 kuma kipanin 1868 kuma a sihkhiat ciang dong Pasian’ la, leitung la bu 59 kaikhawmin khenkhia hi.

William B. Bradbury’ phuah la-awte lakah hih la “Ama’n Hong Kha” (He Leadeth Me) banah “Ka Hi Bangin” (Just As I Am), “Thunget Hun Nuam” (Sweet Hour of Prayer), “Zeisu’n Hong It Ka Thei Hi” (Jesus Loves Me), “Depth of Mercy,” “Even Me,” “The Solid Rock” cihte minthang mahmah hi.

Print Friendly, PDF & Email
Please follow and like us:

Added by

SHARE