A Thu Zaza Nuam Ing
More About Jesus

(Philippians 3:10)

Eliza E. Hewitt (1851-1920) John R. Sweney (1837-1899)

Zeisu Khazih hong hotkhiatna thu ngaihsunsun lehang nuam semsem-a, ngaih semsem hi. Telnop mahmah-a naupangnote nangawn in Zeisu Khazih upna-a san ding a hihna tel thei uh hi. Tua zahkhat-in a langkhat lamah, mihingte’ nuntak tom sunga tel khit zawh ding hi lo kawikawi hi. Bang hang hiam cih leh, tua lungdamna thu i cih a thu mawkmawk bek hi lo a, a “mi” mahmah ahih man ahi hi. Pasian’ Tapa mahmah tawh kizopna, a khangtoto kizopna tungtawna theihna ahi hi. Tanglai-a kipanin a numei a pasal in: “A mah ka theih semsem nading…” “A thu zaza nuam ingh” ci-in a lunggulhna uh na pulaak den uh hi.

Kum tampi laipek-in St. Augustine (AD 354-430) in, “Pasian aw, Nang adinga nong bawl hi a, Nang’ sungah ka tawldam matengun ka lungsim uh dai ngei lo ding hi” ci-in na gen ngei ngiat hi.

Hih lamalte a phuaknu Eliza Edmunds Hewitt pen hun sawtpi sung zawngkhal-a om ahi hi. Tua bang hun sungin Laisiangtho sim dena Pasian tawh a kizopna ah thuklut mahmah hi. Tua banga Pasian tawh a kizopnate mite’ tungah lai-in gelhkhia-in gensawn nuam mahmah hi. Tua banga a lunggulhna tawh kizui-in Sunday school leh naupangte’ ading lai tampi gelh-in lamal tampitak phuak takpi hi. A tawpna ah tua a lamal phuahte gospel musician John R. Sweney-a kipan lasiam tampite in a aw guan uh-a la ngaih pipi hong suak hi. Eliza E. Hewitt in a lamal phuak-a, John R. Sweney in a la-aw a phuah late’ lakah “Lungsung Khuavakna” (Sunshine in My Soul), “Aksi Tang a Om Diam?” (Will There Be Any Star?) cihte kihel hi. Eliza E. Hewitt’ phuah lamalte lakah tuni donga kisasa la tampi mah om a, “Zeisu’n An Bang Hong Itna Pha” (When We All Get to Heaven), “Stepping in the Light,” “Give Me Thy Heart” cih late minthang deuh hi.

Eliza E. Hewitt bel June 28, 1851 ni-in America gam Philadelphia, Pennsylvania khua ah suak hi. Philadelphia-a Girls’ Normal School panin a pilpen “valedictorian” in a sangkahna zo hi. Tawlkhat sung sangsia semin laihilh-a, ahi zongin nungzang natna khat nei-a lupna ngakin om den zaw hi. Kha guk sung nungzang natna nakpi-a a thuakna pan noptuamna a ngah ciangin lungdam lua mahmah a, “Lungsung Khuavakna” a cih la a phuah hi, kici hi. Damdamin a ci dam semsem-a, a tawpna ah Pasian’ nasepnate ah kihel zo ta hi. Fanny Crosby tawh ki-uitui mahmah uh a, kituahkhawm zel-in a la phuahte peuh uh kikumkhawm thei uh hi. Eliza E. Hewitt pen gospel laphuaksiam Edgar Page Stites [“Zeisu Muang In” (Trusting Jesus) a phuakpa] tawh pa unau uh ahi hi. A la phuahte a aw ding John R. Sweney in a phuahsak banah gospel laphuaksiam minthang mahmah William J. Kirkpatrick, B.D. Ackley, Charles Gabriel, E. S. Lorenz leh Homer Rodeheaver-te in zong phuahsak uh hi. April 24, 1920 ni-in Philadelphia khua ah si hi.

Hih la a aw a phuak John R. Sweney bel gospel laphuakte lakah a minthangpen khat ahi hi. La-aw dawng 1000 val phuaka, Gospel labu 60 val a kikhetkhiatna ah a pangpi-in om hi. Eliza E. Hewitt tawh kopkhawma la-aw a phuah banah, Fanny Crosby tawh zong semkhawma, “Amah Thei Ning” (My Savior First of All/I Shall Know Him) la bang zong a aw a phuah ahi hi. John R. Sweney’ phuah la-awte lakah “Zeisu’ Tangthu Ke’n Za Nuan Ing” (Tell Me the Story of Jesus), “Aw Gam Nuampi” (Beulah Land), “Fill Me Now,” “Take the World, But Give Me Jesus,” “Victory Through Grace” cihte kihel hi.

John R. Sweney pen America gam West Chester, Pennsylvania ah December 31, 1837 ni-a suak ahi hi. America gam sung buppi-a sang tuamtuam leh college tuamtuamte ah mite’ zahtaak mahmah music hilh sia leh conductor khat-in om hi. Kum 25 sung Pennsylvania Military Academy ah professor of music sem hi. 1871 kum masiah a la phuahte leitung la pian vive hi a, tua kumin kha lam kikhelna lianpi khat nei-in tua khit zawh kum 28 sung a pilna a siamnate Pasian’ nasepna bekin zang hi. A khan sung tawntung la makaihsiam-in minthanga Bible Conference tuamtuamte ah a mah bekbek kideih mai hi. April 10, 1899 ni-in Chester, Pennsylvania ah si hi. A kivui ni-in hun bawlna sungah Ira D. Sankey in tua ma kum 25 lai-a John R. Sweney’ phuah’ la “Aw Gam Nuanpi” (Beulah Land) sak hi.

Print Friendly, PDF & Email
Please follow and like us:

Added by

SHARE