A Ta It te Hong Kha
God Leads Us Along

(Isaiah 43:2)
George A. Young (1903- ?) George A. Young (1903- ?)

Hih la a phuakpa George A. Young pen a khan tawn khutsiam lettama nasep (carpentry work) sema kivak thuhilhsia khat ahi hi. Tua a khutsiamna angtanpih mahmah hi, i Topa mahmah zong khutsiam lettama khat mah hi, ci hi ve’n! Young-te nupa a kiteen khit tungua kipan Pasian’ nasem dingin kipia pah uh hi. Khualam-a khuaneu khat pan khat ah zin kawikawi-in thuhilh uh hi.

A tuahkhak uh bel thu tam mahmah – pawlkhatte nuam-a, pawlkhatte lungtang nat huai mahmah hi. Khat veivei a nasepna vua mite zawng lua mahmah uh a, Young-te innkuan bangmah pia zo lo uh hi. Pawlkhatte bangin lah pia zo ding gegu napi uh awlmawh lo lel uh hi. Young-te nupa bel lungkia mahmah lo uh a, “Pasian in hong makaih-a, e’n a zui i hi lel hi. I taangsap laitakin hong nusia peuhmah lo dinga i omzia khempeuh Ama’n thei lua hi” ci lel uh hi. Tua bang hun ciangin a sek leh a sing-atte hong kimang thei mahmah leuleu hi.

Sawt veipi sung mi’ inn bekbek saap-a a om khit uh ciangin amau’ neihsa cih theih ding inn no khat hong lam uh-a, a sek leh a sing-atte hong kimang thei mahmah leuleu hi. A lawmte khat in innmun khat a kiman no taka a piak ciangin a neih sunsun uh tawh lei veuvau sam uh a, a thuhilh loh kalkalin tua innmun ah inn no khat lam uh hi. Kum hizah a ngak khit uh ciangin a mang vua zong a mat ngam loh uh inn khat a nei ding hi ta uh hi. Lawp lua mahmah uh a, zan bangin ihmu zong ihmu thei lo liang uh hi. Ahi ta zongin tua inn a kizawh nading tawlpi khat mah sawt veve lai hi. Bangtan bangtan a ngak zongun ngak taaksa lua mahmah lel uh hi. I Topa in a it a tate vantungah inn nuam khat hong kamciam ahih leh hih leitung mahmah ah zong inn no khat hong pia zo lo ding ahi hiam?

A tawpna ah a inn lam uh zo peetpeet ta uh a, inn thakah kituah ta uh hi. “Nuam zensi maw!” cici uh hi. “A taktak mah maw leh!” cici zawzen uh hi. A taktak mah hi sam hi. A innkuanun Phatna La (Doxology) sa-in Pasian’ tungah lungdam ko uh hi. Khua a mialpen hun zankim nangawnin a sak ding uh la a pia, a tawntunga a makaih den Pasian hi mawk hi ve’n! Inn thak nei ta uh a hih teh a inn ah omom ve maw i cih leh tua bang hi dek lo hi. A zin ngei-in zina a vak ngei-in vak hi. Mun khempeuh ah thu hilh-in teci pang kawikawi hi. A taktak-in ci lehang a inn taktak pen vantung hi a, hih leitung bel khualzina a pai laitaka a nawkna hi lel hi.

Tua leh ni khat, Young-te’ innsungah bawlsiatna lianpi khat hong tung hi. Khua dang khat-ah thu hilh dingin a innkuan vua a pai kal-un a thuhilhna a lungkim lo, Young bang pepeuh in inn leh lo a neih ding a haza mi gilo khat in a inn uh haltumsak hi. Young-te innkuan a khualzinna panun a ciah uh ciangin a inn mun vuah vut bek na om ta hi. A innkuan vua a khol veuveu uh sum tawmkhat tawh a lam uh, a ngaklah mahmah uh tua inn tu’n koi-ah om mawk! A kum a kha-a a kepkep uh van leh nate meikuangin valhtum khin ta! Tua innkangtum gei-ah George A. Young ding ngiungeu-a a om laitakin a lungtang na mahmah hi, ahi zongin mei in a kattum theih ngei loh ding a manpha mahmah na tampi a neih gige lam phawkkik hi. Tua banah Job bangmah in dawimangpa’ suksiatna thuak hi ngel kha dinga, ahi zongin amah bek in a thuak hi lo-in, Pasian in ompih gige cih zong thei hi. A lungsim sungah hih lamalte hong kigual denden hi:

Satan in hong do a dahna hong tun ciang,
A ta itte Pasian hong kha
Hong hehpihna tawh i galte hong zawhpih
A ta itte Ama’n hong kha.
Pawlkhatte tuithuk tuihual sungah,
Pawlkhatte mei sung, sisan luangin thuak;
Zan thapai khuamial sung le sun hunin,
Amah phatna la hong sa sak zo den.

Tua inn kangtum gei-ah a din laitkak a lungsimah hih lamalte phuaka, tua khit a sawt lo-in a taang dangte phuak hi. Tuni donga mi tampite a hehnem la ngaih mahmah khat hong piangkhia hi.

Print Friendly, PDF & Email
Please follow and like us:

Added by

SHARE